1 Haul nöbö mölöu nöbö. Höd ñɨŋ pɨsaŋ mɨdɨm wop aku, nöbö mö God Inöma yuörɨb ñɨŋ kwo mɨd bla ñɨgö yad nölmɨdɨl aku, ñɨgö kwo algör ör yad nöilöxa, jɨ ñɨŋ Krais nugw pön, ha kiaia röxg mɨdmɨdmä. Makwam, ñɨgö mögörɨb il kɨ mɨdmɨdöi nöbö bla, ha kiaia röxg yad nölmɨdma. 2  Hib 5:12-13; 1Pit 2:2Ha kiai kau nɨmmɨdöi mɨdö bla röxg mɨdmɨdmä makwam, nɨ ñɨgö kau akwör nölmɨdma; ñɨŋ ap mag yöbö i pɨ nɨm cökɨb maga mɨdölöŋ makwam, nɨ ap mag yöbö aku ñɨgö nölmɨdölɨm. Mɨdöi wop mɨdö kɨ kwo algör ör, ñɨŋ ap mag yöbö i pɨ nɨm cökɨb maga mɨdöl; ñɨŋ ha kiaia röxg ör mɨdöia. 3  1Kor 1:10-11Mɨdöi wop kɨ kwo algör, ñɨŋ nöbö mö mögörɨb il kɨ rɨg rɨbyöx nugumɨdöi mag akwör ñɨŋ kwo algör rɨbyöx nugumɨdöia. Nöbö mö bli ap ñɨŋ bla ap nɨ bli alɨg mɨdölö rön rɨbyöx nugumɨdöia. Ölɨsö wölɨm, nuö nuö yadmɨdöia. Aliö alön, nöbö mö hör mögörɨb il kɨ rɨmɨdöi mag akwör rɨmɨdöia. 4  1Kor 1:12Ñɨŋ bli yadöia, “An Apolos nöbö mö nuŋwa mɨdölɨŋö,” röia. Bli yadöia, “An Pol nöbö mö nuŋwa mɨdölɨŋö,” röia. Makwam, ñɨŋ hör nöbö mö mögörɨb il kɨ rɨbyöx nugwön yadmɨdöi mag akwör yadmɨdöia.

5  Apos 18:4,11,27-28Apolos an möpia nöbö dib kai röxg mɨdɨm nugwön mönö aku yadmɨdöi? An hör mabö rɨb nöbö rama akwör mɨdöla. Nöbö Diba mabö kai hörɨr yad nɨgöŋ aku rɨ mɨdön, Jisas Krais mönö wä aku yad nölmɨn ñɨŋ nugwön nugw pɨmä.

Nöbö Dib an nöbö hogwa mabö hörɨrör rɨg yadöŋ mag akuyöbö akwör röla. 6 God nɨ yadmɨn, mögörɨb ñɨŋ aku höd ap iña rag wön yuma. God Apolos nugwo yadmɨn, nuŋ mai du röbö un pön hön, ap iñ yum aku höröŋa. Makwam God nuŋwör rɨmɨn wölöŋa. 7 Almɨn, an möpia hör ap iñ yuön, röbö hörön röl aku, ib an aku yadɨŋ bɨl sö duölaŋ. God rɨmɨn wölöŋ aku nugwön, ib nuŋ akwör yadɨŋ bɨl sö diöna. 8  Mat 16:27; Epes 2:20-22Nöbö mö ap iñ yumɨdöi bla, nöbö mö röbö rag hö hör yönmɨdöi bla, mabö iör paŋyöbö i rɨmɨdöi aku mɨ, God mabö rɨg rɨmɨdöi rɨmɨdöi akuyöbö nugwön, ñɨgö paiŋö nöiöna. 9 An nöbö hogwa God mabö aku nɨgiö nɨgön rɨmɨdöl, mabö rɨb nuŋ aku ñɨŋ mɨdöia.

Makwam ñɨŋ God ram nuŋwa mɨdöia. 10 God nɨ uliöxön pɨ ösös rön ap wä nölöŋ aku pön, ram urɨb nöbö nuŋwa mɨdön, ram padö dib mibɨl yöbö aku pɨl gö nɨgmön, mai nöbö i hön ram rɨb rɨb mɨjön akuyöbö rɨmɨda. Makwam nöbö mö bli hön, ram aku rɨb rɨb mɨjön bla cɨnɨŋö, cöñ aku, nugw ri abɨŋ. 11  Ais 28:16; 1Pit 2:4-6God ram nuŋ aku Jisas Krais nugwo padö dib mibɨl yöbö mödö aŋadö pɨl gö nɨg gɨ mɨd aku, nöbö mö bli padö yoŋyöbö i pɨlɨb maga mɨdöl.

12 Jisas Krais padö dib mibɨl yöbö pɨl gö nɨg gɨ mɨd aku, nöbö mö bli, ram rɨb rɨba urɨŋö rön, gol, silpa, rɨg wä wä pön hön wiöña; jɨ nöbö mö bli bɨ löx, wit löx rɨb rɨb, ap panö panö bla pön hön wiöña. 13  1Kor 4:5Makwam Krais hön nöbö mö mönö diba yajön wop aku, mabö rɨ ri aböñ adaku höl riö wöxnö mɨdaŋ nugwön, amnɨmab cöñ adaku höl riö wöxnö mɨdaŋ nugwöña. Bɨ pina hön, mabö ri aböñ aku mɨjöna, jɨ mabö rolrola cöñ aku aŋadö yönu pöraŋ diöna. 14 Padö diba pɨl gö nɨg gɨ mɨd rol aku, nöbö mö mabö rɨ ri abön ram rɨb mɨŋi rɨŋ, rɨn pina hön ram rɨb aku yönuaŋ duen aku, ñɨŋ paiŋö pöña. 15 Makwam nöbö mö bli mabö rorola akwör rön ram rɨb mɨŋi rɨŋ, rɨn pina hön ram rɨb aku yönu pöraŋ diön aku, God ñɨgö kömö pöna, jɨ nöbö mö lɨblɨb mɨdö bla, rama yönaŋ, pɨxɨp du rɨŋö bö abɨŋ, ap mɨdöl nöbö mö akuyöbö röxg mɨjöña mögörɨb nuŋ yör sö.

16  1Kor 6:19; 2Kor 6:16God höjöpalɨb ram nuŋwa ñɨŋ mɨdöia; God Inöma yuörɨb ñɨŋ kwo mɨda. 17 Nöbö i God höjöpalɨb rama rɨ gwogwam rɨmɨjön aku, God nugwo paiŋö aipam rɨ gwogwam cöna. God höjöpalɨb ram aku ram nuŋwa keir. Makwam höjöpalɨb ram nuŋ aku ñɨŋ nöbö mö mɨdöia.

18 Nugw ri aböña. Nöbö mö mögörɨb il kɨ rɨb wä yöx nugw ri abmɨdöi mag akuyöbö, nɨ kwo algör ör rɨb wä yöx nugw ri abmɨdlö, rɨ rɨbyöx nugwöñ aku, ñɨŋ rɨbyöx nugw ri abmɨdölöi. An rɨbyöx nugw ri abmɨdölölɨŋö, rön, rɨb wä hölu nugwön, rɨb wä yöx nugw ri abmɨjöña. 19  Job 5:13Aku agapɨm: nöbö mö mögörɨb il kɨ rɨb wä yöx nugw ri abön yadmɨdöi mönö aku, God nugumɨn, mönö u i röxa. God Mönö aku kai kɨtön yadmä,