7
Ŋunhiyi yätjmirrinydja warrpam'nha ŋurru‐ḻupthurruna gapuyuna monyguŋala
7:1–24 (The flood)
1-4 Dhuḻ'yurrunana‐a‐a ŋayi marrtjina bala * 7:1–4 NoahNowayu, yana liŋgu‐u‐u marthaŋa ŋunhi warrpam'nha ŋamathinana. Bala yana ŋuliŋurunydja Garrayyu waŋana ŋanya Nowanha bitjarrana, “Gatjuy nhuma gärriyana‐wala dhipali marthaŋalilinydja, nhumapi yana dhuwali bili walala yurru walŋathirrinydja, liŋgu nhepina waŋganynha ŋuli yukurra nhina ŋamathamanydja wal'ŋu. Wäyinnhanydja walalanha wapmaraŋana yukirriya, gärrinyamaraŋana walalanha, liŋgu galkina ŋarra yurru djuy'yunna waltjaṉdja, ga warrpam' yurru nhä malanha murrmurryundja marrtji.”
5-16 Yo, ŋayi Nowayu djämanydja warrpam' yana dhawar'maraŋala nhaltjarra Godthu nhanŋu ḻakaraŋala. Nhanŋu Nowawu dhuŋgarranydja 600‐nha ŋulinyaramirriyu ŋunhi walala yukurrana wapthurrunana marthaŋalilina. Dhark‐dharkthinanydja walala bukmak yana, Nowa ga miyalk nhanŋu ga yumurrku' nhanbala, ga wiripuna ga wiripuna wäyindja malanha. Wapthurrunanydja walala yukurrana, dhawar'yurrunanydja, bala Godthunydja ŋayipina goŋdhu dhaḻ'yurruna dhurrwara ŋunhi marthaŋanydja, wuṉḏaŋarrkuŋalana wal'ŋu yana. Nhinanydja walala yukurra ŋunhili djinawa' marthaŋaŋuranydja walu ŋupanna‐a‐a, yana liŋgu‐u‐u ga 7 walu djuḻkthurruna, bala ŋayinydja marrtjina djiwarrny'tja ŋunha ḻapthurrunana, yurru ŋayi waltjaṉdhu djurrŋguḻ'yurrunana gay, ŋutu'na dhika waltjaṉ bunana walalaŋgu.
17-23 Yo, waltjaṉdhunydja ŋuriŋinydja dharyurrunana marrtjina‐a‐a, yana liŋgu ga gapunydja marrtjina ŋanbaw'yurrunana dharyunara, ga ŋurukuy munatha'wuy ŋamuny'tjurruna marrtjina. Mukthurrunaŋga yana dharyurruna‐a‐a, munha ŋupara ga walu ŋupara weyinnha dharyurruna, yana warray dhuwala ga 40 walu mulkana, ga gapunydja marrtjina dhaŋaŋdhinana garrwarthinana, bena wirrkina monyguŋalana wäŋanydja ŋarakanydja, warrpam'nha dhikana guḻwuḻyurrunana. Ga bukmaknha nhä malanha liŋguna murrmurryurrunana marrtjina, yolŋu ga wäyin ga be nhä malanha warrpam'nha dhiŋgaŋala, ŋurru‐ḻupthurrunana. Yurru ŋayinydja ŋunhi marthaŋanydja mukthurruna warray yukurrana bungaŋala, ŋurr'yurruna warray; ŋunhina yana liŋgu walŋathinanydja, Nowa ga wiripuwurru ŋunhi walala ŋunha marthaŋaŋura nhinana yukurrana, walalana walŋamirrinydja.
24 Ga gapunydja ŋunhi yukurrana bänina mukthurruna waŋgany rulu ŋaḻindinydja ŋupara, yakaŋga yana nyimdhurrunanydja.