3
Jisas nöbö dib; Mosɨs nöbö ulmɨdö
1 Naba 12:7; Hib 4:14; 7:26Haul nöbö mölöu nöbö. God ñɨgö kwo algör ör mönö wä nuŋwa yadmɨn, an God nöbö mö nuŋ keira mɨdöla. Jisas nuŋ God mönö mag wä pön dub Nöbö maku. Jisas nuŋ God Ap Höjöpal Ur Nölɨb Nöbö Dib Ödöriö aku. An Jisas mönö wä nuŋ aku nugw pön, God Mönö rɨg yadmɨd mag akuyöbö cɨnɨŋ aku, Jisas nuŋ öim öim anɨŋ rɨ nöiöna. Makwam, ñɨŋ öim öim Jisas nugwör rɨbyöx nugu gör mɨjöña.
2 Mosɨs nuŋ God mönö yadöŋ aku nugwön, God nöbö mö nuŋ bla pön nugwidɨx mɨd ri abmɨda. Mag aliö akuyöbö algör Jisas nuŋ God mönö yadöŋ aku nugwön magalɨg rɨ ri aböŋa. God nuŋ Jisas nugwo mabö aku yad nɨgöŋa. 3 Nöbö i ram ur nɨgön aku, rama iba yadɨŋ bɨl sö duen; nöbö rama ur nɨgön nöbö aku nuŋwör ib nuŋwa yadɨŋ bɨl sö diöna. Mag aliö akuyöbö, God nuŋ Mosɨs nugwo pɨ ri abmɨn, nöbö mö Mosɨs nöbö dib me rɨmɨdöia; jɨ Jisas ib dib ödöriö mɨd aku, nöbö mö ib nuŋwa yadɨŋ bɨl sö duaŋ. 4 Hölɨmɨb ram i hör wöxnö nɨgöl; nöbö i ur nɨgɨm mɨda. Mag aliö akuyöbö, ap agap apɨm mɨd akuyöbö magalɨg God nuŋ rɨ nɨgɨm mɨda.
5 Naba 12:7; Diut 18:15-19Mosɨs nuŋ God nöbö mö nuŋwa mibɨl yöra mabö rɨ nöl ri ab gɨrön, God nuŋ mai agö mönöm anɨŋ yajön aku, nöbö mö piaku höd wöxnö yad nölöŋa. 6 Makwam Krais nuŋ God Ha nuŋwa ödöriö mɨd aku mɨ, nuŋ nöbö ram mɨnöbö röxg mɨdön, an God il nuŋwa mɨdöl nöbö mö bla nugwidɨx mɨd ri ab gɨ mɨda. An ap wä mai pɨnɨŋ aku nugw pön rɨbyöx gɨba alɨg mɨjnɨŋ aku, nöbö mö nuŋ akwör mɨjnɨŋa.
God mönö wä aku nugw pɨ gö nɨgön röböxmɨjeñ
7 Sam 95:7-11Makwam, Inöm Leia rɨg yad akuyöbö nugwi. Nuŋ yada,
“Wop kɨ God mönö audiöx nugumɨjöñ aku,
mönö nuŋ aku nugw pi.
God mönö nuŋwa nugwön
ipɨt rɨ gɨrön höj nugumɨjeñ.
8-9 Naba 20:2-5; Eks 17:7Nöhönɨŋ apɨnɨŋ nöbö maduar ör,
kɨm akuyöbö padokwo padök paŋyöbö i höuöiliö hö pɨn du adokwebö mɨj bö (40) mögörɨb rɨg kap mibɨl piaku mɨdɨm,
ñɨgö ap rölɨbä akuyöbö piaku rɨ gɨrön, nugwidɨx mɨd ri abma aku,
jɨ God nuŋ anɨŋ agö magɨm cönɨŋö, rɨm mönö na aku nugwölim;
rɨb ñɨŋa keir akwör yöx nugwön rɨm dumɨdöŋa.
Nöhönɨŋ apɨnɨŋ nöbö rɨg rim mag akuyöbö, ñɨŋ kwo algör God mönö yad höimöumɨjeñ.
10 Aliö almɨdmɨn, nɨ nöhönɨŋ apɨnɨŋ nöbö piaku nugumön ölɨsö wölɨm yadma,
‘Ñɨŋ öim öim nɨ höj nugwön, mönö na mai duölöiŋö,’ rɨma.
11 Naba 14:21-23Makwam, nɨ ölɨsö wölɨm, yadma,
‘ “Ñɨŋ mögörɨb wä duön nɨ pɨsaŋ mɨdön,
aŋöi nɨgön mɨd ri ab gɨ mɨjöñɨŋö,” rɨm aku, dueñɨŋö,’ rɨma.
Mönö ölɨsö yadön aŋadö wöhö rɨmö!” röŋa.
12 Makwam, haul nöbö mölöu nöbö. Ap kib mag gwogwo rön, God kömö mɨd aku mönö nuŋ aku röböxön, rɨb ñɨŋa keir yöxön rɨbä nɨg aku mɨ, nugw ri aböña. 13 God Mönö rɨb yadmɨdɨl aku,
“Wop kɨ God mönö audiöx nugumɨjöñ aku,
mönö nuŋ aku nugw pi.
God mönö nuŋwa nugwön
ipɨt rɨ gɨrön höj nugumɨjeñɨŋö,” röŋa.
“Wop kɨ” röŋ aku mödö mɨdöl mɨk. Makwam, ñɨŋ öim öim wop paŋ paŋ haul nöbö nölöu nöbö ñɨŋ bla pɨsaŋ Krais mönö wä aku yadɨp uhö gɨrön, nuö nuö yad nölön, rɨbyöx gɨba alɨg mɨjöña. Nöi mɨjön aku, kɨjaki ñɨgö ap kib mag gwogwo rɨb mönö inakmönö bli hörön ñɨgö pön pɨxɨp duaŋ Krais mönö wä aku röböxöña.
14 Höd an Krais mönö wä nuŋ aku nugwön, mönö nuŋwa nugw pɨ gö nɨgön, nugwo cɨrɨp ri abmɨŋ mag akuyöbö, mai an öim öim ususör rön paŋ mag akwör Krais mönö wä nuŋ aku nugw pɨ gö nɨgön, nugwo cɨrɨp ri abön, rɨbyöx gɨba alɨg mɨjnɨŋ aku, Krais nöbö mö nuŋwa mɨdön, nugwo pɨsaŋ nɨgiö nɨgön mabö cɨnɨŋa.
15 Hib 3:7-8God Mönö rɨb yadmɨdɨl aku yada,
“Wop kɨ God mönö audiöx nugumɨjöñ aku,
mönö nuŋ aku nugw pi.
God mönö nuŋwa nugwön
ipɨt rɨ gɨrön höj nugumɨjeñɨŋö,” röŋa.
Nöhönɨŋ apɨnɨŋ nöbö maduar ör,
kɨm akuyöbö padokwo padök paŋyöbö i höuöiliö hö pɨn du adokwebö mɨj bö (40) mögörɨb rɨg kap mibɨl piaku mɨdɨm,
ñɨgö ap rölɨbä akuyöbö piaku rɨ gɨrön, nugwidɨx mɨd ri abma aku,
jɨ God nuŋ anɨŋ agö magɨm cönɨŋö, rɨm, mönö na aku nugwölim;
rɨb ñɨŋa keir akwör yöx nugwön rɨm dumɨdöŋa.
Nöhönɨŋ apɨnɨŋ nöbö rɨg rim mag akuyöbö,
ñɨŋ kwo algör God mönö yad höimöumɨjeñɨŋö,” röŋa.
16 Naba 14:1-35Mosɨs nuŋ du Isrel nöbö mö mögörɨb Ijip mɨdɨm pön höŋ nöbö mö piaku ñɨŋ magalɨg God mönö nugwön höj nugumä. 17 1Kor 10:10Kɨm akuyöbö padokwo padök paŋyöbö i höuöiliö hö pɨn du adokwebö mɨj bö (40) Isrel nöbö mö piaku ap kib mag gwogwo rɨmɨdɨm, God ñɨgö ölɨsö wölɨm rɨmɨn, mögörɨb rɨg kap mibɨl piaku du mɨdön nöbö mö mɨga wöröx pörmä. 18 Makwam Isrel nöbö mö mɨga öim God nugwo höj nugwön, mönö nuŋwa rɨg yadmɨd mag akuyöbö rɨmɨdölmɨn mönö, God nuŋ mönö ölɨsö yadön, “Nɨ ñɨgö nugumön ölɨsö wöla. Mögörɨb wä duön, nɨ pɨsaŋ mɨdön aŋöi nɨgön mɨd ri aböñɨŋö, rɨm yöraku dueñɨŋö,” rön, aŋadö yad wöhö röŋa. 19 Makwam an nugwöla, ñɨŋ mönö nuŋwa nugw pölim aku mɨ, du mögörɨb wä aŋöi nɨgön mɨd ri aböyɨx yöraku dub maga nɨgölöŋ.