Aba Vatowo
Kaga liliuna adi kaba vatowo tetelina
Livala Aba Vaita
Buki ame yoina Aba Vatowo go, ana togínina Mosese. Ame bukiyana goi kaga liliudi adi kaba vatowo tababanedi. Nakae yoguyogu, íyana, alova, náuna, goyo, ámasa, Isileli tubunao be nakae kita tomota liliuda ada kaba vatowo.
Ame bukiyana goi goyo be nakae ámasa sisowóduwo kita tomota yaida, tauna ame tutayana Adama be Ivi idi goyo bolotona kita nakae taalotowo. Ego Yaubada mana nuwokapisi tomota ivaiteda. Tauna ame bukiyana goi tagite Yaubada manakaena ada toyava Yeisu ina sowóduwo ikatubayasi.
Tétala Luluna
1. Yaubada ina madágina tetelina 1:1—2:3
2. Goyo ina sowóduwo Yaubada ina madágina goi tetelina 2:4—4:26
3. Adama mana bodao adi liliu 5:1—6:8
4. Nowa tetelina 6:9—11:9
5. Eberam mana bodao tetelidi 11:10—25:18
6. Aisake mana bodao tetelidi 25:19—37:1
7. Yakobo mana bodao tetelidi 37:2—50:26
Yaubada ina madágina tetelina
1
(Aba Vatowo 1:1—2:3)
1 Aba vatowo goi† Iyo 1:1. Yaubada kaga liliuuna iwodugudi,‡ Iwodugudi: Livala ame Isileli tubunao kadi, ‘Bara’ go, Yaubada anetava bara iguinuwe. nakae yábana be poyapoya. 2 Ego poyapoyayana ame geya ana katubayasinamo be nakae daakakaina. Go madabokina bwae dimówana ilatao. Dimowanayana yatanaina goi kokonótuya gagaina ikaaiyaka nakae Yaubada Balomaina‡ Balomaina: Isileli tubunao niyadi goi ame livalayana ana yagoina aito. Tayamo moe baloma, tayamo yawoina, e tayamo yágira. itaakavata.
3 E Yaubada sopana goi imadágina idigo kana,
‘Mavada kusowōduwo!’
E mavadayana isowóduwo.† 2Ko 4:6. 4 Mavadayana igite dedevina, e iuyaone. Imadagi ikavava, mavada be kokonótuya ikiwotaidi, e mavada ituli, kokonótuya ituli. 5 E mavadayana ivayou maliyalina go, kokonotuyayana ivayou sabamgo.
Lavilavi ima namliyeta nobuyana ima.
Moe maliyalina vakuumgoina bogina ikavava.
6 E Yaubada sopana goi imadágina idigo kana,
‘Sekulapeya kusowōduwo go, bwae kuwotāi.’† 2Pi 3:5.
7 E tauna nakae isowóduwo. Sekulapeyayana isowóduwo, e bwaeyana iwotai. Bwae diligaema ituli, bwae ditonema ituli. 8 Sekulapeyayana ivayoko yábana.
Lavilavi ima namliyeta nobuyana ima.
Moe maliyalina aiyuwoina bogina ikavava.
9 E Yaubada sopana goi imadágina idigo kana,
‘Bwae ditonema, kōna dadava tayamo goi kolamgōgana bei dadava tayamo sayasayaina isowóduwo!’
E tauna nakae isowóduwo. 10 Imadagi ikavava, dadavayana sayasayaina ivayoko poyapoya go, bwaeyana ivayoko négwasa. Igitedi dedevidi, e iuyaonedi.
11 Aiyuwoina Yaubada idigo kana,
‘Poyapoya, kom goi náuna sisūsuwo go, limou sidīdi be nakae kokowoika keuwoidi sikéuwo, taudi nakae ma kutukutudi.’
E tauna nakae isowóduwo. 12 Poyapoya goi náuna madabokidi nakae sisúsuwo. Yaubada igitedi dedevidi, e iuyaonedi.
13 Lavilavi ima namliyeta nobuyana ima.
Moe maliyalina aitonina bogina ikavava.
14 E Yaubada sopana goi imadágina idigo kana,
‘Aba mavada yábana osasaina goi kosowōduwo, bei maliyalina nakae sabamgo kowotaidi! Aba mavadayami moe aba kinana maliyalina, tukówana be nakae tala tamo tamo manudi. 15 Komi aba mavada yábana osasaina goi konininīma bei poyapoya koomavade.’
E tauna nakae sisowóduwo. 16 Aba mavadayadi aiyuwo gagaidi iwodugudi, tayamo gagaina toina moe maliyalina iloovinae go, tayamo tupwana giyaina moe sabamgo iloovinae. Go utuna nakae taiyao iwodugudi. 17 Iwodugudi ikavava, yábana osasaina goi iyatoidi bei sininínima poyapoya siimavade 18 be maliyalina sabamgo siloviinaedi be nakae mavada kokonótuya siwootaidi. Yaubada igitedi dedevidi, e iuyaonedi.
19 Lavilavi ima namliyeta nobuyana ima.
Moe maliyalina aivasina bogina ikavava.
20 E Yaubada sopana goi imadágina idigo kana,
‘Négwasa iyaiyanimi badabadaimi kosowōduwo! Nakae mánuwo kosowōduwo, e poyapoya yábana osasaidi goi koyovayōva!’
21 Tauna Yaubada íyana gagaidi be kaga liliuna maa yawoidi be nakae mánuwo liliudi iwodugudi, taudi idi sinapu nakae. Yaubada igitedi dedevidi, e iuyaonedi. 22 E ikaipakuyedi idigo kana,
‘Négwasa iyaiyanimi kosusāila gagaina, e negwasayana kovakayaodēi. Mánuwo nakae, poyapoya goi kosusāila.’
23 Lavilavi ima namliyeta nobuyana ima.
Moe maliyalina ainimaina bogina ikavava.
24 E Yaubada sopana goi imadágina idigo kana,
‘Poyapoya, kom goi kaga liliuna maa yawoidi sisowōduwo, maisidi taudi nakae, yoguyogu daladalaidi, bolitavanu be woiwoi, gagaidi be giyaidi.’
E tauna nakae sisowóduwo. 25 Kaga liliuna maa yawoidi, bolitavanu be woiwoi be nakae yoguyogu daladalaidi iwodugudi go, igitedi dedevidi, e iuyaonedi.
26 E Yaubada sopana goi imadágina idigo kana,
‘Tomota taodugūdi ada tapata, tauyadi kita nakae, e bei íyana, mánuwo, bolitavanu, yoguyogu daladalaidi be nakae kaga liliuna maa yawoidi poyapoya ame goi sikaaiyaka sikalibubudi.’† 1Ko 11:7.
27 Tomota iwodugudi Tauyana toinina ana tapata.
Moitamo, ana tapata iwodugudi.
Tomotayadi koroto be vavina iwodugudi.† Abv 5:1-2; Mad 19:4; Mak 10:6.
28 Iwodugudi ikavava, ibobwarakaipakudi idigo kana,
‘Kosusāila be poyapoya kovakayaodēi, e poyapoyayana koepaisēwe ami dedevina manuna. Nakae íyana, mánuwo be nakae kaga liliuna maa yawoidi poyapoya goi sidaladala kokaliibubūdi.’
29 Kana,
‘Konōve! Náuna kutukutudi liliudi be nakae kokowoika keuwoidi liliudi bogina avinimi moe avami. 30 Woiwoi liliudi gagaidi be giyaidi, mánuwo liliudi, kaga liliuna poyapoya goi sidaladala nakae maa yawoidi, e náuna liliudi avinidi, moe avadi.’
E tauna nakae isowóduwo.
31 Kaga liliuna Yaubada bogina iwoodugudi igitedi madabokina moe dedevidi, e iuyaonedi gagaina.
Lavilavi ima namliyeta nobuyana ima.
Moe maliyalina ainima tayamoina bogina ikavava.