1-3  * 21:1–3 DavidDaypittja marrtjina‐a‐a nhinana bala ga‐ga‐ga‐ga‐ga‐a‐a, ga wäŋa ŋunha ŋayathaŋala yäku † 21:1–3 NobNoppuy, ga dhunupana yana ŋayi marrtjinanydja ŋunha buku‐ŋal'yunaramirrililina Buṉbulili, ga ŋäŋ'thurruna ŋayi ŋathawu ŋunhi ḏalkarra'mirrinha yolŋunha; ŋayi waŋananydja bitjarra gam', “Ŋatha ŋarraku ga' wekaŋa ŋarrakuway ga ŋarrakalaŋuwu yolŋuwu.” Liŋgu walala ŋuli wiripu‐guḻku' ḏarramuwurru marrtjinya rrambaŋi walala Daypit malthurruna nhanŋu.

4 Yurru ḏalkarra'mirriyunydja ŋunhi waŋana bitjarra, “Bäyŋu ŋarraku ŋathanydja bay'. Ŋathanydja ŋunha yukurra ŋorra ŋunhina ganaŋ'maranharana wal'ŋu nhanŋuwaynha Godkuna, ŋunhina liŋgu ŋathanydja yukurra ḏälkuma ŋarra.” 5-7 Bala yana ŋayi ŋuriŋiyi ḏalkarra'mirriyunydja dhika märraŋalana ŋunhi ŋayaŋayny'tja dharrpalnydja, bala wekaŋalana nhanŋu Daypitku. 8 Ga biyapul ŋayi Daypitthu dhä‐wirrka'yurruna ŋunhiyi ḏalkarra'mirrinha yolŋunha, “Way, garanydja ga mandjawaktja dhika muka ŋorra yukurra? Ŋarra ḏukṯuk mandjawakku.” 9 Ga ŋayi ŋunhi ḏalkarra'mirriyunydja ḻakaraŋala nhanŋu Daypitku bitjarra, “Mandjawaktja dhuwala ŋorra nhina ya' ŋunhi nhe yawungu ‡ GoliathGalayithnha bunha dhiyaŋuyi, nhanŋuna Galayithkuna mandjawaktja dhuwala.”

Ga ŋayi Daypittja waŋana, “Ga' wekaŋana lili, dhuwalanydja manymaknha mandjawak.” Bala ŋayinydja yana wekaŋalana ŋunhi mandjawaktja Daypitkuna, bala Daypittja marrtjinana. 10 Ŋayi waṉḏinanydja bena‐wala barrkulilina, djuḻuḻ'yurrunana § SaulDjolwalana, liŋgu Djolnydja yukurrana ḏukṯukthina nhanŋu wirrkina bunharawuna wal'ŋu Daypitku.