84
1 Xeruete nexondaro reta va'e,
xevy pe nembojeroviaaty ma iporã ete!
2 Xenhe'ẽ py xepoaẽ Senhor pegua oka re nda'evei vy.
Mba'eta xepy'a, xerete ha'e javi py arovy'a Nhanderuete oikove va'e.
3 Kyky'i ma oo 'rã ojou oke atyrã,
mbyju'i voi ojou 'rã guaityrã'i gua'y kue'iry oguereko aguã,
ndevygua altar yvýry,
Senhor nexondaro reta va'e, Xeruvixa ha'e Xeruete.
4 Senhor, ovy'a ete 'rã ndevygua oo py ikuai va'e.
Ha'e kuery oporaei riae 'rã ndevy.* “Ndevygua oo py ikuai va'e” he'ia ma levita ha'e sacerdote kuery templo py ikuai va'e re ijayvu vy.
5 Ovy'a ete 'rã avakue ndere vy imbaraete va'e,
ha'e ipy'a re oĩ taperã omoatyrõ mbyre rupi oguata aguã.
6 Yvyugua ipiru rei va'e rupi oaxa teĩ
ha'e kuery pe ojeapo 'rã yy oxyry porã reia.
Oky ypy va'e omoakỹ porãmba 'rã guive.
7 Ha'e kuery ma imbaraeteve teve 'rã oje'oivy.
Peteĩ-teĩ ojexa uka 'rã Nhanderuete renonde Sião py.† Apy ma ijayvu Jerusalém py Nhanderuete omboete aguã katy oguata va'e kuery re.
8 Senhor, Xeruete nexondaro reta va'e, endu anhembo'ea.
Jacó Ruete, ejapyxaka ke.
9 Oreruete mba'emo vai gui jokoa reiko va'e, eikuaa pota ke,
ema'ẽ huvixave reiporavo va'ekue re.
10 Amboae henda py mil ára aĩ 'rãgue py
ha'eveve peteĩ'i ára ndevygua roka py aĩ aguã.
Heko vai va'e rekoa py xerekoa 'rãgue py
ha'eveve Xeruete pegua rokẽ arõ aikovy aguã.
11 Senhor Nhanderuete ma kuaray ha'e mba'emo vai jokoa.
Senhor nhanemboaxy ha'e nhanemoexakãarã.
Teko porã rupi ikuai va'e pe nome'ẽ e'ỹi 'rã iporã va'e.
12 Senhor nexondaro reta va'e,
ndere ojerovia va'e ovy'a ete 'rã.
Ojejavyague Nhanderuete ombogue aguã re ojerurea ague
Jogueroporaei va'e pe mboraeirã Coré ra'y kuery ombopara va'ekue.