2
Dhäwu'mirriyu Godkala djiwarr'wuyyu yolŋuyu gäŋala dhäwu Yitjuralpuyŋuwu
2:1–5 (The angel of the Lord brought a message for Israel)
1 Bala ŋuliŋurunydja dhurrwaraŋuru ŋayina bunana ŋulaŋuruna lili djiwarr'wuynha yolŋu Garraywuna dhäwu'‐gänharamirri, ga waŋananydja ŋayi bitjarrana ŋurikala * IsraelYitjuralpuyŋuwalanydja yolŋu'‐yulŋuwala, “Ŋarra nhumalanha dhawaṯmaraŋalanydja ŋulaŋurunydja † EgyptYetjipŋurunydja, ga gäŋala nhumalanha dhipala gay' wäŋalili; ŋarra wekaŋalana dhuwala wäŋa nhumalaŋgalana goŋlili, bitjarra yana liŋgu bitjarra ŋarra dhäwu'‐nherrara ŋäthili nhumalaŋgalaŋuwala märi'muwala. Liŋgu ŋunhiyi ŋarrakuŋu dhäruk‐nherraṉminyara yukurra yurru djingaryunna yana, bitjanna liŋguna yukurra yurru yana. 2 Ŋarra nhumalanha waŋana raypirri'yurruna yakaŋuwu ḻunduthinyarawu wäŋa‐dhiyakuywu yolŋu'‐yulŋuwu; ŋarra waŋana nhumalanha nhuma yurru yana ḏaw'yun walalaŋgu ŋunhi waŋarr malanha, ga baḏuwaḏuyun ŋunhiyi wäŋa malanha ŋunhi walala ŋuli ŋunhimalayi buku‐ŋal'yunna walalaŋgiyingalaŋuwu waŋarrwu malaŋuwu ŋurikiyi malaŋuwu. Bitjarra ŋarra ŋunhi waŋananydja yukurrana, ga nhumanydja yaka warray mäkiri'‐witjurruna ga märraŋala ŋarranha dhäruk. 3 Yakana ŋarra yurru gukuma nhumalaŋgala ŋunha miriŋunhanydja, walala yukurra yurru nhinana dhiyalana bili, yurru marinydja walala yurru gäma yindi dhipala nhumalaŋgu, liŋgu ŋuruŋu walalaŋgalanydja romdhu nhumalanha yurru galkinyamarama ŋunhimala yätjlilina wal'ŋu romlili.”
4 Walalanydja ŋäkulana ŋuriŋi Yitjuralpuyŋuyunydja dhäruktja ŋunhiyi Garraynha, yurru walala nyä'yunminana gay', wirrkina dhikana walala ŋäthinyaminanydja. 5 Bala dhunupa marrtjina ŋunhi yolŋu'‐yulŋuyunydja ŋuriŋi mundhurrnha wekaŋala, wäyinnha bathara marrtjina, buku‐ŋal'yurrunana yukurrana Garraywuna.
Yitjuralwunydja yukurrana bathalana mari marrtjina, liŋgu walala ŋuli yukurranha buku‐ŋal'yuna wiripuŋuwuna waŋarrwu
2:6–23 (Israel had big trouble when they turned and worshipped other gods)
6-11 Ŋäthilinydja ŋunhi ŋayi ‡ 2:6–11 JoshuaDjatjuwanydja yana walŋa muka, walala ŋunhi yolŋu walala § 2:6–11 IsraelYitjuralpuyŋunydja yuwalkkuŋala wal'ŋu yukurrana buku‐ŋal'yurruna Garraywu, ga dhäŋuru ŋuliŋurunydjayi ŋunhi ŋayi Djatjuwa rakunydhinana, ga mukthurrunaŋga walala yukurrana buku‐ŋal'yurruna Godku. Ga yalalaŋumirriyuna ŋunhalana bala, bala walalanydja ŋanydjaḻa'yurrunana wiripu‐guḻku'wuna waŋarrwu walalaŋgu; walala buku‐ŋal'yurruna ŋurikina yukurrana waŋarrwu ŋunhi goŋbuywuna, ŋunhi walala yukurranha ŋuli * 2:6–11 CanaanGaynanbuyŋu yolŋu'‐yulŋu buku‐ŋal'yunna ŋurikiyina waŋarrwu. Yo, walala yätjthina, ŋayaŋu‐yätjkuŋala Godnhana, liŋgu walala ŋanydjaḻa'yurrunanydja, bala gonha'yurrunana ŋanya Garraynha, ga buku‐ŋal'yurrunanydja yukurrana ŋurikina wiripuŋuwuna waŋarrwu yäkuwu † 2:6–11 BaalBälwuna.
12-15 Yo, walala ḏaḏawyurrunana Garraywala buku‐ŋal'yunaraŋuru, dhiyakunydja Godku, ŋunhi walalaŋgu märi'mumirriŋu walala märr‐ŋal'yuna ŋuli yukurranha, ŋurikinydja waŋarrwu ŋunhi ŋayi dhawaṯmaraŋala walalanha ŋuliŋuru garrpiṉminyaraŋuru romŋuru ŋunhi ‡ 2:12–15 EgyptYetjipŋuru; bilyurrunana walalanydja nhanukala, bala wiripuŋuwuna buku‐ŋal'yurruna yukurrana ŋurikina waŋarrwu walalaŋgu ŋunhi wäŋa‐ŋurikiywuna yolŋu'‐yulŋuwu Gaynanbuyŋuwalaŋuwuna, Bälwuna yäkuwu, ga wiripuŋuwu ŋuriki dhäykawu waŋarrwu § 2:12–15 AsherahYatjarawu yäkuwu walala ŋuli yukurranha buku‐nyilŋ'thuna. Bala ŋayinydja marrtjina Godtja maḏakarritjthinana walalaŋgu Yitjuralpuyŋuwunydja ŋurikinydja miṯtjiwu, bala ŋayi walalanha gonha'yurrunana ŋunhimala, ga yakana ŋayi walalaŋgu yukurrana nyeyaḻ‐nhinana biyapulnydja, ga gumurr‐gungaŋala walalanha yakana yukurrana biyapulnydja. Ga ŋunhi walala wiripu‐guḻkuny'tja yolŋu'‐yulŋu bäpurru' nyäṉ'thurruna Yitjuralpuyŋuwunydja, yanana walalanha bumarana ŋuriŋiyi miriŋuyunydja, liŋgu Garraynydja yakana walalaŋgala gali'ŋura biyapulnydja; gonha'yurrunana ŋayi yana walalanha, liŋgu walala nhanukala ŋanydjaḻa'yurruna, ga gonha'yurruna walala ŋanya Garraynha. Bala walala yukurrana nhinananydja yindiŋurana mariŋuranydja, galŋa‐yätjthinyamirriŋurana; wirrkina walala galŋa‐yätjthinanydja dhika.
16-17 Bala ŋayi Garrayyunydja walalanha nhäŋala, ga wekaŋala ŋurruŋunhana yolŋunha walŋakunharawu walalaŋgu ŋuliŋuru miriŋuwalanydja goŋŋuru. Yurru walalanydja ŋunhi Yitjuralpuyŋunydja bäpurru' yolŋu'‐yulŋu yakana mäkiri'‐witjurruna ga dhäruk‐märraŋala ŋunhinhanydja walalaŋguwaynydja wal'ŋu ŋurruŋunha, ŋunhi Godthu ŋayipi gathara walalaŋgu walŋakunharawu; walalanydja yana mukthurruna yukurrana buku‐ŋal'yurruna ŋurikala wiripu‐guḻku'wala waŋarrwala, yakana walala yukurrana dhärukku malthurruna nhanŋuwaynydja Garraywunydja, ŋunhi ŋayi dhäruk nherraṉmina.
18-19 Yo, Garrayyunydja ŋuli guŋga'yuna walalanha guḻku'mirri, walŋakunha walalanha ŋuli miriŋuwala, ga walalanydja yukurranha ŋuli nhinanha ŋamathanha‐wala yana, ŋunhi walalaŋgu buŋgawa yukurranha ŋuli walŋa nhinanha, liŋgu Garraynydja walalaŋgu ŋuli yukurranha mel‐wuyuna wirrki wal'ŋu, bili walala ŋuli yukurranha nyä'yunminya, galŋa‐miḏikinya nhinanha ŋunhiliyi goŋŋura ŋurikala miriŋuwala. Ga ŋunhi ŋuli walalaŋgu yolŋu ŋunhi ŋurruŋu bäyŋuthinya rakunydhinya, bala walalanydja ŋuli balayi ŋanydjaḻa'yuna, ŋunhimalayi liŋgu ŋäthiliŋulili romlili. Ga bulunydja walala ŋuli djäma wirrkina wal'ŋu yätj, yakana balanyara bitjan ŋunhi ŋäthili walala yukurrana djäma; bitjana liŋgu yana walala ŋuli buku‐ŋal'yuna wiripuŋuwu waŋarrwu walalaŋgu. Yakana walala ḏaḏawyurrunanydja ŋuliŋuruyi mokuywalanydja dhukarrŋuru, yana walala yukurrana nhinana ŋayaŋu‐ḏälmirrina, liŋgu walala ŋapa‐nherraṉminana, ŋuyulkthinana yukurrana Godkunydja, ga malthurruna yukurrana walalaŋgiyingalaŋuwuna walala dhukarrwu.
20-23 Bala Garraynydja walalaŋgu ŋuli maḏakarritjthinyana ŋuriki Yitjuralpuyŋuwunydja, ga waŋanha ŋuli bitjana gam'. “Liŋguŋga ŋarra romdja nherrara ga dhawu'‐nherraṉminanydja nhumalaŋgalaŋuwala märi'muwalanydja walalaŋgala, yurru walalanydja dhuwala nhä? . . . raypirri'‐waḏatjmirrina walala? Yakana walala ŋarrakunydja dhärukku malthurruna yukurrana. Yo, ŋarranydja yurru yakana gukuma dhuwalanhanydja walalanha wäŋa‐dhiyakuynhanydja yolŋu'‐yulŋunha dhipuŋurunydja wäŋaŋuru; ŋulawitjan walalaŋgalaŋukurrunydja ŋarra yukurra yurru nhämana, ga maḻŋ'maramanydja ŋunhiyi Yitjuralpuyŋunhanydja, wanhaka walala yurru ŋarrakuway malthun, wo bäyŋuna.” Bala ŋayi yuwalkthi Garrayyunydja yakana gukuŋala ŋunhi wiripunhanydja miṯtjinha yolŋu'‐yulŋunha, gonhana walala yurru yukurra nhina ŋunhilina bili mukthunna; yakana ŋayi biyapul walalanha gukuŋala ŋuliŋuruyi wäŋaŋuru, bitjarra ŋayi ŋunhi ŋäthili gukuŋala yukurrana.