1 Quince aravɨter pɨpe mborerecuar guasu Tiberio recose, Poncio Pilato evocoiyase mborerecuar secoi Judea rupi, Herodes avei mborerecuar secoi Galilea ve, tɨvrɨ Felipe evocoiyase mborerecuar secoi Iturea ve iyavei Traconite ve, Lisanias avei mborerecuar secoi Abilinia ve. 2 Anás iyavei Caifás ahe pahi rerecuar ɨvate catu vahe yuvɨrecoi. Ahese Tũpa, “Emombehu che ñehe ava upe cute” ehi Zacarías rahɨr Juan upe oico ɨvɨ iporupɨrẽhɨsave. 3 Juan evocoiyase oso opacatu ɨai Jordán ɨvɨi oico, supi aipo ehi ava upe: “Pemboasɨ pe angaipa, peyevɨ Tũpa upe, ahese opoãpiramora Tũpa pẽu ñero ãgua pe angaipa rese” ehi. 4 Co yavɨye ité Tũpa ñehe mombehusar Isaías rembicuachiagüer pɨpendar aipo ehi vahe:

7 Ava rehɨi yuvɨnosepa chupe ‘tayande ãpiramo’ oyapave yuvɨreco viña. Ahe rumo aipo ehi: “¡Pe mboi mboetasa tẽi peico! ¿Ava vo, ‘Pesẽra Tũpa ñemoɨrosa ou vaherã sui’ ehi tuprɨ tẽi pẽu? 8 Yɨpɨndar toyecua tuprɨ rane yande Yar upe peyevɨsa pe angaipa mboasɨsa pɨpe. Iyavei ndapeyeroyai chira ‘ore Abraham suindar oroico’ pe hesa rese tẽi peñepɨsɨro ãgua. Esepia, Tũpa oicatuño ité co ita sui Abraham suindar nungar tuprɨ apo ãgua oyeupe nara yepi. 9 Hacha niha imoingatusa voi eté opacatu ɨvɨra iha naporai vahe sapo rupi yasɨa ãgua yepi. Yasɨaprɨ evocoiyase imondosapara tatave” ehi.

10 —¿Mbahe pĩha evocoiyase oroyapora ore recocuer recuñaro ãgua oroico? —ehi ava rehɨi oporandu yuvɨreco chupe.

11 —Pe pereco vahe ñuvɨrío pe camisa, ñepei pemondo ava ndovɨrecoi vahe upe; iyavei pe pereco vahe tembihu, pemboyahomi tẽi ambuae ava ndovɨrecoi vahe upe —ehi imboyevɨ ava upe.

12 Yugüeru avei movɨro ava sui guarepochi rerocuasar ‘tayande ãpiramo’ oyapave yuvɨreco. Ipare oporandu Juan upe mbahe rese yuvɨreco:

—Porombohesar, ¿mbahe vo ore oroyapora Tũpa rupi ore guata ãgua oroico? —ehi yuvɨreco chupe.

13 Evocoiyase aipo ehi ahe ava yuvɨrecoi vahe upe:

—Aní perocua catu iri guarepochi pẽu imombehusa sui —ehi.

14 Iyavei amove sundao oporandu mbahe rese yuvɨreco chupe:

—Ore no, ¿mbahe vo ore oroyapora? —ehi.

—Ndaperocuai chietera que mbahe ambuae ava sui, ndapeñehe-ñehe tẽi chira ava upe sembiapoẽhɨ rese, iyavei peyembovɨhañora pe poravɨquɨ reprɨ rese —ehi sundao upe.

15 Ava rumo, “¿Ndahei pĩha co Poropɨ̃sɨrosar sãrombrɨ secoi?” ehi tẽi Juan upe yuvɨreco. 16 Juan rumo aipo ehi opacatu ava upe: “Che opoãpiramo ɨ pɨpe tẽi; oura rumo ambuae che raquɨcuei, ahe pe ãpiramora Espíritu Santo tata nungar pɨpe. Ahe seco pĩrata catu vahe secoi che sui. Sese cheu ndiyai eté ahe ipɨtaquisã yora ãgua ichui” ehi. 17 “Ahe güeru trigo mbovevesa ihɨgüer sui ipeha ãgua. Sãhɨi evocoiyase yapocatusa, ihɨgüer rumo imondosa tata apɨrẽhɨ vahesave” ehi ava upe.

18 Omombehu-mbehu vɨte ñehesa avɨye vahe ava upe ‘toyemonguerẽhɨ güecocuer recuñaro ãgua yuvɨreco’ oya. 19 Ipare rumo Juan oñehe pĩrata mborerecuar Herodes upe secocuerai rese. Esepia, vɨvrɨ Felipe rembireco Herodías rese secoi, iyavei setá ambuae mbahe naporai vahe sembiapo. 20 Sese Herodes oyapoño ambuae mbahe tẽi: seroyaẽhɨsa pɨpe osoquenda ucaño Juan sereco.

21 Yɨpɨndar rumo voquenda vɨteẽhɨseve Juan oñapiramo setá ava oico, aheseve avei oñapiramo Jesús. Jesús yerure vɨteseve, avɨyeteramo tẽi oyemboi tuprɨ ɨva. 22 Ipare Espíritu Santo ogüeyɨ ou iharɨve apɨcasu nungar, iyavei oyeendu ñehesa ɨva sui aipo ehi vahe:

—Nde che Rahɨr ereico, che rembiaɨsu; sese avɨha ité nde rese —ehi.

23 Jesús vɨrecose treinta aravɨter, ahese ramo omboɨpɨ oporombohe. Ahe icuaprɨ vahe ité José rahɨr secose viña. José Elí rahɨr secoi, 24 Elí evocoiyase Matat rahɨr, ahe Matat evocoiyase Leví rahɨr, Leví evocoiyase Melqui rahɨr, ahe Melqui evocoiyase Jana rahɨr, Jana evocoiyase José rahɨr, 25 ahe José Matatías rahɨr, Matatías evocoiyase Amós rahɨr, ahe Amós evocoiyase Nahúm rahɨr, Nahúm evocoiyase Esli rahɨr, ahe Esli Nagai rahɨr, 26 Nagai evocoiyase Maat rahɨr, ahe Maat Matatías rahɨr, Matatías evocoiyase Semei rahɨr, ahe Semei evocoiyase Josec rahɨr, Josec evocoiyase Judá rahɨr, 27 ahe Judá Joanán rahɨr, Joanán evocoiyase Resa rahɨr, ahe Resa evocoiyase Zorobabel rahɨr, Zorobabel evocoiyase Salatiel rahɨr, ahe Salatiel Neri rahɨr, 28 Neri evocoiyase Melqui rahɨr, ahe Melqui Adi rahɨr, Adi evocoiyase Cosam rahɨr, Cosam evocoiyase Elmadam rahɨr, Elmadam evocoiyase Er rahɨr, 29 ahe Er Jesús rahɨr, Jesús evocoiyase Eliezer rahɨr, ahe Eliezer Jorim rahɨr, Jorim evocoiyase Matat rahɨr, 30 ahe Matat Leví rahɨr, Leví evocoiyase Simeón rahɨr, ahe Simeón evocoiyase Judá rahɨr, Judá evocoiyase José rahɨr, ahe José Jonam rahɨr, Jonam evocoiyase Eliaquim rahɨr, 31 Eliaquim Melea rahɨr, ahe Melea Mena rahɨr, Mena evocoiyase Matata rahɨr, ahe Matata evocoiyase Natán rahɨr, 32 Natán David rahɨr, ahe David evocoiyase Isaí rahɨr, Isaí Obed rahɨr, ahe Obed evocoiyase Booz rahɨr, Booz Sala rahɨr, ahe Sala evocoiyase Naasón rahɨr, 33 Naasón Aminadab rahɨr, ahe Aminadab evocoiyase Admin rahɨr, Admin evocoiyase Arni rahɨr, Arni evocoiyase Esrom rahɨr, ahe Esrom evocoiyase Fares rahɨr, Fares evocoiyase Judá rahɨr, 34 ahe Judá Jacob rahɨr, Jacob evocoiyase Isaac rahɨr, ahe Isaac Abraham rahɨr, Abraham evocoiyase Taré rahɨr, Taré evocoiyase Nacor rahɨr, 35 ahe Nacor Serug rahɨr, Serug evocoiyase Ragau rahɨr, ahe Ragau evocoiyase Peleg rahɨr, Peleg Heber rahɨr, ahe Heber evocoiyase Sala rahɨr, 36 Sala Cainán rahɨr, ahe Cainán evocoiyase Arfaxad rahɨr, Arfaxad evocoiyase Sem rahɨr, ahe Sem evocoiyase Noé rahɨr, Noé evocoiyase Lamec rahɨr, 37 ahe Lamec Matusalén rahɨr, Matusalén evocoiyase Enoc rahɨr, Enoc evocoiyase Jared rahɨr, ahe Jared Mahalaleel rahɨr, Mahalaleel evocoiyase Cainán rahɨr, 38 ahe Cainán evocoiyase Enós rahɨr, Enós evocoiyase Set rahɨr, ahe Set Adán rahɨr, Adán evocoiyase Tũpa rahɨr.