19 Yo, bala ŋayi Garray ŋarraku waŋa bitjan, “* JeremiahDjiramaya, marrtjiya ga dhärriya ŋunha ya' dhurrwaralili wal'ŋu ḻoḻulili † JerusalemDjurutjalamlili wäŋalili. 20-21 Ḻakaraŋa walalambala ŋuripa ŋurru'‐ŋurruŋuwa buŋgawamirriwa ga bukmakpa yolŋu'‐yulŋuwa ŋunhi walala yurru yukurra marrtji balayi ŋunhiwalayi wäŋalili gulŋiyirri, ḻakaraŋanydja walalambala biyaka, ‘Ŋäka walala, mäkiri'‐witjurra dhärukku Garraywalaŋuwu. Ŋuli nhuma djäl nhinanharawu walŋamirriwunydja wal'ŋu, nhe yurru ŋämana ga dhäruk märrama. Yaka djäma yukirriya ŋula nhä ŋuriŋi dhulŋuŋuyunydja waluyu; 22 ŋunhiyinydjayi walu gäna wal'ŋu yana ganaŋ'thun yukurra ŋarrakuway dhulŋuŋu. Yaka yana nhe yurru djäma ŋuriŋiyinydjayi waluyu ŋula nhä birrka'mirri. Liŋgu ŋarra ŋunhiyinydja ḻakaraŋala ŋäthili nhumalaŋgalaŋuwu märi'muwunydja walalaŋgu, 23 ga walalanydja ŋunhi mäkiri' warray dhaḻ'yunmina, yaka warray ŋäkula. Yo, ŋunhiyi nhumalaŋgu märi'mu walala yaka yukurrana mäkiri'‐witjurruna, ga yaka dhäruk märraŋala ŋarranha, yaka walala ḏukṯukthina marŋgithinyarawu.’ 24 Yo, ŋunhi nhumanydja yurru dhäruk märrama ŋarranha, ga yaka djäma ŋuriŋiyinydjayi waluyu dhulŋuŋuyunydja, ŋunhi nhe yurru ganaŋ'marama ŋunhiyi walu ŋarrakuway wal'ŋu dhulŋuŋu, 25 bala nhumanydja yurru ŋurru'‐ŋurruŋunydja yolŋu walala ga miṯtji nhina yukurra dhiyala ŋamathamana yanana, ga dhuwalanydja wäŋa yurru yukurra dhärra bitjanna liŋguna gupaḏalnha‐wala. 26 Ga yolŋu'‐yulŋu yukurra yurru marrtji lili birrka'mirriŋuru ḻiw'marama, gäma marrtji wäyin ga buŋgan bäw' dhika nhä malanha mundhurrnydja wekanharawu Garraywu ŋunhili Godkala Buṉbuŋura. 27 Ga ŋunhi nhuma yurru yakanydja mäkiri'‐witjun ŋarraku, ga djäma nhuma yurru mukthundja ŋuriŋi waluyu; ŋuli nhuma yurru yaka ganaŋ'marama ŋunhiyi walu ŋarrakuway dhulŋuŋu, bala ŋarranydja yurru yana dhuŋgur'yunna dhuwala dhurrwaranydja gurthayuna; dhuwalayinydja yurru nhumalaŋgu dhapirrktja buṉbu malanha dhuŋgur'yunna gurthayuna yanana, ga yakana yurru ŋula yolthu ŋultjikumanydja gurthanha ŋunhiyi.” Bitjarra ŋayi Garray waŋananydja.