76
1 Nhanderuete reko ma Judá yvy re oikuaapy,
hery ma omboetepy Israel kuerya py.
2 Salém tetã py oĩ ombojeroviaaty,
Sião ma oĩaty ete.* Salém ma Jerusalém tetã rery mboae, Sião voi.
3 Ha'e py omopẽmba hu'y rexakãgue,
hu'y jokoa, kyxe ha'e joe opu'ã va'e ha'e javi.
4 Ndee ma yvate ete ha'e ipo'akapave va'e
yvyty imarã e'ỹ va'e gui voi.
5 Ipy'a guaxukueve gui reipe'apa imba'e rei-rei.
Ha'e kuery okepa ma oupy,
peteĩve ojerovia vai va'ekue ndoiporuvei 'rã opo.
6 Ndee Jacó Ruete, ndeayvu atã ramo
opytapa karóxa joe opu'ãa pygua ha'e kavaju.
7 Anhetẽ ndee ma nhomongyjea reiko.
Ndepoxy ramo mava'e 'rã tu opyta nerenonde py?
8 Yva guive rendu uka ndeayvua.
Yvy jave rupi oryryi ha'e okyrirĩmba okuapy
9 Nhanderuete opu'ã ramo nhomboayvu aguã
ha'e yvyĩgueve'i ogueraa jepe aguã.
10 Mba'eta avakue poxya voi rejapo 'rã ndereroporaeia aguã rami,
ha'e gui poxya mboae ma ndejee ae 'rã remoĩ.
11 Senhor Penderuete pe penhemboayvu vy pejapo ete.
Ijyvýry pendekuai va'e peru peme'ẽ va'erã,
mba'eta nhomongyjea oiko.
12 Ha'e ma omomba 'rã huvixa kuery ojejou porãa.
Ixugui huvixa yvy regua okyjepa 'rã okuapy.
Nhanderuete rembiapokue ha'e nhanemboaxya re ijayvua
Jogueroporaei va'e Jedutum pe mboraeirã Asafe ombopara va'ekue.