50
1 Senhor Nhanderuete Ipo'akapa va'e ijayvu vy
oenoĩmba 'rã yvy regua kuery kuaray oua katy gui oikea katy peve ikuai va'e.
2 Sião tetã iporãve ete va'e gui
Nhanderuete oexa uka 'rã guexakãa.
3 Ha'e rami vy Nhanderuete ou 'rã, nokyrirĩ 'rã guive.
Henonde ma ou tata nhomombaarã,
ijyvýry rupi yvytu vaikue hevovo.
4 Ojeupegua kuery omboayvu aguã ou.
Ha'e rami vy yvate yva katy ojapukai 'rã,
yvy katy guive. Ha'e vy aipoe'i:
5 “Pemboatypa ke xevygua kuery iky'a e'ỹ va'e,
Ha'e va'e kuery ma mba'emo ome'ẽ va'e py xereve guarã onhemoingo va'ekue”, he'i.
6 Yva gui oikuaa uka heko porãa,
mba'eta nhomboayvua ma Nhanderuete ae.
7 “Xevygua kuery, pejapyxaka ke, ha'e rã xee xeayvu 'rã.
Israel kuery, amombe'u ta penderekokue.
Xee ma Penderuete, ‘Oreruete’ pejea va'e.
8 Mba'emo peme'ẽague re e'ỹ xeayvu pẽvy,
mba'emo peapy reve xerenonde pemoĩ riaea re e'ỹ guive.
9 Ha'e rami teĩ pendero gui xee ndaipotai vaka ra'y,
neĩ kavara kora gui peme'ẽ va'e.
10 Mba'eta xerymba meme ikuai ka'aguy regua,
yvyty áry mbovy rei e'ỹ vaka ikuai va'e guive.
11 Xee aikuaa guyra yvyty áry ikuai va'e ha'e javi,
xerymba meme ikuai vixo nhuũndy rupigua.
12 Xee akaruxe va'e rire aipo nda'ei 'rãgue pẽvy,
mba'eta yvy ma xemba'e itui,
hexe ikuai va'e ha'e javi avi.* Atos 17.24-25
13 Tyrã xee nda'u ha'u 'rã ri vaka ro'o?
Ay'u 'rã ri nda'u kavara ruguy?
14 Any, Penderuete pe peme'ẽ perovy'aa,* “Peme'ẽ 'rã perovy'aa”, he'ia ma mboraei, e'ỹ vy nhandepy'a ha'e javi py nhamboetea re ijayvu vy (Hebreus 13.15).
ha'e Yvate ete va'e pe pejapo kuerei penhemboayvuague.
15 Pejapukai ke xevy pejexavaia ára.
Ha'e ramo xee rogueraa jepe 'rã,
ha'e rã peẽ ma xemboete 'rã”, he'i.
16 Ha'e rã heko vai va'e pe ma Nhanderuete aipoe'i:
“Nda'evei peẽ kuery xeayvua aeja va'ekue re pendeayvu aguã ha'ekue-'ekue rami,
neĩ xereve guarã ajapo va'ekue rupi pendeayvu aguã.
17 Mba'eta napenhemo'arandu ukai,
xeayvua napendu potai vy.
18 Ha'e rã imonda va'e ma pexa vy perovy'a 'rã,
itavy rei va'e re guive penhemoirũxe vai.
19 Mba'emo vai re anho pendeayvu,
pendejuru py penhombotavya rupi anho pendekuai.
20 Pendeayvu rei peiny penderyvy re,
pendeayvu vaikue-ikue 'rã pendexy pi'a re ae.
21 Ha'e rami pendekuai teĩ xee akyrirĩ ranhe va'ekue.
Ha'e ramo pexa'ã ndee ramigua ae xee aikoa re.
Ha'e rami teĩ xee romboayvu 'rãe.
Ha'e nunga ha'e javi amoĩmba 'rã pexaa py.* Romanos 2.17-24
22 Peẽ kuery Penderuete gui penderexarai va'e,
peikuaa pota pova'e re.
Ha'e rami e'ỹ ri ramo xee romondoropa 'rã,
ha'e ndoikoi 'rã penderepyarã.
23 Xererovy'aa ome'ẽ va'e ma xemboetea rupi ikuai.
Ha'e rami guape omoatyrõ va'e pe ma
aikuaa uka 'rã Penderuete pendereraa jepea.”
Davi onhemombe'u ha'e ojeko rerovaa rupi ijayvuague
Jogueroporaei va'e pe Davi ombopara va'ekue, Bate-Seba reve joguerekoague re profeta Natã ou vy ijayvu jave guare (2 Samuel 11.1–12.20).