1 Bala yolŋu'‐yulŋu ŋurikiyi Girat‐Djirambuyŋunydja marrtjinana lili, ga märraŋalana, bala yana walala gäŋalana ŋunhimala walalaŋgiyingalana wäŋalili; gäŋalanydja walala ŋunhi Bathinydja, ga gurrunhara ŋunhimala waŋganygala wäŋalili ḏarramuwala yäkuwala * AbinadabBinatapkala, ŋunhi ŋayi yukurranha ŋuli nhinanha ŋunhala bukuŋura. Bala walala ganaŋ'maraŋalana nhanŋu gäthu'mirriŋunha † EleazarLayatjanhana, ŋayi yukurra yurru djäkanydja ŋuriki Bathiwu, djäma yukurra yurru Garraywu.

2 Ga ŋunhiyi Dhawu'‐nherraṉminyarawuynydja Bathi yukurrana dhärrana yana nhäyika wäŋaŋura mukthurrunaŋga yana baman'ŋumirrina, dhuŋgarranydja 20 ŋupara. Ga bitjanana liŋgu ŋuli ‡ IsraelYitjuralpuyŋunydja yolŋu'‐yulŋu galŋa‐yätjthinyana yukurranha, liŋgu mari yukurrana yana mukthurruna marrtjina ŋunhala wäŋaŋura Yitjuralnydja, bala yana walala ŋuli ŋäthinyaminyana märrliliyanha Garraywala guŋga'yunarawuna.

3 Ga § SamuelDjamiyulyunydja ḻakaraŋala ŋurikala Yitjuralpuyŋuwalanydja yolŋu'‐yulŋuwala bitjarrana gam', “Ŋuli nhuma yuwalkkuma warray yurru ŋula bilyun warrpam' Garraywalana, ga nhanŋuwaynha wal'ŋu yurru yukurra buku‐ŋal'yun bukmakthu nhokiyingala ŋayaŋuyu yuwalkkumana wal'ŋu, nhuma yurru yana djalkthurrana ŋunhinydja mulku'‐mulkurunhanydja waŋarrnha walalanha, yarrkmaraŋana, ḏupthurrana‐wala, bala yana wekanharamiya nhunapinyaynydja nhe warrpam'nha yanana nhanŋuwaynha Garraywuna. Ga ŋayi yurru Garrayyunydja nhumalanha walŋakumana, dhawaṯmaramana‐wala yurru ŋulaŋurunydja ganydjarr‐ḏilkurruwalanydja * PhilistiaBilitjiyawuyŋuwalanydja goŋŋuru.” Ga bitjarrana yukurrana ŋayi Djamiyul waŋananydja. 4 Bala walalanydja marrtjina djalkthurrunana ŋunhi wiripuŋunhanydja walalanha waŋarrnha walalanha, † BaalBälnhanydja ga ‡ AstarteYatjatinhanydja, bala waŋganygu yana walala yukurrana buku‐ŋal'yurrunanydja nhanŋuway yana Garraywuna. 5-6 Djamiyulyu ḻuŋ'maraŋala yolŋu'‐yulŋunha ŋunhi bukmaknha yana Yitjuralpuyŋunha, ga bukmak walala ḻuŋ'thurrunanydja ŋunhamala wäŋalili § 7:5–6 MizpahMitjapalili. Bala yana Djamiyul waŋanana bitjarra, “Ŋarra yurru bukumirriyama waŋa Garraynha walŋakunharawu nhumalaŋgu,” bitjarra ŋayi waŋana.

Ga ŋunhi yolŋunydja walala bukmak yukurrana nhinana ŋoy‐ŋathamiriw walala yana, wuyunminana bitjarrana walalaŋgalayŋuwu yätjkuna, waŋana yukurrana wirrkina dhika bitjarrana, “Yuwalk yana ŋanapurru ŋayaŋu‐yätjkuŋalanydja Garraynha.” Walala buku‐ŋal'yurrunanydja yukurrana Garraywu wekaŋala mundhurrnha‐manapara.

7 Ga walalanydja ŋunhalanydja Bilitjiyawuyŋuyunydja ŋäkulana, ŋunhi walala yukurrana Yitjuralpuyŋu miṯtji yolŋu'‐yulŋu ḻuŋ'maranhamina ŋunhala Mitjapa wäŋaŋura, bala yana walalanydja ŋulaŋurunydja yurrum'maraŋala miriŋunha warray, bala yana nyäṉ'thurrunana walalaŋgu lili. Ga walalanydja ŋunhala Yitjuralpuyŋuyunydja ŋäkulana, ga mirithinana walala ŋoy‐yätjthinanydja beyaṉiyinana. 8 Bala yana walala waŋana Djamiyulwalanydja bitjarrana, “Biyaka bukumirriyaŋana Garraywalanydja, märrliliyaŋa ŋäŋ'thurrana yukirriya ŋanya, märr yurru ŋayi ŋilimurrunha walŋakuma muka ŋulaŋuru miriŋuwalanydja goŋŋuru,” bitjarra. 9 Ga ŋayinydja Djamiyulyunydja wekaŋala, bathara mundhurr Garraywu; ŋayi yukurrana waŋana bukumirriyaŋalanydja, ŋäŋ'thurruna waŋana yukurrana bukukurru waŋana bitjarra, “Garray, guŋga'yurra dhuwala Yitjuralpuyŋunha, nhuŋuway wal'ŋu miṯtjinha.” 10 Ga yuwalkthi ŋayi Godthunydja ŋäkula ŋanya bukumirriyanhara, ga ŋunhi walala Bilitjiyawuyŋunydja marrtjina lili yukurrana, nyäṉ'thurrunana walalaŋgu, bala ŋayinydja marrtjina Garrayyunydja walalaŋgu djuy'yurruna waltjaṉnha ga maykarraṉ'nha, ŋutu'na dhika maykarraṉ' bunana. Ga walalanydja ŋunhi Bilitjiyawuyŋunydja wirrkina dhika barrarina, yurru walala gundupuŋalana gay', barrariŋuna dhika marrmarryunminana. 11-12 Ga walala ŋuriŋi Yitjuralpuyŋuyunydja ŋuparana‐wala walalanha, bala yana djuḻkmaraŋalana walalanha ŋunhi Bilitjiyawuyŋunhanydja, liŋgu Garrayyu walalanha guŋga'yurruna. 13-14 Ga biyapulnydja Bilitjiyawuyŋu yakana lili roŋiyina, bitjarrana liŋguna marimiriwnha ŋula nhämiriwnha yukurrana dhärrana ŋunha wäŋa, yana liŋgu‐u‐u ga Djamiyul rakunydhina.

15 Yo, Djamiyulnydja yukurrana djäka bitjarrana liŋguna, ḏälkuŋala yukurrana miṯtjinha nhanŋuway ga ŋunhi wäŋa, yana liŋgu ga rakunydhina ŋayi. 16-17 Bitjana liŋgu ŋayi ŋuli marrtjinyanydja wäŋalili ga wäŋalili ga wäŋalili, guŋga'yunanydja marrtjinya ŋuli mala‐yarr'yuna yolŋu'‐yulŋunhanydja, ga djämanydja ŋayi ŋuli yukurranha Garraywu yana ŋunhala * 7:16–17 RamahRäma wäŋaŋura. Yo, ŋunhamalayi Rämalili wäŋalili ŋayi dhuḻ'yurruna guṉḏa ŋal'‐ŋalmaraŋala buku‐ŋal'yunarawu Garraywu.