1 Ipare imombosapɨsa arɨ pɨpe, oime mendasa tecua Caná ve, Galilea ɨvɨ rupi. Jesús sɨ avei secoi aheve, 2 iyavei Jesús ore semimbohe oroico vahe reseve ore soho avei yuvɨreco aheve. 3 Ẽgüe ehi rumo opa tẽi uva rɨcuer. Evocoiyase Jesús sɨ,

—Ndipo iri uva rɨcuer —ehi chupe.

4 —Cuña, ¿mahera vo aipo ere cheu? Che remimbotar rumo arɨ ndoyepota vɨtei cheu —ehi osɨ upe.

5 Ichɨ rumo aipo ehi ava ɨgua rese ihañeco vahe upe:

—Peyapo opacatu semimbotar pe cuaise —ehi.

6 Aheve oime seis cambuchi guasu ita cuhi apoprɨ, ñepei-pei cambuchi pɨpe oique cincuenta litro, amove oique setenta litro ɨ ipɨpe. Ahe judío oiporu pietase oyepoi ãgua yuvɨreco Tũpa porocuaita mboavɨye ãgua yepi. 7 Evocoiyase ahe ava ɨgua rese ihañeco vahe upe aipo ehi:

—Pemboapɨpopa co cambuchi ɨ pɨpe —ehi.

Omboapɨpopa tuprɨ yuvɨreco. 8 Evocoiyase aipo ehi ava ihañeco vahe upe:

—Penosemi chĩhi, peraso pieta rese hañecosar uve —ehi.

Ẽgüe ehi eté yuvɨreco. 9 Ihañeco vahe pieta rese osãha ɨ oyeapo vahe uva rɨcuer. Ndoicuai eté que sui osẽ ahe uva rɨcuer; ɨgua rese ihañeco vahe güeraño tuprɨ oicua yuvɨreco. Evocoiyase pieta rese hañecosar oñehe cuimbahe omenda vahe upe 10 aipo ehi chupe:

—Opacatu ava omondo uva rɨcuer avɨye catu vahe yɨpɨndar. Ipare acoi ava hɨ̃taropase yuvɨreco, omondo ndasepɨi vahe. Nde rumo ereyapocatupaño avɨye catu vahe, ahe cũritei ramo erenose —ehi.

11 Co yɨpɨndar vahe poromondɨisa Jesús oyapo vahe aheve. Ipɨpe omboyecua güeco pĩratasa. Sese semimbohe vɨroya ité yuvɨreco.

12 Ipare oso tecua Capernaum ve, ichɨ avei, tɨvrɨ reseve supive, iyavei ore semimbohe eta oroso supi. Aheve oroico movɨro arɨ tẽi.

13 Ipare judío upendar Pascua pieta yepota senise, Jesús oso Jerusalén ve. 14 Aheve osepia tũparo guasu pɨpe corero ɨvɨpɨ rupi guarepochi rese mbahe mɨmba eta mondosar; guaca, ovesa iyavei apɨcasu. Aheve avei mbɨa guarepochi recuñarosar yuvɨnoi. 15 Co mbahe repiase rumo, Jesús oyapo tucumbo omombopa tuprɨ tũparo sui opacatu ava imbahe reseve-seve, seimba ovesa, seimba guaca avei. Guarepochi recuñarosar sui otɨapɨ-apɨi iguarepochi ɨvɨ rupi, iyavei imesa opa omombo. 16 Apɨcasu mondosareta uve aipo ehi:

—¡Penosepa co mbahe cũritei ave sui! —ehi—. ¡Aní che Ru rẽta mbahe mondosa tẽi pereco! —ehi.

17 Aipo hese, ore oroyemomahenduha ñehesa icuachiaprɨ aracahendar aipo ehi vahe rese: “Nde rẽta rese che recatẽhɨsa sui che mocañɨra” ehi vahe.

18 Evocoiyase judío mborerecuar yuvɨrecoi vahe oporandu yuvɨreco chupe:

—¿Mbahe vo ereyapora nde mborerecuasa moporẽhɨ ãgua oreu cũritei? —ehi yuvɨreco chupe.

19 Evocoiyase,

—Pemondurupa co tũparo, che evocoiyase mbosapɨ arɨ rupive amopuha irira —ehi judío eta upe.

20 Aipo hese, mborerecuar aipo ehi yuvɨreco chupe:

—Co tũparo rumo imopuhasa cuarenta y seis aravɨter rupi, ¿ereicatura pĩha aipo nde imopuha iri mbosapɨ arɨ rupive? —ehi yuvɨreco chupe.

21 Oñehese Jesús tũparo rese, güete upe tẽi rumo aipo ehi. 22 Ocuerayevɨse rumo manosa sui, ore oroyemomahenduha iñehe agüer rese. Sese orovɨroya sesendar ñehesa icuachiaprɨ pɨpe iyavei semimombehugüer.

23 Jesús secoi vɨtese Jerusalén ve Pascua pieta pɨpe, setá ité ava vɨroya osepiase poromondɨisa sembiapo yuvɨreco. 24 Ndoyeroyai eté rumo ahe ava eta rese. Esepia, opacatu ité ava recocuer oicua. 25 Ndipoi eté que ambuae ava pɨhañemoñeta mombehu ãgua chupe. Esepia, ahe ité opa oicua.