20
Djiramayanydja marililina gulŋiyina, liŋgu ŋuriŋi nhanukalay dhäwu'yu ḻakaranhara
20:1–6 (Jeremiah in trouble because of his preaching)
1 Ga wiripunydja yolŋu yäku * PashhurBatja ḏalkarra'mirri yolŋu, ŋayi ŋäkula ŋarranha ŋunhi ŋarra yukurrana ḻakaraŋala bitjarra, “Marinydja yurru marrtji bathala wal'ŋu yana, liŋgu ŋuriŋi yolŋu'‐yulŋuwala yätjthu djämayu.” 2 Ŋayi ŋäkulanydja ŋarranha bitjanarayi, bala ŋayi ŋaramurryinana maḏakarritjthinana ŋarraku, bala ŋayi waŋana miriŋunhana walalanha, bala walala marrtjinanydja ga märraŋalana ŋarranha, ga bartjunmaraŋalana. Bala walala ḏapṯapmaraŋalana yukurrana ŋarranha raki'yuna, djalkiri ŋarraku ga goŋ maṉḏanha, ga nhinananydja ŋarra yukurrana Buṉbuŋurana galki dhurrwaraŋura ḏapṯapmaranharana munha‐ŋupanara. 3 Ga goḏarr'mirrinydja wiripuŋuyuna munhayu ŋayi ŋunhiyinydja ḏalkarra'mirri marrtjina, bala yupmaraŋalana ŋarrakala rakiny'tja, bala ŋarra ḻakaraŋala nhanukala bitjarrana, “Garrayyunydja wekaŋala yuṯana nhuna yäkunydja, dhuwalana gam', ‘Barrari ḏumurruna’ nhe yäkunydja. 4 Yo, Garray ŋayipi bitjarrayinydja waŋana, ‘Dhuwala gay' ḏarramu ga bukmak nhuŋu gurruṯu'mirri walala yurru nhinanydja yukurra barrarirrina yanana; walala yurru burakirrinydja yukurra miriŋuwuŋu mandjawakthuna yana. Buŋgawa yurru ŋurukuy † BabylonBapilunbuynydja marrtji lili, bala ŋarra yurru wekamana yolŋu'‐yulŋunhanydja nhanukalana goŋlili warrpam'thuna; wiripunhanydja ŋayi yurru miṯtjinha buma, ga wiripunhanydja miṯtjinha ŋayi yurru yana djaw'‐djawyunna bitjanna bitjan djämamirrina walala nhanŋu. 5 Ga bitjandhi liŋgu walala yurru miriŋuyunydja ŋuriŋiyi marrtji djaw'‐djawyunna dhipuŋuru ḻatju'mirrinydja dhikanydja wal'ŋu girri' malanha warrpam'thunna, walalaŋgalaynha wäŋalili yurru djaw'‐djawyun. 6 Ga bitjandhi liŋgu nhunanydja yurru djaw'yundhi Batja ga nhuŋu gurruṯu'mirrinha, walala yurru gämanydja nhumalanha balayina Bapilunlilina, ga nhinanydja nhe yurru yukurra ŋunhiliyi weyinŋumirrina, yana liŋgu ga rakunydhirri nhe yurru, ga dhaḻkaramanydja nhuna yurru walala ŋunhalayinayi, rrambaŋikumana nhumalanha nhuŋu ḻundu'mirriŋunhana walalanha, ŋunhina walalanha ŋunhi walalaŋgala nhe yukurrana ḻakaraŋala bothinyarayŋu dhäwu'.’ ” Ga bitjarra ŋayi Garray waŋananydja.