1 Yo, Garray waŋana ŋarrakala bitjarra, 2 “Nhäku walala ŋuli yolŋu'‐yulŋu * IsraelYitjuralpuyŋunydja waŋa bitjan, ‘Dhuwala ŋanapurru yukurra ŋayaŋu‐yätjthirrina, liŋgu ŋanapurruŋgala bäpa'mirriŋuwala ŋuriŋi yätjthu.’ 3-4 Yakana biyapulnydja waŋiya biyakayi, liŋgu birrka'mirrina yolŋu walala ŋarrakuwaynydja yana, bäpa'mirriŋu ŋunhiyi ga gäthu'mirriŋu nhanŋu. Ŋayi yurru ŋunhiyi liŋgu dhuwurr‐yätjtja yolŋu rakunydhirri nhanukalay ŋayi ŋuriŋi yätjthu.

5 “Yo, ŋunhi ŋayi yurru yolŋu nhina yukurra ḻatju' dhika wal'ŋu rom‐dhunupa; 6 yaka ŋayi ŋuli buku‐ŋal'yun wiripuŋuwu waŋarrwu ŋurikala walalaŋgala dhambay nhanukalaŋuwala miṯtjiwala, ga yaka ŋayi ŋuli marramba' warkthun, ga manaŋirri ŋula nhä, 7-9 yana ŋayi ŋuli mel‐wuyunaramirriyunydja gal'ŋu djäka yukurra ŋuruku ŋunhi goŋmiriwŋura, ga dhäruk ŋarraku märrama, ga ŋayathama ŋayi ŋuli yukurra ŋarrakuway romnha baṯ bitjan, ga yaka djäma ŋula nhä yätj wal'ŋu, ŋayinydja ŋunhiyinydjayi yolŋu yurru nhina yukurra walŋana, liŋgu rom‐dhunupana ŋayi, yaka ŋayi yurru rakunydhirri gupaḏalkuma.” Ga bitjarra ŋayi Garray waŋananydja.

10-13 “Ga ŋuli ŋayi ŋuriŋiyi rom‐dhunupayu ŋayathama yukurra gäthu'mirriŋunha, yurru ŋayi ŋuli ŋuriŋi nhanukala gäthu'mirriŋuyunydja djäma yätj warray, ŋunhina mala rom ŋunhi yaka nhanukala bäpa'mirriŋuyu yukurrana djäma; manaŋirri ŋayi ŋuli, ga buma marrtji yolŋu'‐yulŋunha, ga bitjanna liŋgu ŋayi ŋuli buku‐ŋal'yunna wiripuŋuwu waŋarrwu, ga djäma ŋula nhä marramba', ga ŋunhi monyguma ŋuli yolŋunha ŋarraku ŋurruwuyknha, ga djäma ŋunhiyina malanha ŋunhi yaka ŋamakurru', yätjnha yana. Ga nhaltjanna ŋayi yurru Godthunydja? . . . Yana ŋayi yurru waŋa ‘Bäyyi’ bitjanna? Yaka warray. Yakana ŋayi yurru ŋunhiyinydja yolŋu nhina yukurra walŋanydja. Djämanydja ŋayi yukurrana yätjnha yanana, bala rakunydhirrina ŋayi yurru, ga ŋunhinydja nhanŋuwaynha ŋurikiyinayi ŋurru.

14-18 “Mak wiripunydja ŋurikalayi dhuwurr‐yätjkala yolŋuwala gäthu'mirriŋuyu ŋuli nhäma ŋunhi bäpa'mirriŋuwala djämawuy yätjkunhara, ga yakana ŋayi yurru malthundja nhanukalaŋuwu ŋurikiyi bäpa'mirriŋuwalaŋunydja romgu; yaka ŋayi ŋuli ŋunhiyi gäthu'mirriŋu buku‐ŋal'yunna wiripuŋuwu waŋarrwu ga djäma ŋula nhä marramba', ga yaka ŋayi ŋuli manaŋirri ga djäma yätjkuma, yana ŋayi ŋuli marrtji wekamana dhapinyayuna yana ŋurruwuykkunydja yolŋuwu, ga dhäruk ŋayi ŋuli ga rom märrama marrtji Godnha yana. Ga ŋunhiyinydjayi gäthu'mirriŋu dhuwurr‐ŋamakurruny'tja yurru nhina yukurra walŋana yana, yakana ŋayi yurru rakunydhirri liŋgu ŋuriŋi bäpa'mirriŋuwala nhanukalaŋuwala yätjthu; ŋunhiyi warray nhanŋu bäpa'mirriŋu warray yurru rakunydhirrinydja, liŋgu ŋayi ŋunhi dhuwurr‐yätjthina ŋayipi.

19 “Wiripunydja nhuma mak ŋuli waŋa bitjan, ‘Mak ŋayi yurru ŋunha gäthu'mirriŋunhanydja murr'maramana, dhä‐ḏir'yunna manapan, liŋgu ŋuriŋi nhanukala bäpa'mirriŋuwala dhuwurr‐yätjthinyarayu,’ bitjan. Yaka warray, liŋgu ŋayi yukurrana ŋunhiyi gäthu'mirriŋuyu djäma ŋamakurru' warray, yaka warray yätj. Ŋayinydja yurru nhina yukurra walŋa warray, yaka warray yana dhä‐ḏir'yunara, liŋgu ŋayi djäma ŋamakurru' yana, Godku nhanŋuway rom malanha. 20 Yo, ŋunhina liŋgu yurru yolŋu rakunydhirrinydja, ŋunhi ŋayi yukurra djäma yätj ŋuli. Gäthu'mirriŋunhanydja yurru yakana ŋarra dhä‐ḏir'yun liŋgu ŋurikala bäpa'mirriŋuwala rom‐yätjthinyarayu, ga yaka yana ŋarra yurru dhä‐ḏir'yun bäpa'mirriŋunhanydja ŋurikiy nhanukalaŋuwuy gäthu'mirriŋuwalaŋuwuynydja dhuwurr‐yätjthinyara. Ŋuriŋi dhuwurr‐ŋamakurru'yunydja yolŋuyu yurru märrama ŋamakurru' wal'ŋu yana, ga ŋuriŋinydja dhuwurr‐yätjthunydja yurru yolŋuyu märrama yätj yana.

21 “Ŋuli ŋayi yurru ŋunhiyi dhuwurr‐yätj yolŋu djambi nhanŋuway ŋayi dhukarr, ga nhina ŋamathamana, ŋayinydja yurru yakana rakunydhirri, nhinana ŋayi yurru walŋana yukurra. 22 Ŋayi yurru Garrayyunydja nhanŋu bäy‐ḻakaramana ŋurikiy yätjpuynydja, bala ŋayi yurru walŋathirrina yukurra nhina, liŋgu ŋayi ŋuli djäma yukurra ŋamakurru' yana wal'ŋu. 23 Yakana ŋarranha ŋuli galŋa‐djulŋikuma ŋuriŋinydja ŋunhi ŋarra ŋuli nhäma dhuwurr‐yätjnha yolŋunha rakunydhinyara. Ŋarranydja ḏukṯuk nhanŋu, ŋayi yurru gonha'yunna ŋunhiyi yätjtja rom malanha, ga nhina ŋamathamana gal'ŋu, märr ŋayi yurru nhina yukurra walŋa, ga yakana rakunydhirrinydja.” Bitjarra ŋayi Garray waŋananydja.

24 “Ga ŋunhi ŋayi yurru dhuwurr‐ŋamakuli' yolŋu bilyun, gonha'yun ŋunhiyi nhanŋuway ŋamakurruny'tja, bala nhina ŋunhiliyi yätjŋurana romŋura, ŋunhiyinydjayi märr‐yuwalk yurru yana rakunydhirri ŋunhiliyinydjayi. Ŋarra yurru meṉgumana ŋunhinydja dhuwurr‐ŋamakurruny'tja ŋunhi ŋayi djäma ŋäthili, yana ŋayi yurru rakunydhirrina, liŋgu ŋuriŋina ŋunhi ŋayi djäma mirithirrina yätjnha gal'ŋu rom.” Ga bitjarra ŋayi Garray waŋananydja.

25 Wiripunydja mak nhe yurru waŋa bitjan, “Way! Dhuwalinydja dhukarr djarrpi'na, yakana dhunupa. Godthunydja yurru nhäma yolŋunha walalanha rrambaŋikuma yana wal'ŋu. Nhäku warray ŋuli wiripu‐guḻkuny'tja nhina marrtji walŋamirri ga wiripu‐guḻkuny'tja murrmurryun marrtji?” Bitjan nhe yurru waŋa. Ga ŋayipinydja Godtja yurru waŋa buku‐wakmarama bitjanna, “Nhenydja ŋuli ŋunhi guyaŋirri yanapi ŋarra ŋuli djäma yaka rom‐waŋganydhirri. Nhuŋuway guyaŋinyara ŋunhinydja djarrpi'kunhara bitjanarayinydjayi, yakana dhunupa. Liŋgu birrka'mirriwu waŋga'‐waŋganygu ŋarra ŋuli marrtji wekamanydja ŋupanayŋuyi yana, ŋulinyara liŋgu ŋunhi nhä ŋayi yukurrana ŋuriŋi yolŋuyu djäma. 26 Yo, ŋunhi dhuwurr‐ŋamakurruny'tja yolŋu yurru nhina walŋa, liŋgu ŋayi djäma ŋamathaŋala wal'ŋu, ga ŋuli ŋayi yurru ḏaḏawyun ŋuliŋuruyi ŋamakurru'ŋuru, ga bilyun yätjlilina, ŋayinydja yurru rakunydhirrina, liŋgu ŋuriŋi nhanukalay ŋayi yätjthu djämayu. 27-28 Ga ŋuli yurru ŋayi ŋula yol dhuwurr‐yätj yolŋu ḏaḏawyun ŋuliŋuru yätjŋuru, ga djäma ŋamakurru'na wal'ŋu, ŋayinydja ŋunhiyinydja yolŋu yurru nhina walŋana yana, yakana yurru ŋayi rakunydhirri.” 29 Yo, ŋayi Garraynydja waŋana bitjarra, “Nhumanydja ŋuli ŋunhi guyaŋirri yanapi ŋarra yukirri djäma djarrpi'kuŋu, ŋunhi ŋarra ŋuli wekama ŋupanayŋuyi yana djämawuy nhumalaŋguŋuway. Nhumalaŋguway ŋunhi guyaŋinyara djarrpi'kunhara bitjanarayinydjayi. Nhuma ŋuli guyaŋirri bitjan, ‘Bäythi ŋunhi ŋarra yurru djäma yätjkumanydja,’ bitjan, yurru ŋunhiyinydjayi djarrpi'na yana guyaŋinyarawuy, yakana dhunupa.

30 “Ŋarranydja dhuwala Garray God Waŋarr wal'ŋu nhumalaŋgu, ga ŋarra yurru ŋarrapi mala‐yarr'yundja marrtji nhäma'‐nhamanydja nhumalaŋguŋu djämawuynydja, nhaltjarra nhe nhinana yukurrana, ŋamathaŋala wo yätjkuŋala. Ma' bilyurrana! Gonha'yurrana dhuwaliyi yätjtja rom gupaḏalkuŋana, märr yurru nhenydja yakana rakunydhirri, ga baḏuwaḏuyun rrambaŋikuma nhokuŋu yätjpuynydja. 31 Biyaka ḏupthurrana, yupmaraŋana dhuwali yätjtja warrpam'thurrana yana, ga märraŋa yuṯana wal'ŋu walŋa nhokalay nhe ŋayaŋulilinydja, märr yurru nhuŋu ŋayaŋunydja djambina yuṯayirrina. Ŋarranydja yaka ḏukṯuk nhumalaŋgu, nhuma yurru ŋarrakunydja yolŋu walala rakunydhirri. 32 Ŋunhi ŋarra ŋuli nhäma yolŋunha rakunydhinyaranydja bitjanarayi, ŋuriŋiyinydjayi ŋarranhanydja ŋuli yakana ŋayaŋu‐ŋamathinyamirriyama. Ma' bilyurrana walala, ga yuṯathiyana biyakana, märr yurru nhe nhina yukurra gupaḏalnha‐wala yanana, walŋana yurru.” Ga bitjarra ŋayi Garray waŋananydja.