103
1 Xenhe'ẽ, eroporaei ke Senhor.
Xere oĩ va'e ha'e javi togueroporaei hery iky'a e'ỹ va'e rupi!
2 Eroporaei Senhor, xenhe'ẽ,
nderexarai eme guive neĩ peteĩve xevy ojapo porãague re.
3 Mba'eta omboguepa ajejavyague,
xemonguera 'rã guive xemba'eaxy gui.
4 Xereraa jepe 'rã amano aguã gui,
ha'e xemboaxya ha'e xerayvua rupi xemoingo porã 'rã.
5 Xetuja'i teĩ xembovy'a 'rã opa mba'e porã py,
taguato rami xembopyau vy.* Taguato rague hekoviaa rami ome'ẽ 'rã nhanembaraete pyaurã (Isaías 40.31).
6 Senhor ha'evea rami joguereko vy
oikuaa pota 'rã ojexavai rei'i va'e re.
7 Moisés pe oikuaa uka raka'e ojeguigua tape,
Israel kuery pe oexa uka guembiapo.
8 Senhor ma nhomboaxya ha'e iporayvua rupi oiko va'e.
Ivai ma rei-rei 'rã e'ỹ, iporayvu vaipa guive.* Tiago 5.11
9 Nhandevy nda'ijayvu ete riaei 'rã,
mboxy rupi riae ndoikoi 'rã.
10 Jajejavyague rami ete e'ỹ nhanembopaga,
nhandereko vaia rami e'ỹ nhanderereko.
11 Mba'eta yvy gui yva yvatevea rami avi
Senhor nhomboaxya voi yvate ete,
oexa uka 'rã henonde ojererokyjea rupi ikuai va'e pe.
12 Kuaray oẽa gui kuaray oikea mombyrya rami avi
jajejavyague oipe'a mombyry ete nhandegui.
13 Tuu kuery gua'y kue'iry omboaxya rami
Senhor voi omboaxy 'rã henonde ojererokyjea rupi ikuai va'e.
14 Mba'eta oikuaa mba'e nunga gui pa jaiko,
oikuaa ae ma yvy ku'i guigua rive jaikoa.
15 Ha'e rã avakue ma nhuũ rami avi hekove apu'a'i,
jai ipoty va'e rami rive 'rã ikuai.
16 Mba'eta yvytu oipeju ramo ipoty okanhymba 'rã.
Ha'e rire ikuaiague py teĩ ha'e kuery re na'ima'endu'aavei ma 'rã.
17 Ha'e rã Senhor ma jypy'i guive raka'e rã peve
omboaxy 'rã henonde ojererokyjea rupi ikuai va'e.
Gueko porãa oexa uka 'rã hamymino kuery raka'eve rãgua pe voi,
18 guexeve guarã ojapo va'ekue rupi ikuai va'e ha'e javi pe,
ojapo uka va'ekue ojapo ete aguã re ima'endu'a va'e kuery pe.
19 Senhor ma yva re omoĩ guenda opena atyrã.
Huvixave vy opa mba'e re ipo'aka va'e.
20 Ixupegua anjo kuery, peroporaei ke Senhor,
penembaraete ha'e pendepo'akapa va'e,
ojapo uka va'e pejapo, ha'e penhe'ẽ rendu va'e!
21 Ixondaro kuery pendekuai va'e ha'e javi, peẽ kuery voi peroporaei Senhor,
peẽ hembiguai kuery oipota va'e pejapo va'e!
22 Hemimoingo pendekuai va'e ha'e javi, peroporaei Senhor,
mamo rã ipo'akaa py ma guive rã!
Xenhe'ẽ, ndee voi eroporaei avi Senhor!