2
Bukmaknha yurru nhina waŋganyŋurana boḏinydhirrina
2:1–5 (Everlasting Peace)
1 Yo, biyapul ŋayi Garrayyu wekaŋala dhäruk * IsaiahYitjayawala, ḻakaraŋala yukurrana † JudahDjudawuynha ga ‡ JerusalemDjurutjalambuynha wäŋawuy, bitjarra ŋayi waŋananydja gam',
2 “Buṉbu Godkunydja dhärra yukurra dhiyalamina bukuŋurana,
ga ŋuriŋinydja dhä‐yawar'yunarayunydja waluyu dhuwalayi bukunydja wäŋa yurru biyapul'nha wal'ŋu bena‐wala djuḻkmaramana yukurra wiripu‐guḻku'nhanydja bukunha wäŋanha.
3 Bukmaknha yurru yolŋunydja walala miṯtji ga miṯtji marrtji dhipalayi wäŋalili,
waŋanydja walala yurru yukurra bitjanna, ‘Gul' ŋilimurru marrtjina ŋunhimalayinydja Garraywalanydja bukulili;
ŋilimurru yurru marrtjina bala yana, ŋunhiwalana wäŋalili Buṉbulili Godkalana, ŋunhi ŋayinydja God Yitjuralpuyŋuwuna;
Ŋayina yurru ŋilimurrunha marŋgikuma nhanukalayŋuwuna ŋayi romgu,
märr ŋilimurru yurru marrtjina yana‐wala ŋuliwitjandhinayi nhanukalaynha yana dhukarrkurru.’
Garraywunydja dhäruk ŋuli dhawaṯthun yukurra marrtjina‐wala ŋulaŋuruyi Djurutjalamŋurunydja,
ŋuliŋuruyina ŋayi yurru waŋa yukurra nhanukalaŋuwu miṯtjiwunydja.
4 Yakana yurru biyapul yukurra miṯtji ga miṯtji dhärukthu ŋupanmirri waŋanharamirri bata'yunmirri,
mirithirrina guḻku'na yurru miṯtjinydja yukurra nhina waŋganynha yana wal'ŋu, waŋganynha yana ŋayaŋu.
Bitjan walala yurru walalaŋguway garanydja ŋunhi malanha ḏaw'‐ḏawyunna,
bala ŋuriŋi ŋurruyunydja gayitthu walala yurru yaw'yunna marrtji ŋathawuna ŋula nhäkuna dholkunharawu munatha'na,
märr yurru walala galkaṉ borumdja malanha waŋganyŋurana yanana, waŋganydhuna miṯtjiyu.
Yakana walala yurru biyapulnydja yukurra bunharamirri,
yakana yurru ŋula yol miṯtji ŋulinyaramirriyunydjayi marŋgiyirri bunharaminyarawu.”
5 Yo, nhuma mala‐wunhara ŋunhi § JacobDjaykupkuŋunydja, ŋilimurru marrtji ŋuliwitjan Garraywalana nhanukalaynha djarraṯawun'kurru.