1 Karriburluburlumen nawu Yawey! Ngaye wanjh ngamanjbun Yawey bulkkidj duninjh kore ngaye karriraworren bu karrimirndemornnamerren bininj nawu karrimak kore nungka.

2 Nawu Yawey nakka nakurdumak duninjh. Bininj nawu kabirrikurdunan, wanjh kabirrinjilngmakmen dja kabirridjalburrbun munguyh kore nungka kurdukurduyimeng. 3 Nungka kahdurrkmirri kunmakkenh dja karriburrbun wanjh nungka God nawu king duninjh. Nawu kunmakmak nuye wanjh kadjaldi munguyh munguyh.

4 Nungka kanbukkabukkang ba minj karribengmidjdan kore nungka kurdukurduyimi kundulkarre dorrengh. Nawu Yawey wanjh kandjalmarnedjare dja nungka wernhmimkongiwern duninjh. 5 Nungka kabenwon manme bininj nawu kabirrimarnekele nuye. Dja kadjalburrbun munguyh munguyh manbu benmarnewokkurrmerrinj bininj nuye. 6 Nungka yiman benmarnekukbukkarrinj nuye binihbininj bu benmarnekurduyimi kunwern kundulkarre nuye dorrengh. Kaluk benwong nuye bininj kubolkbubuyika bedberre birribuyika bininj nawu birriyoy. 7 Yawey kakurduyime bu djal kunmak rowk. Kahdurrkmirri kunbidwi nuye, wanjh kamak, dja kadjadme warridj bu djal kunmakkenh. Minj mak kakurren, dja kadjalwokdi bu djal kunwoybuk dorrengh. 8 Bu kakurrme nuye kunwok, wanjh minj kawokyakmen, kadjaldi munguyh munguyh. Minj kakurren dja kadjalyime kunwoybuk duninjh dja kunwok kunmak ba bu karriwokmarrkmang. 9 Nungka benngehkeng bu benbebkeng nuye bininj kore birribongdibeh. Nungka yingkihwokkurrmerrinj ba bu maninjmanu kunwok wanjh kadjaldi munguyh munguyh. Wanjh Yawey nadjalngeymakkaykenh, ba bu karrimarnekele.

10 Bu karrimarnekele nawu Yawey, wanjh kunu karrikodjkuludjadmen. Bininj nawu kabimarnewokmarrkmang, wanjh nakka kamayaliwernmen. Mah, wanjh karridjalburlumen nawu Yawey munguyh munguyh. Job 28:28; Proverbs 1:7; 9:10