1 Wahoro htxero onà wyaro àkehe, àton kom hoko. Khoryenkom yakoro hak nàrwonàmtxowà, anar kom hoko, omeroron kom hoko. Apa y, noro hoko ryhe kàrwonaha, ayakoro, katxow haka. Apa y, noro akoronomako nyhe, katxow haka. Apa y, noro txko ryhe mewakryeko. Ohxe xaxa manaha, katxow haka. Àro wyaro hak nàrwonàmtxowà, àton komo, anaro rha toto kom hoko, 2 anaro rha owto yoh kom hoko xarha, anaro rha ehonomnà kom hoko xarha. Nyamoro hoko tàrwonàmporye tehxatxhe, Khoryenkom yakoro, wahahnà ro me toto komo yesnàr horà, teryehorye roro kesnàr kom horà, Khoryenkom hokono ro me kesnàr kom horà, takàhsomà ro me rma haxa kesnàr kom horà.

3 Àro wyaro Khoryenkom yakoro kàrwonàmtoho komo ryhe, ohxe naha, noro wya, konyhoryeny komo wya. Kàrwonàmrà komo rma yonytxehe, noro ha. 4 Toto komo yonyhoryenàr xe rma haxa naha. Omeroron komo yonyhoryenàr xe rma haxa naha. Àwyanye yaworon xaxa hutwanàr xe rma haxa naha, noro ha.

5 Àsok tawro hana. Towenyxa ryhe nay hamà, Khoryenkomo. Towenyxa rma rha naha, konyhoryeny komo, Khoryenkomo nàhnàn me harha keny komo. Kryestu Txesusu ryhe noro ha. Noro ryhe, toto me naha, kàwyaronye rma rha. 6 Tano me ro rma wayehye, konyhoryenàr kom horà, omeroron komo yonyhoryenàr horà. Kanhàn komo hyaye kowtoho komo yehemaye, twayehrà ke.

Àro wyaro noro wya konyhoryetxho komo ryhe, ekarymahnà me rma hak nehxakonà, amnyehra. Amnye rma haxa ryhe, ekarymaxah me harha naha, ekarymanàr xe harha Khoryenkom yesnàr ke mak ha. 7 Ekarymanye ro me ronyakye. Kryestu nànyaketxho ryhe uro ha. Xuknewyanahnà komo hananàhnye ro me ronyakye. Yaworon xaxa enytxatxoko kanye ro me ronyakye, àwyanye. Kryestu hona harha xenytxoko kanye ro me ronyakye, àwyanye. Àro wyaro roskarymantoko, yaworo xaxa àkehe. Àtemarontahra ro mak wehxaha.

8 Àro ke, onà wyaro toto komo yesnàr xe wehxaha. Kàrkomo kom hak nàrwonàmtxowà, Khoryenkom yakoro. Henta kom tehtokony hana, àto rma hak nàrwonàmtxowà, anaro rha tohsamnohtoho kom yawo rma tehtokony hamà. Enyhoru ro me hak nahtxoko, tàrwonyem komo, tatahoyotkaxem komo. Ewakàhkahpànà ro me rma haxa hak nahtxoko. Osoyhenà ro me rma haxa hak nahtxoko, nyamoro ha, Khoryenkom yakoro tàrwonyem komo.

9 Woràskomo komo xarha, tohtahoryetxho kom hoko, ohxe rma haxa hak nahtxoko. Takàhsom me rma hak nahtxoko. Enyhoru yawo rma hak nahtxoko. Onà wyaro kahra hak nahtxoko. Anar komo yoho rma haxa kohtahoryen hamà, ohxe rma haxa rosonyhonàr horà, kahra hak nahtxoko. Àro ke, ehetàhpenyen ke ewomumtohra hak nahtxoko. Ohxe hak notexkatxowà. Onà wyaro kahra hak nahtxoko. Anar komo yoho rma haxa kotexken hamà, ohxe tonyxem me rma haxa ryesnàr horà, kahra hak nahtxoko. Uru ryhe wehekahtyan hamà, ryemeknarà, kahra hak nahtxoko. Anaro rha tohu txko wehekahtyan hamà, rowarà, kahra hak nahtxoko. 10 Owakryeno ytxoho hok haxa hak nahtxoko, tohtahoryetxho komo yoho rma haxa mak ha. Àsok tawro hana. Owakryeno ynye ro me rma haxa tehxorye natxow hamà, woràskomo komo, Khoryenkom hokon uro ha kany komo.

11 Thananàhsom me hak nahtxoko, woràskomo komo. Thananàhnàtokonye rma, tatàknye hak nahtxoko. Thananàhnye komo yoyuknye ro me rma haxa hak nahtxoko. 12 Onà wyaro kanye ro me wehxaha, uro, woràskomo kom hoko. Hananàhno yhera hak nahtxoko, kàrkomo komo yohon mehra hak nahtxoko, kanye ro me wehxaha, àhokonye. Àro ke, tatàknye roro rma hak nahtxoko.

13 Àsok tawro hana, kàrà htxero yakàhtonàr ke, noro hona wos yakàhtonàr ke. Àro wyaro rma nehxatxkon hatà, Aknaw heno komo, Efa heno xarha. 14 Kàràhnà ryhe, wos haxa ryhe, Satanasà ymo nenkuhtonàr me nehxakon hatà. Noro htxero rma, Khoryenkomo yanweknye me harha nexey hatà.

15 Ohxe mak natxhe hampànà, woràskomo komo. Thokru komo yonunutoko ryhe, tukrunhosom me rma haxa natxhe hampànà. Khoryenkom hona haxa xenye ro me tehtokonye, tukrunhosom me nenuryatxhe hampànà. Toto komo xe tehtokony xarha, enyhoru ro me tehtokony xarha, takàhso tehtokony xarha, tukrunhosom me nenuryatxhe hampànà, woràskomo komo.