Ŋayi Yitjakayayunydja ŋäkulayi ŋunhi dhäruk malanha, bala wirrkina ŋayi warwuyurrunanydja, bala yana ŋayi marrtjina buku‐ŋal'yunarawuylili buṉbulili, ga ŋunhalana ŋayi bukumirriyaŋala ŋäŋ'thurruna Garraynhanydja. Ga wiripunydja ŋayi dhäruk‐djuy'yurruna * 19:1–4 IsaiahYitjayawu bitjarra, “Bukumirriyaŋa ŋäŋ'thurra Godnha, waŋiyanydja ŋanya guŋga'yunarawu ŋilimurruŋgu.”

5-7 Ga ŋayinydja Yitjayayunydja buku‐ruŋiyinmaraŋala dhäruk djuy'yurruna nhanŋu ŋuriki giŋgunydja bitjarra, “Dhuwalana Garraywuŋunydja dhäruk, bitjan ŋayi waŋanydja yukurra dhuwala gam'. ‘Yaka walala barrariyanydja ŋuriŋiyi dhärukthunydja ŋunhi ŋayi miriŋu giŋ yukurra waŋa ŋuli nhumalanha. Ŋarranha warray ŋayi ŋuli yukurra ŋunhi warku'yundja. Ŋarrapi yurru walalanha djuy'yun roŋiyinmarama bukmaknha yana, giŋnha ŋunhiyi ga miṯtjinha nhanbala; walala yurru gundupumana roŋi'‐ruŋiyirrina walalaŋgiyingalana wäŋalili, ga ŋunhalana ŋarra yurru bumanydja ŋanya walŋanydja nhanŋu dhawar'marama,’ bitjarra God waŋananydja.”

8-13 Ga wiripunydja ŋayi ŋuriŋi miriŋuyu giŋdhu djuy'yurruna djorra' dhärukmirri djunama giŋ Yitjakayawu, ga bitjan ŋayi ŋunhi yukurra waŋa dhäruktja gam', “Ŋarrapi dhuwala yindinydja bathalanydja, ga nhipalanydja waŋarr be bäyŋuna, ganydjarrmiriwnha ŋayi. Yakana ŋayi yurru walŋakuma nhumalanha. Ŋarrapi yana nhumalanha yurru buma dhawar'maramanydja.”

14-19 Warr‐way märraŋalana ŋayi Giŋ Yitjakayayunydja ŋunhiyi djorra', bala ŋayi marrtjinana djunama buku‐ŋal'yunaralilina buṉbulili, ga ŋunhalana ŋayi gurrunharanydja, bala ḻapmaraŋalanydja milmana Garraywalana, bala ŋayi bukumirriyaŋalana yukurrana bitjarra, “Garray, nhe warray wal'ŋu ganydjarr‐ḏumurrunydja, biyapulnydja‐wala garrwar; nhepina waŋganynha yuwalkŋunydja wal'ŋu waŋarr. Bukmak dhuwala miṯtji bäpurru ga bäpurru nhokiyingala yana goŋŋuranydja, liŋgu nhepiŋga waŋganydhu djäma dhuwala wäŋa munathany'tja ga ŋunha djiwarr'. Garray, ŋäka ŋarranha bukumirriyanharanydja, ga nhäŋana dhuwala djorra'na. Dhuwala ŋayi yukurra ŋunha ya' miriŋu Giŋ waŋa warku'yun nhuna. Ŋunhanydjayi miriŋu ganydjarr‐ḏumurrumirrina, ga guḻku'nhana walala ŋuli yukurranha ŋäthilinydja bunha wiripuwurrunhanydja bäpurru'nha, dhawar'‐dhawarmaranhana bunha ŋuli walalambala waŋarrnhanydja walalanha, bili walalambalanydja ŋunhi waŋarr walala goŋbuy walalaŋgiyinguŋu djämawuy, dharpa warray, ga be nhä warray, guṉḏa warray. Garray nhepi yana dhuwala walŋa‐ḏikṯiktja waŋarr, walŋakuŋa ŋanapurrunha nhokalay nhe ganydjarryu. Dhawaṯmaraŋana yana ŋanapurrunha ŋulaŋuru nhanukalanydja goŋŋuru, märr yurru bukmakthu bäpurru'yu ga bäpurru'yu nhämana, ŋunhi nhepi yana waŋgany yuwalkŋunydja wal'ŋu waŋarr,” bitjarra ŋayi Giŋ Yitjakaya bukumirriyaŋalanydja.

20-34 Bala bur‐way nhanŋunydja ŋunhala dhäwu' Giŋ Yitjakayawunydja ŋulaŋuru lili Yitjayawuŋunydja, bitjan ŋayi waŋanydja yukurra, “Dhäwu' nhuŋu dhuwala ŋayi Garrayyu wekaŋala, dhuwala gam' ŋarrakala, ‘Marŋgi ŋarra ŋurikiyi yätjkunydja Giŋgu ŋunhi ŋarranha ŋayi yukurra warku'yun ŋuli. Ŋarra yurru djuy'yunna‐wala ŋanya yana, ga buma rumbal‐winya'yunmaramana. Yaka yana yurru ŋayi marrtji ga gärri dhipalanydja wäŋalili, ga yaka yurru ŋula yolŋu burakirri walalaŋguŋu. Ŋarrapi yurru walŋakuma dhuwalanydja gay' wäŋa,’ bitjan ŋayi Garraynydja waŋa yukurra.”

35-37 Yuwalknha yana bitjarrayinydja walalaŋgu ŋunhala. Miriŋunydja ŋunhi nhinana marrtjina ŋula ḻiw'maraŋala walalaŋgala, wäŋaraŋalana yukurrana, bala marrtjina miriŋunydja ŋunhi murrmurryurrunana, bili rerrina walalaŋgu bunana ŋunhalayi; guḻku'na dhika yolŋunydja marrtjina murrmurryurruna, ga wäŋanydja ŋunhi warrpam' gungaŋala yolŋuyu ŋuriŋi rakunymirriyu, be‐nhaŋa ŋorranhara. Bala ŋayi ŋunhi giŋdja wirrkina barrarina dhika; dhunupa gaŋgathina ŋayi ŋuliŋuru wäŋaŋurunydja, bala yana gundupuŋala roŋi'‐ruŋiyinana walalaŋgiyingalana wäŋalili, bukmak yära ŋunhi walala walŋamirrinydja. Ga ŋunhiliyi nhanukalay wäŋaŋuranydja ŋuriŋi maṉḏa yothuyu maṉḏathu ḏarramuyu maṉḏa dharpuŋala mandjawakthuna ŋanya ŋunhiyi yätjnhanydja wal'ŋu giŋnha.