109
1 Xeruete rogueroporaei va'e, ekyrirĩ eme ke!
2 Mba'eta xerovai ijapu va'e kuery ma nhombotavya rupi ijayvu,
oapekũ ijapu va'e py ijayvu okuapy xere.
3 Ha'e kuery xembojere rei vy xerayvu e'ỹa rupi ijayvu,
mba'e re'ỹ opu'ã okuapy xere.
4 Xee ayvuague repy ma xevy ivai okuapya oĩ.
Ha'e rã xee ma ajerure ainy.
5 Ajapo porãague repy ome'ẽ mba'emo vai,
ayvuague repy ma xere ija'e e'ỹa oĩ.
6 Hovai guarã emoĩ peteĩ heko vai va'e.
Oiporu kuaa regua re topu'ã hekokue mombe'uarã.
7 Ha'e gui ma omboayvua py tombopagaa.
Ojerureague tojekuaa teko vai rami.
8 Hekove topa voi,
ha'e gui ojapo aguã va'ekue amboae ju tojapo.* Kova'e ayvu rupi ma Judas rekokue re ijayvu (Atos 1.20).
9 Ta'y kuery ma tyre'ỹ meme ta'ikuai,
ha'e rã ta'yxy ma imeve'ỹ va'e toiko.
10 Ta'y kuery ma hoo e'ỹ va'e ta'ikuai
mba'emo re ojerurea rupi.
Tomoẽmbaa hoo ombovaipaa va'ekue gui.
11 Mba'emo oguereko va'ekue toipe'apaa oreveague re,
amboae yvy guigua tojopy omba'eapoague repy.
12 Avave rei tomboaxy eme,
neĩ ta'ykue re voi avave rei topena eme.
13 Ta'ikuai eme hamymino kuery,
ha'e kuery ikuai aguã 'rãgue ta'ima'endu'aa eme hery re.
14 Senhor ta'ima'endu'a riae tuu kuery ojejavyague re,
tombogue eme ixy ojejavyague.
15 Ha'e nunga tojekuaa riae Senhor renonde,
ha'e kuery re ta'ima'endu'aave eme yvy re.
16 Mba'eta ojee nomoĩ rire nhomboaxya.
Ha'e rami 'rãgue py oakykue monha ojexavai va'e ha'e iporiaukue'i,
ipy'a vaia rupi ikuai va'e guive,
manoa pe omboaxa aguã.
17 Joe ijayvu vaia rupi anho oiko rire hexe ae ju ha'e nungakue tojeapa.
Ndajogueroayvu porãxei rire togueroayvu porãa eme.
18 Ojee ayvu vai ao puku rami omoĩ rire
toike ipy'apy katy yy rami,
ikãgue peve too azeite rami.
19 Hexe toĩ oao onheovãa rami,
ha'e ku'akuaa omoĩ va'ety rami.
20 Ha'e rami ae Senhor tombopaga xerovaigua kuery,
xerekove re ijayvu vai va'e.
21 Ha'e rã ndee Senhor Xeruete, enhemoĩ xerepyarã nderery remboete ukaa rupi vy.
Xereraa jepe ke, ndeporayvua tuvixa ramo.
22 Mba'eta xee ma ajexavai, iporiaukue'i aiko.
Xepy'apy rupi ma xeaia anho aendu.
23 Xerekove opa ovy kuaray ojero'a ovya rami.
Mombyry omombo pyre aiko tuku karu rami.
24 Akaru e'ỹ re riae aiko ramo
xerenapy'ã ikangypa ma,
xeangai gui xero'o voi ipiru ma ovy.
25 Ha'e kuery pe rã ojou vaipy aiko.
Xerexa vy oakã ombovava-vava 'rã.† Kova'e ayvu rupi ijayvu Jesus kuruxu re oĩ javegua re (Mateus 27.39-40).
26 Senhor Xeruete, xepytyvõ ke!
Xereraa jepe ke xemboaxya rupi,
27 ha'e kuery oikuaa aguã ndepo gui ae xereraa jepearã oua,
ndee Senhor rejapo rire.
28 Ha'e kuery joe ijayvu vai va'e.
Ha'e rã ndee ma rejogueroayvu porã va'e.
Tove xere opu'ã va'e kuery nda'evei nho ta'ikuai.
Ha'e rã nerembiguai ma tovy'a.
29 Xerovaigua kuery re toĩ oxĩmbaa.
Oxĩmbaa tojao'ipa ao puku py rami.
30 Xejuru py arovy'a ete 'rã Senhor.
Rogueroporaei 'rã heta va'e kuery mbyte,
31 mba'eta iporiaukue'i ikuaia katy onhemoĩ ramo,
ojukaxe va'e kuery gui ogueraa jepe aguã.
Messias ipo'akaa ha'e sacerdote oikoa re ijayvua
Mboraeirã Davi ombopara va'ekue.