1 Dhuwala ŋunhi dhäruk ŋayi Garrayyu wekaŋala * JeremiahDjiramayawala, ŋayi waŋananydja ŋanya bitjarra, 2 “Marrtjiya bala ŋunha Godkala Buṉbulili, ga dhärriyanydja galki wal'ŋu yana dhurrwaraŋura ŋunhili ḻoḻuŋura, ga ŋunhalayinydja nhe yurru ḻakarama wirrkina wal'ŋu dhä‐warrwarnha yolŋu'‐yulŋuwalanydja, dhuwalana dhäruk gam'. 3 Mäkiri'‐witjurra ŋamathaŋa wal'ŋu dhiyaku dhärukku Garraywalaŋunydja, bukmak nhuma yolŋu walala ŋunhi nhuma ŋuli marrtji buku‐ŋal'yunarawu dhipala. Yo, Garrayyunydja nhumalanha yukurra waŋa bitjan gam'. Gonha'yurrana nhuŋuway dhuwali dhukarrnydja. Bilyurrana ga djäma ŋamakurru'na wal'ŋu, bala nhuma yurru nhinana yukurra mukthunna dhiyaliyi wäŋaŋuranydja. 4 Yolŋunydja walala ŋuli waŋa bitjanna, ‘Dhuwalanydja wäŋa yurru dhärra yukurra mukthun warray, yaka warray yurru ŋula yolthu baḏuwaḏuyun, liŋgu Garraywu dhuwalanydja Buṉbu nhanŋuway dhiyalaŋuminydja.’ Yurru dhuwalayinydjayi dhäruk ŋula nhäna mayali'‐wilkthunaramirrina, yaka dhiyakuyi mäkiri'‐witjurranydja ga märr‐yuwalkthiyanydja.

5 “Ḏaḏawyurrana walala dhipuŋuruyinydja djämaŋuru yätjŋurunydja, ga nhiniya ŋamathaŋana wal'ŋu, ga djäma marrtjiya rom‐waŋganydhiya yana. 6 Yaka ṉiṉ'ṉiṉmaraŋa ŋunhiyi ŋurruwuyknhanydja yolŋumiriwnhanydja ga mulkurunhanydja, ga yaka buŋa yolŋunha ŋunhi ŋayi yaka djäma ŋula nhä yätjkuŋala. Ḏaḏawyurrana ŋuliŋuruyinydjayi buku‐ŋal'yunaraŋuru wiripuŋuwalanydja waŋarrwala, gonha'yurrana gupaḏalkuŋana warrpam'thurrana, liŋgu ŋuriŋiyinydjayi romdhu nhuna yukurra baḏuwaḏuyunna. 7 Yo, ŋuli nhuma yurru dhäruk märramanydja ŋarranha, bala ŋarranydja yurru nhumalaŋgala bitjan warray liŋgu galki yana, ga nhinanydja nhuma yukurra yurru gupaḏalnha‐wala yana dhiyalayinydja wäŋaŋura ŋunhi ŋarra wekaŋala nhumalaŋgalaŋuwu märi'muwu.

8 “Nhumanydja ŋuli guyaŋirri yanapi nhuma yurru nhini yukurri ŋamathaŋu walŋamirri, liŋgu Godku Buṉbu dhiyalaŋumi. Yakana yurru ŋuriŋi Buṉbuyunydja nhumalanha walŋakuma. 9 Bitjanna liŋgu nhuma ŋuli manaŋirrina yukurra, ga bumana yolŋunha murrkay'kumana. Bothirrina nhuma ŋuli yukurra ḻakarama dhäwu', ga marramba'na dhika nhäna djäma, ga buku‐ŋal'yun † BaalBälwuna ga wiripuŋuwuna waŋarrwu, maḏayin'kuna dhika nhäkuna. 10 Ga ŋuliŋurunydja nhuma ŋuli marrtji, ga dhärra ŋunhili ŋarrakala buṉbuŋura, ga waŋa bitjanna, ‘Ŋanapurrunydja dhuwala manymakmirri wal'ŋu, Godku yana yolŋu walala nhanŋuway.’ Yurru mukthun warray yana nhumanydja ŋuli djäma yätj warray wal'ŋu. 11 Nhä dhika ŋarrakunydja Buṉbu? . . . djuḻuḻ'yunarawu ŋuriki manaŋganmirriwu yolŋu'‐yulŋuwu? Liŋgu ŋarranydja nhäŋala nhumalaŋgu rom, yaka nhe yurru djuḻuḻ'maranharamirri ŋarrakalanydja.

12 “Ŋäthilinydja ŋunhinydja yolŋu'‐yulŋu ŋuli buku‐ŋal'yunna ŋarraku ŋunhala ‡ ShilohDjälaw wäŋaŋura. Marrtjiya ŋunhawalayi walala, ga nhäŋanydja ŋunhiyi wäŋa ḏaw'‐ḏawyunarana warrpam'puynha muṉguykunharana. Ŋarrapi ŋunhinydja baḏuwaḏuyurruna bitjarrayinydja, liŋgu ŋuriŋi yätjthu ŋarrakalaŋuwala yolŋu'‐yulŋuwala. 13 Ga nhumanydja dhuwala balanyarayi liŋgu dhuwurr‐yätjmirriyi, bitjan walala. Bitjarra liŋgu ŋarra nhumalanha yukurrana waŋananydja, ga nhumanydja yaka warray mäkiri'‐witjurruna ŋarraku; ŋarra gawaw'yurruna nhumalaŋgu, yurru yakana nhuma buku‐ruŋinyamaraŋalanydja waŋana ŋarraku. 14 Nhumanydja waŋa ŋuli yukurra bitjan, ‘Dhuwalanydja yurru wäŋa ŋanapurruŋguwaynha yanana gupaḏalŋuwuna‐wala, liŋgu Godthu wekaŋala dhuwalayinydja wäŋa be ŋäthili märi'muwala ŋanapurruŋgalaŋuwala, ga dhuwalana gay Godku Buṉbunydja dhiyalaŋumina,’ bitjan nhuma ŋuli waŋa, yurru ŋarranydja yurru baḏuwaḏuyunna dhuwalayi Buṉbunha, bitjandhi yana liŋgu bitjarra ŋarra baḏuwaḏuyurruna ŋunha Djälaw wäŋa. 15 Ŋarra yurru ŋaŋ'‐ŋaŋdhunna nhumalanha gukumana‐wala yana dhipuŋurunydja wäŋaŋuru, bitjan yana liŋgu bitjarra ŋarra ŋaŋ'‐ŋaŋdhurruna gukuŋala ŋulaŋuru Djälawŋuru nhumalaŋgu märi'munha walalanha.” Ga dhuwalayina dhäruk ŋayi Garrayyu wekaŋalanydja ḻakaranharawunydja.

16 Ga biyapul ŋayi Garray waŋana bitjarra Djiramayawala, “Djiramaya, yakana biyapulnydja yukirriya bukumirriyaŋa dhiyaku yolŋu'‐yulŋuwu; yakana ŋäŋ'thurra ŋarranha walalaŋgu walŋakunharawunydja. Ŋarra yurru yakana nhuŋu mäkiri'‐witjundja. 17 Nhenydja marŋgi muka walalaŋgu, ŋunhi walala yukurra djäma ŋula nhä rom malanha yätj yana dhiyala § JerusalemDjurutjalamdja, ga bukmakŋura * JudeaDjudiya buku‐ḻiw'marama. 18-19 Djamarrkuḻi'yunydja ŋuli marrtji galkaṉ ŋultjiŋu gurtha, ga bäpa'mirriŋuyunydja walalay ŋuli dhuŋgur'yunna, märr yurru miyalkthu walalay yukurra ŋathana bathan malanha buku‐ŋal'yunarawu ŋuriki nhäŋiniŋ'kuna waŋarrwu; rrambaŋikuma yana walala ŋuli buku‐ŋal'yundja wekama ŋatha ŋunhiyi ga gapu ŋurikiyi wiripuŋuwunydja waŋarrwu. Walala ŋuli bitjandhinydja djäma ŋarrakuna ŋayaŋu‐yätjkunharawu, yurru yuwalktja ŋunhi walalanhawuy walala yukurra ŋayaŋu‐yätjkunharamirri ŋuriŋiyinydja malaŋuyu romdhu. 20 Ga dhiyakuyinayi märrwu ŋarra yurru dhuwala baḏuwaḏuyunna yana wäŋanhanydja; ŋarraku ŋaramurrnydja yurru nhärana yanana, bitjanna bitjan gurtha, baḏuwaḏuyunna yurru warrpam'nha yana yolŋu'‐yulŋunhanydja ga wäyinnha ga dharpanha dhika nhänha.” Bitjarra ŋayi Gunhu' God waŋananydja.

21-23 Ga biyapul ŋayi waŋana bitjarra, “Yaka ŋarra ḏukṯuk nhumalaŋgalaŋuwu wetjkunydja, ŋarranydja ḏukṯuk nhumalaŋguway yana, ŋayaŋuwu nhokalaŋuwu. Ŋarranydja ḏukṯuk nhuma yurru dhäruk märrama ŋarranha, märr yurru nhumanydja ŋarrakuway yana yolŋu'‐yulŋu, ga ŋarra yurru nhumalaŋgu waŋarr God; nhuma yurru nhinanydja ŋamathama yana wal'ŋu, ŋunhi nhuma yurru marrtji ŋarrakalaŋukurrunydja romgurru. 24 Yurru dhuwalanydja walala yolŋu'‐yulŋu yaka warray dhäruk ŋarranha märraŋala, yaka walala yukurrana mäkiri'‐witjurruna ŋarraku, yana walala ŋuyulkthina, ŋapa warray wekaŋala ŋarrakunydja, bala malthurruna ŋunhana‐wala walalaŋgalaŋuwuna walala romgu ga djälwu djarrpi'wuna. 25-26 Yo, ŋarra djuy'yurrunanydja ŋarrakuway ŋarra yolŋunha walalanha, ga bitjarra liŋgu walala yukurrana ḻakaraŋalanydja ŋarranha nhumalaŋgu, yurru yakana ŋula yol mäkiri'‐witjurrunanydja walalaŋgu, yana warray nhumanydja mäkiri' warray dhaḻ'yunmina ŋänharaŋuru.

27-28 “Yo Djiramaya, ḻakaraŋa yolŋu'‐yulŋuwalanydja dhuwalayina dhäruk, yurru walalanydja ŋunhi yaka warray yurru mäkiri'‐witjun nhuŋu, liŋgu walala ŋunhi djarr'yurrunana yulŋunydja, ŋunhi walalanydja yurru yakana dhäruk märrama ŋarranha. Yakana walala ḏukṯuk marŋgiyinyarawu, ga yakana walala yurru malthun yuwalkkunydja wal'ŋu.

29 “Wäŋa Djurutjalam, ŋäthiya ga galŋa‐yätjthiya, liŋgu nhumalanha Garrayyunydja gonha'yurruna liŋguna. Yo, Godtja ŋuli yukurra ŋuyulkthirri ŋurikiyi dhukarrwu nhumalaŋgalaŋuwu yolŋu'‐yulŋuwalaŋuwunydja, bala ŋayi ŋapana‐wekaŋala nhumalaŋgu liŋguna. 30 Yo, Garray yukurra nyinyaŋdhun, ŋapa‐nherraṉmirrina wal'ŋu ŋurikiyinydja nhumalaŋgalaŋunydja waŋarrwu, maḏayin'kunydja dhika nhäkunydja malaŋuwu, yurru nhumanydja gäŋala ŋunhiyina malanha be nhäna nhäŋiniŋ'nha wal'ŋu yana, bala nherrara ŋunha ŋarrakala warray Buṉbulili. Ŋarranydja dhuwala ḏarrtjalk yana gal'ŋu, gäna ŋarrapi, ŋarra yukurra mel‐djaw'yunmirri ŋuliŋuruyinydja nhäŋuru malaŋuŋuru. 31 Ga bitjandhi nhuma yukurra ŋuli ŋal'‐ŋalmarama barŋdja malanha ŋapa‐waṉarra'lilinydja wäŋalili, bala mundhurr‐wekamana nhumalaŋguway yumurrku'nhana, bitjan mundhurrnha bathan ŋurikiyina waŋarrwu gurthalilinydja. Yaka ŋarranydja wekaŋala rom ŋunhiyi nhumalaŋgu balanyarayinydja. 32-34 Bala nhumanydja yurru murrmurryunna‐wala yana warrpam'thunna, ga dhuwalayi wäŋanydja yurru dhäparknha yolŋumiriwnha, wiraŋnha yanana. Yakana biyapulnydja yurru walala yolŋu'‐yulŋu marrtji miyaman ŋuliwitjandhi dhukarr‐ŋupan ŋoy‐djulŋithirrinydja; yakana yurru ŋula yol yolŋu galŋa‐djulŋithirrinydja ŋunhili nhina wäŋaŋura.” Ga bitjarra ŋayi Garray waŋananydja.