118
Nhandereraa jepea jarovy'a aguã regua
1 Perovy'a ke Senhor, porayvu va'e ramo.
Mba'eta nhomboaxya opa va'erã e'ỹ.
2 Israel kuery aipo te'i:
“Tá, nhomboaxya opa va'erã e'ỹ.”
3 Arão ramymino kuery aipo te'i:
“Tá, nhomboaxya opa va'erã e'ỹ.”
4 Senhor renonde ojererokyjea rupi ikuai va'e ha'e javi aipo te'i:
“Tá, nhomboaxya opa va'erã e'ỹ.”
5 Ha'e gui xee ma ajexavaia py ajapukai Senhor pe.
Ha'e ramo Senhor oendu vy xerepy karamboae.
6 Xereve Senhor oiko ramo xee ndakyjei 'rã.
Mba'e tu avakue ojapo 'rã xere?* Hebreus 13.5-6
7 Senhor xereve oiko xepytyvõarã.
Ha'e nunga rupi aexa 'rã xere ija'e e'ỹ va'e kuery re aipotaa ojeupity ramo.
8 Avakue re jajerovia 'rãgue py
ha'eveve Senhor re nhanhemi.
9 Huvixa kuery re jajerovia 'rãgue py
ha'eveve Senhor re nhanhemi.
10 Ha'e javi regua xembojere rei okuapy,
teĩ Senhor rery rupi amomba.
11 Jova-jovai gui xejokopa,
teĩ Senhor rery rupi amomba.
12 Eiru rami ete xeao'i okuapy,
teĩ tata py juu okaia rami okaipa.
Senhor rery rupi amomba.
13 Opoxya rupi xemoanha ratã heravy xereity aguã,
teĩ Senhor xepytyvõ.
14 Senhor ma xemombaraetea oiko, aroporaei va'e guive,
xereraa jepe rire.* Êxodo 15.1-2; Isaías 12.1-2
15 Heko porã va'e rekoa rupi onhendu
heraa jepeare oguerovy'a va'e:
“ Senhor opo'akaa rupi ojapo mba'emo porã!
16 Senhor opo oupi vy
mba'emo porã ojapo” he'i va'e.
17 Xee ma namanovei 'rã.
Ha'e rami 'rãgue py aikove 'rã,
Senhor ojapo va'ekue amombe'upa aguã.
18 Senhor xembopaga ete,
teĩ manoa pe naxemboaxai guive.
19 Peipe'a ke xevy teko porã rokẽ,
ha'e va'e rupi aike vy Senhor aroporaei aguã.
20 Ha'e va'e ae ma Senhor rokẽ,
ha'e va'e rupi heko porã va'e anho 'rã oike.
21 Xee rogueroporaei 'rã,
xepytyvõ vy xereraa jepe rire.
22 Oo apoa kuery ita omombo va'ekue ma
yvatevea py opyta iporãvea pyguarã.
23 Ha'e nunga ma Senhor ae ojapo,
ha'e jaexa rã iporã ete va'e.* Mateus 21.42, Marcos 12.10-11, Lucas 20.17, Atos 4.11; 1 Pedro 2.7
24 Kova'e ára ma Senhor omoingo va'ekue.
Ha'e ramo javy'a ha'e jarovy'a 'rã.
25 Senhor, orereraa jepe ke, rojerure!
Oremoingo porã ke, Senhor!
26 Ima'endu'a porãmby toiko Senhor rery rupi ou va'e!* Mateus 21.8-9, 23.37-39; Marcos 11.9; Lucas 13.35, 19.38; João 12.13
Senhor pegua opy peẽ kuery ha'e javi peike va'e rogueroayvu porã.
27 Senhor ma Nhanderuete ha'e nhanemoexakãa.
Ngaru oiko aguã py pembojegua mba'emo rogue py,
altar apy peve.
28 Ndee ma Xeruete, xee rogueroporaei 'rã.
Ndee Xeruete, xee aikuaa uka 'rã ndeyvatea.
29 Perovy'a ke Senhor, porayvu va'e ramo.
Mba'eta nhomboaxya opa va'erã e'ỹ.