74
1 Oreruete, mba'e re tu orereja raka'e rã peve?
Mba'e re tu ndepoxy nerymba vexa'i kuery ndeyvy regua ae orekuai va'e pe?
2 Nema'endu'a ke ndevygua orekuai va'e re,
yvy itui ypy'i guive ndejeupe guarã orejogua rire.
Orejogua raka'e ndevy guarã orekuai aguã.
Nema'endu'a ke Sião yvyty py reikoague re.
3 Eju ke ndevygua oo ivaipa are ma va'e py,
henda iky'a e'ỹ va'e nderovaigua kuery opa marã omongy'apaague py.
4 Mba'eta ronhemboatyague py nderovaigua kuery hevovo rei okuapy,
ha'e ojeupegua ra'angaa rive ju omopu'ã imo'amy.
5 Ha'e kuery ma ka'aguy re haxa oiporu va'e rami avi ombovaipa.
6 Ha'e gui aỹ yvyrape ombojegua pyre ha'e javi
ha'e kuery omopẽmba va'ekue haxa ha'e karavo mbotaa py.
7 Ndevygua henda iky'a e'ỹ va'e re omboja tata,
yvy peve oapy aguã nderery oĩague.
8 Ha'e kuery opy'a py “Aỹ ma nhamomba vyvoi”, he'i okuapy.
Ha'e rami vy oreyvy jave re oapypa Nhanderuete pegua henda iky'a e'ỹ va'ekue ha'e javi.
9 Ha'e rami rire ndoroexavei ma orevy guarã oikuaa uka pyre.
Jipovei ma profeta,
orembyte ndoikoi guive raka'e peve 'rã paa oikuaa va'erã.
10 Oreruete, raka'e peve 'rã tu nderovaigua kuery orere opu'ã rei?
Raka'e peve nda'u nderovaigua kuery ijayvu vaikue rei 'rã nderery re?
11 Mba'e re tu ndereupivei ri ndepo reiporu kuaa regua,
ndepexo yvýry remboapu'a va'ekue?
12 Ha'e gui Xeruete Xeruvixave ma yvy itui ypy'i guive oiko.
Ha'e ae ojapo raka'e oo jepe aguã rami yvy mbyte.
13 Ndee ma ndepo'akaa rupi remboja'o raka'e ye'ẽ.
Ha'e gui yy re ae ju remou'ũ va'ekue ypo akã,* “Ypo” he'ia ma Egito pygua huvixa re ijayvu vy (Isaías 27.1, 51.9; Êxodo 14-15).
14 jakare akã rembovopa,
ha'e hetekue reme'ẽ vixo tekoa e'ỹa rupigua ho'u aguã.
15 Ndee reipe'a va'ekue yvurã ha'e yakã ikuai va'erã,
ha'e rã yakã guaxu ma remboypa va'ekue.
16 Ára ha'e pytũ voi ndevygua.
Jaxy ha'e kuaray guive ndee rejapo va'ekue meme.
17 Remoĩ avi yvy apy peve guarã.
Kuaray puku-a ha'e yro'ya ndee ae rejapo va'ekue.
18 Eikuaa pota ke pova'e nunga re:
ndee Senhor re nderovaigua kuery ijayvu rei okuapy,
hi'arandu e'ỹ va'e regua ijayvu vaikue-ikue nderery re.
19 Emboaxa eme nerymba pyku'i kuery ho'u va'erã pe,
nderexarai eme ndevygua kuery rojexavai rokuapy va'e re.
20 Nema'endu'a ke ndereve guarã rejapo va'ekue re,
mba'eta yvy re nda'evei etea py heko vai va'e anho ikuai.
21 Ojexavai va'e toxĩmba rei eme.
Ojexavai va'e ha'e iporiaukue'i togueroporaei nho nderery.
22 Xeruete, epu'ã ke, eikuaa uka porã ndereko.
Nema'endu'a heko vai va'e ko'ẽ nhavõ nembojaru reia re.
23 Nderexarai eme nderovaigua kuery ojapukai rei okuapya re,
mba'eta nderovaigua kuery opa marã ijayvuve tema okuapy.
Nhanderuete nhomboayvua re ijayvua
Jogueroporaei va'e pe mboraeirã Asafe ombopara va'ekue “Xemomba eme” he'ia py oporaeia rami oporaei aguã.