1 Yo, ŋunhi dhuŋgarra marrtjina djuḻkthu'‐djuḻkthurruna, ga ŋayinydja ŋunhi * AbramYipuramdja dhuŋgarra nhanŋunydja 99‐nha, bala ŋayi Garray ŋayipi biyapul maḻŋ'thurruna nhanŋu, ga waŋana bitjarra, “Ŋarranydja dhuwala God Waŋarr Ganydjarr‐ḏumurru. Märraŋa ŋarranha dhäruktja, bala djämana märr‐yunupathiya yana. 2 Ŋarra yurru dhawuny'tja nherraṉ nhokalana. Nhuŋu ŋarra yurru wekama yothu'nha, bala yurru nhokalanydja mala marrtji guḻku'thirrina wal'ŋu, ga dhuwalayi dhawuny'tja yurru walalaŋgu dhärra yukurra, bitjanna liŋguna yurru.”

3 Bala ŋayi Yipuram ṉepaḻ‐nyilŋ'thurrunanydja muḻkurrnydja munatha'lili, bala buku‐ŋal'yurrunana yukurrana nhanŋu Godku. Ga ŋayi Godtja waŋana nhanukala bitjarra, 4 “Dhuwalana dhawuny'tja wekamana ŋarra yukurra nhuŋu. Nhenydja yurru guḻku'wuna dhuwala bäpa'mirriŋu malawu ga malawu. 5 Nhenydja yurru yakana yäku Yipuramdja; yäkunydja nhe yurru yuṯanydja † AbrahamYipurayimnha, liŋgu dhuwalayinydja mayali' yuṯanydja yäku bäpa'mirriŋu guḻku'wuna miṯtjiwu, ga yuwalknha nhe yurru ŋunhi bäpa'mirriŋu guḻku'wuna miṯtjiwunydja. 6 Nhokuŋu mala‐wunharanydja ŋuliŋuruyi yurru guḻku'na dhaŋaŋnha wal'ŋu mirithirrina, ga ŋuliŋuruyi nhokala yarraṯaŋuru yurru wiripunydja yolŋu ŋurru'‐ŋurruŋuna.

7 “Yo, dhuwalana dhawuny'tja ŋunhi ŋarra yukurra dhawu'‐nherraṉ nhuŋu yurru dhärrana yana bitjanna liŋguna, bitjanna gam'. Ŋarranydja yurru nhuŋu God Waŋarr, ga Waŋarr God ŋarra yurru ŋuriki walalaŋgu ŋunhi yurru nhokuŋu mala‐bunhara maḻŋ'thun yukurra. 8 Nhinanydja nhe yukurra dhuwala dhiyala wäŋaŋuranydja ‡ CanaanGaynandja mulkuruna, yurru wekamanydja ŋarra yurru nhumalaŋguna dhuwalayi wäŋanydja; bukmak dhuwalayi wäŋanydja yurru ŋurikina walalaŋgu nhokalaŋuwuna miṯtjiwu. Ga ŋarranydja yurru walalaŋgu Godnha, ga walalanydja yurru yolŋu walala ŋarrakuwaynha.”

9 Bala ŋayi ŋuliŋuruyinydja God waŋana Yipurayimgala bitjarrana, “Dhiyakuyinydja dhawu'wu nhe yurru buku‐yoramana yana märramana, nhe ga yolŋu'‐yulŋuyu nhokala ŋunhi yurru maḻŋ'thu‐maḻŋ'thun marrtji yalala, 10 ga bitjan nhuma yurru yoramanydja gam'. Bukmak nhuŋunydja mala yurru bitjandhina mitthunmirri, bitjan ŋuli yolŋu'‐yulŋuyu ḏarramukuma mitthun, bitjan ḏarrtjalkkumana yolŋunha, yurru dhuwalanydja ḻakarama yukurra wiripu mayali', wiripu warray; dhuwalanydja mayali' balanyara bitjan nhumanydja yurru mala ŋarrakuna, ga ŋarra yurru nhumalaŋgu Waŋarr God. 11-12 Bukmak ŋunhi ḏarramuwurru nhuŋunydja mala ŋunhi yukurra nhina dhiyaŋu‐wala dhuwala yurru bitjandhiyina mitthunmirri yukurra, ga ŋunhi yurru yothu nhokala malaŋura dhawal‐wuyaŋirri, ga 8‐mirri ḏaykun'mirri ŋunhiyi yothu, bala ŋanyanydja nhuma yurru bitjandhiyina mitthun. Ga biyapul nhuŋu djämamirrinhanydja walalanha yurru bitjandhi liŋgu mitthundhi, ga walalaŋgu djamarrkuḻi'nha ŋunhi walala yukurra yurru dhawal‐wuyaŋirri, 13 liŋgu ŋunhiyinydja mim'punydja rumbalŋura ŋunhi ḻakarama yukurra yurru ŋarraku dhawu'na, ŋunhi yukurra yurru djingaryunna yana‐wala. 14 Ŋunhi yurru ŋula yol yolŋu yakaŋuwuynydja mitthunara ḏarrtjalkkunhara, ŋunhiyinydja yakana ŋayi ŋarraku yolŋu, liŋgu ŋuruŋuyinydja mim'puyunydja ḻakarama yukurra yolŋuwala, ŋunhiyina ŋarrakunydja yolŋu ga ŋarra nhanŋu Waŋarr God,” bitjan. 15 Ga biyapul ŋayi God waŋana Yipurayimgala bitjarra, “Yakana nhe yurru biyapul yäku ḻakarama nhuŋuway dhäyka § SaraiSaray bitjandja, yuṯana ŋayi dhuwali yäkunydja * SarahSarana. 16 Ga ŋarrapi ŋanya yurru goŋmirriyamanydja, yolŋukumanydja gäma galkikumanydja; ŋayi yurru dhiyaŋiyi Sarayu gäma yothu'nhana, waku'mirriŋunha ḏarramunha. Yo, dhipuŋuruyinydja nhanukalanydja yurru marrtji guḻku'thirri yolŋu walala maḻŋ'thun miṯtji ga miṯtji, ga wiripunydja yurru dhipuŋuruyi buŋgawamirrina, buŋgawana walala.”

17 Bala ŋayi ŋuliŋuruyinydja Yipurayim ṉepaḻ‐nyilŋ'thurrunana bukumirriyaŋala, ŋunhi munathany'tja ŋayi dhanu'yurruna muḻkurryunydja. Bala ŋunhiliyi ŋayi nhanukala beyarrmakthinana, bala ŋayi gitkitthurrunana Yipurayim, guyaŋina ŋayi bitjarrana, “Dhuwala ŋarra worruŋuna yolŋunydja, 100‐mirrina dhuŋgarramirri, ga nhaltjanna ŋarra yurru walkurmirriyirrinydja dhika? Ga ŋunha miyalk ŋarraku Saranydja 90‐mirrina dhuŋgarramirri, ga balanyarayi liŋgu ŋayinydja ŋunhayi worruŋuyi yana yothu'wu gänharawu.” 18 Bala ŋayi dhunupana Yipurayimdhunydja dhä‐wirrka'yurrunana ŋanya Godnha bitjarra, “Ga nhämirri ŋuli ŋunhi † IshmaelYitjmayilyunydja goŋdhu märraŋu nhä malanha ŋarrakuŋu; ŋunhiyi dhawu' ga girri' malanha nhe ŋarraku wekaŋala. Dhuwalanydja malanha yurru ŋayina märrama ŋi? . . . Yitmayilyuna?”

19 Ga ŋayinydja waŋana Godtja yaka'yurrunana Yipurayimgala, “Yaka ŋayi Yitjmayilyunydja yurru märrama nhokuŋu,” bitjarra. “Liŋgu Sarayunydja yurru gämana nhuŋuwaynydja yothunha, nhokalaynydja wal'ŋu miyalkthu, ga yäkunydja nhe yurru nherraṉ ŋanya ŋunhiyi yothunha ‡ IsaacYitjak. Ga dhuwalayi yäku Yitjaktja mayali' ‘gitkitthurruna ŋayi.’ Yo, ga ŋunhiyi dhawu' ŋarra nherrara nhanŋuway yana ŋunhiyinydja Yitjakku, ga nhanukalaŋuwu yumurrku'wu, bili dhawu' ŋunhiyi yurru walalaŋgu bitjanna liŋguna‐wala yukurra dhärrana yurru. 20 Ga ŋunha Yitjmayilnhanydja, ŋarra yurru yaka meṉguma ŋanyanydja, liŋgu ŋarra ŋäkula nhuna ŋäŋ'thunara; ŋarra yurru ŋanya goŋmirriyamayi gämayi, ga wekama ŋarra yurru guḻku'nhana miṯtjinha nhanŋunydja, biyapulnha walala yurru ŋurruknha miṯtjinydja dhikana, ga ŋuliŋuruyi yurru nhanukala malaŋuru 12‐nha ŋurruŋunydja wal'ŋu yolŋu'‐yulŋunydja, yurru waŋganynha walala yurru ŋunhiyi malanydja yana bathalana wal'ŋu. 21 Yo, ŋarra yurru yaka ŋula meṉguma ŋanya Yitjmayilnhanydja, yurru ŋunhiyinydja dhawu' yukurra yurru djingaryun nhanŋuway Yitjakku, ŋuriki ŋunhi ŋayi yurru dhawal‐wuyaŋirri Sarawuŋu dhiyaŋu‐wala dhuŋgarrayu.” 22 Ga ŋunhi ŋayi bitjarrayinydja God nhanukala waŋana Yipurayimgala, bala ŋayi gonha'yurrunana ŋanya.

23 Ga ŋuriŋi yana liŋgu Yipurayimdhu dhäruktja ŋanya märraŋala, bala djämana yana ŋunhi nhaltjarra ŋayi Godthu nhanukala ḻakaraŋala. Ŋayipinydja Yipurayimdja bitjarrayi mitthunmina, ga bitjarrayi liŋgu ŋayi Yitjmayilnhanydja mitthurruna, gäthu'mirriŋunhanydja ŋunhi nhanŋuway, ga biyapul djämamirrinha walalanha nhanŋuway, ŋunhi walala yukurrana nhinana wäŋaŋura nhanukala, ŋunhiyinydja walala yukurrana mitthunminayi bitjarrayi, ga mim'puyunydja ŋunhi ḻakaramana yukurra ŋunhi walalanydja ŋunhiyinydja walala nhanŋuwaynha Godkuna yolŋu walala, ga ŋayi walalaŋgu Waŋarr God. 24 Ga ŋayinydja ŋunhi Yipurayimdja 99‐nha dhuŋgarra, 25 ga ŋayi Yitjmayilnydja gäthu'mirriŋunydja nhanŋu 13‐nha dhuŋgarra, 26 ga ŋulinyaramirriyu liŋgu waluyu maṉḏa ŋunhi mitthunmina ḏarrtjalkkunhaminanydja, 27 waŋgany‐manapanmina ŋunhiyina walala djämamirrina walala nhanŋu Yipurayimgu.