27
Nhanderuete reve oikoxea rupi ijayvua
Mboraeirã Davi ombopara va'ekue.
1 Senhor ma xemoexakãa ha'e xereraa jepea oiko.
Mava'e gui 'rã tu akyje?
Senhor ma xerekovea onhemi aguã.
Mava'e gui tu akyje ta?
2 Ha'e gui joapo vai va'ety kuery xere ou vy xemomba aguã,
xeavyky rei va'e ha'e xerovaigua kuery,
ha'e kuery onhepyxanga vy ho'apa 'rã okuapy.
3 Xondaro kuery heta xembojere teĩ
xepy'a py nanhemondyi 'rã.
Xere anho opu'ãmba teĩ ajerovia riae 'rã.
4 Peteĩ regua re tema ajerure Senhor pe,
ha'e va'e anho ajouxe:
ha'e va'e ma Senhor pegua oo py aiko aguã aikovea pukukue re,
Senhor rexakãa aexa aguã,
ha'e ixupegua templo py anhembo'e aguã.
5 Ha'e rami vy aĩ vaia ára xenhomi 'rã ojeupegua opy,
xemoinge 'rã ojeupegua oo py anhemi aguã.
Xereraa 'rã itaova áry.
6 Ha'e jave py xeakã ombo'yvate ju 'rã
xerovaigua kuery xembojere rei va'e áry.
Ixupegua oo py arovy'a vy mba'emo ame'ẽ 'rã.
Aporaei ha'e ambopu 'rã Senhor pe.
7 Senhor, endu ke xeayvua,
ndevy ajapukai rã.
Xemboaxy ha'e xembovai.
8 Xepy'a re amoĩ “Xereka ke xereve reiko aguã” 'rea.
Ha'e ramo roeka 'rã Senhor, ndereve aiko aguã.
9 Senhor, ejexa uka e'ỹ eme xevy.
Ndepoxy reve xemoxẽ eme xee nerembiguai.
Mba'eta ndee ma xepytyvõa reiko.
Xeruete xereraa jepea,
epena e'ỹ eme xere, xereja eme xeae'i.
10 Mba'eta xeru ha'e xexy xereja teĩ
Senhor xereru 'rã.
11 Senhor, xembo'e ke ndeguigua tape rupi aiko aguã,
tape jojaa rupi xerereko xere oma'ẽ mbegue va'e kuery gui.
12 Xemboaxa eme xerovaigua kuery oipotaa rami xerereko aguã.
Mba'eta xerovai opu'ã rei okuapy ayvu rive py,
joapo vai aguã re anho nhomongeta va'e.
13 Xee ajerovia Senhor porayvua aexa aguã
yvy re aikove teri reve.
14 Pearõ ke Senhor.
Pendekuerai eme, pendepy'a guaxu
ha'e pearõ tema Senhor.