11
Ehsayewyana komo xanomkahnohpàra nexey hamà Khoryenkomo katxhàrà on ha.
1 Àsok hana nay ha, Khoryenkom ha. Àsok hana nay ha, tàmryenon kom hoko, Ehsayewyana kom hoko rma. Àxanomkahnohnyenhàyam me kat naye. Àna matà, àxanomkahnohnyenhàyam mehra naha. Àsok tawro hana. Uro ryhe, Ehsayewyana me wehxaha. Akmaraw heno yohamàtho me rma wehxaha. Benytxamen heno komo yohamàtho me rma wehxaha, uro ha. 2 Ehsayewyana rma xanomkahnohpàra rma nexey hamà, Khoryenkomo. Àro ke, Ehsayewyana komo xanomkahnohnyenhàyam mehra nay hamà. Tàmryenon kom me nyamoro wahanonkaye, amnyehra. Nyamoro rma xanomkahnohpàra naha.
Khoryenkom karyehtan hutwahra kat manatxowà. Eryeyas heno hoko àmenhosahonhàrà rma hutwahra kat manatxowà. Khoryenkom yakoro nàrwonàmye hatà, noro heno, Ehsayewyana kom hoko. Àsok hana nkekon ha, noro heno ha. Atxke rma haxa natxhe, Ehsayewyana komo, omeroro rma, kekon heno hatà, Khoryenkomo wya. 3 Amna yohà y, orwonà yokarymanye ro heno komo yotahatxownà, nyamoro ha, kekon heno hatà. Omàn yawonotho yanàhnohtxownà xarha. Faka yaknyohtohotho rma yanàhnohtxownà, oyowakryehra harha tehtxoho menye, kekon heno hatà. Urotho marma, oyowakryeny me rma wehxaha. Urotho xarha rotahanàr xe natxhe, nyamoro ha, kekon hatà, Eryeyas heno, Khoryenkomo wya, Ehsayewyana kom hoko. 4 Onà wyaro haxa neyukye hatà, Khoryenkomo. Àna matà, rowakryeny me rma natxhe, ukukuru komo, kekon hatà. 7 mew komo rma, rowakryeny me rma natxhe. Ronkurunhothàyamo rma nyamoro ha, kekon hatà. Baw yowakryehra ro mak natxhe ha, nyamoro ha, rowakryeny komo rma. Anaryana komo horyenà ro kuknonà rma yowakryehra ro mak natxhe ha, kekon hatà, Khoryenkomo, Eryeyas heno wya.
5 Amnye rma xarha, yaworo Khoryenkomo yowakryeny me rma rha natxhe, Ehsayewyana kukur komo, yakenohnà komo rma, noro nwahanonkatxhàyamo rma. Tano me ro rma wahanonkatxownà, àhokonye towahke xaxa tesnàr ke mak ha. 6 Ohxe ehtxoho kom hoye rohra wahanonkatxownà. Towahke xaxa tehtxoho hoye ro haxa ryhe, wahanonkatxownà, tano me ro mak ha. Ohxe ehtxoho kom hoye ro àwya àwahanonkantokony haxa, onà wyaro kahtoràtho haryhe mà, kàwyanye, towahke tehtxoho hoye ro marma wahanonkatxownà, kahtoràtho haryhe mà, kàwyanye.
7 Àro ke, onà wyaro tketxow hamà, Ehsayewyana kom hoko. Ohxe tesnàr kom xe nehxatxkon haryhe, Khoryenkomo wya. Ohxehra mak nehxatxkonà, àwya. Ukukuru kom marma ryhe, ohxe natxhe, àwya, yakenohnà komo rma, ànwahanonkatxhàyamo rma. Anar komo, akàhpàra rma natxhe, tàhnawonye. Akàhpàra nyamoro yeryey hatà, Khoryenkomo, toyukhura esnàr kom ke. 8 Nyamoro hoko rma, onà wyaro nkehe, àmenhosahonhàrà.
Akàhpànà ro me netxownà, Khoryenkomo, àhnawonye. Àro ke, tàwyanye noro yahoxetà yonyetoko, noro hutwahra rma nehxatxkonà. Tàwyanye noro rwonà yonytxantoko, uhutwahra rma nehxatxkonà. Àro wyaro rma nehxatxkonà, amnyehra. Àro wyaro rma natxhe, amnye rma xarha.
Àro wyaro rma nkehe, àmenhosahonhàrà. 9 Nyamoro hoko rma rha, onà wyaro nkehe xarha, Dafe heno nmenhotho xarha.
Tasahxemtosom komo wyaro teryehorye rma haxa natxhe, nyamoro ha. Atxke mak natxhe. Àro ke, onà wyaro harha hak nahtxoko, teryehorye ehxemotho komo. Tatahohsosom me harha hak nahtxoko, anhà wya. Tarymaxem me hak nahtxoko. Tanàhnohsom me hak nahtxoko, atxke tesnàr kom ke. 10 Enhura hak nahtxoko, tàhnawonye, ohutwahra tehtxoho menye. Teryewhamnohsomà roro me hak nahtxoko.
Àro wyaro rma nkehe, Dafe heno nemnhotho, Ehsayewyana kom hoko.
Amnye tonyhoryetxehkaxem me harha natxhe hampànà Xuknewyana komo katxhàrà on ha.
11 Àsok hana nehxatxkon ha, nyamoro ha, Xuknewyana komo rma. Natahohsotxownà hamà, tanhàn komo wya. Tanàhnohtàkaxem me kat natxowà, owyanye. Àna matà, tanàhnohtàkaxem mehra mak natxhe. Amnye nenyhoryetxhe harha, Khoryenkomo. Amnye rma haxa, anaro rha yana komo yonyhoryehe, atxke Xuknewyana komo yesnàr ke mak ha. Xuknewyanahnà komo rma yonyhoryehe. Àro hoye ro natakuyatxow hamà, Xuknewyana komo. Tatakuytxoho kom hoye ro, anatoko tonyhoryenàr komo xe rma rha natxow hana, Xuknewyanahnà komo wyaro rma rha. 12 Xuknewyana komo yanhàn hoye ro, towakryexem me natxhe, anaro rha yana komo, omeroro. Ewakryehnà me harha Xuknewyana komo yehtxoho hoye ro, towakryexem me natxhe, Xuknewyanahnà komo. Amnye, tonyhoryetxehkaxem me harha natxhe hampànà, Xuknewyana komo. Enyhoryetxehkaxah me naymoro yehtoko, meya roro towakryexem me rma haxa natxow hamà, anaro rha yana komo, omeroro.
13 Xuknewyanahnà komo y, onà wyaro àkehe, owyanye. Xuknewyanahnà komo hyaka ryhe, Kryestu nànyaketxho me wehxaha. Àro ke, onà wyaro kany me wehxaha. Xuknewyanahnà komo hananàhnye uro, nyamoro hananàhnye me ryehtxoho, ohxe rma haxa naha, kany me wehxaha, 14 rokukuru komo yatakuynyàr horà, Xuknewyana komo rma yatakuynyàr horà. Àsok tawro hana. Tatakuynyetokonye rma, anatoko owyaronye rma rha tesnàr kom xe natxow hana. Khoryenkomo nenyhoryenàr me harha natxow hana, ukukuru kom ha.
15 Xuknewyana komo xanomkahnohtxownà htxer hakahpa, Khoryenkomo. Amnye newakryetxhe kahpa harha. Àwya àxanomkahnohtoho kom hoye ro, noro nàhnàn me harha natxhe, anaro rha yana komo. Àsok hana natxow ha, amnye ha. Khoryenkomo wya Xuknewyana komo yowakryetxhe rma, meya roro towakryexem me natxow hamà, anaro rha yana komo. Àwayehxemo kom waye anàmsah me ryhe, karyhe roro harha natxow hamà.
16 Àsok hana natxow ha, Xuknewyana kom ha. Katamaru wyaro natxow hamà. Katamaru hoye towsomà ryhe, enyhoru ro me nay hamà, Khoryenkomo wya tàmsom me esnàr ke. Àro ke, enyhoru ro me rma rha naha, katamaru xarha, tàmpànà rma, àro rma rha hoye esnàr ke mak ha. Àro wyaro rma rha, enyhoru ro me nehxatxkon hatà, Xuknewyana horyen heno komo. Àro ke, enyhoru ro me rma rha natxhe, ehamàthàyamo, omeroro. Natà wyaro xarha natxow hamà. Enyhoru ro me àmxar yehtoko, enyhoru ro me rma rha naha, akmatar xarha, omeroro. Àro wyaro rma rha enyhoru ro me natxhe, Xuknewyana komo, enyhoru ro me thoryen heno komo yesnàr ke mak ha.
17 Oryefera yohà wyaro xarha natxow hamà. Toto nenamàtho wyaro rma, enyhoru wyaro rma, natxhe. Omnyam haxa ryhe, Xuknewyanahnà komo rma, enampànà wyaro manatxhe. Thoko rma ahtaxaho wyaro rma manatxhe. Àsok hana nay ha, oryefera yakmatatho ha, toto nenamàtho yakmatatho ha. Ehetahra ehtoko, tàxanomkahnohsom me nay hamà. Taxwexem me nay hamà. Àhryetayo me anaro hoye neryatxhe, toto komo, tànatkem komo. Anatoko thoko rma ahtaxahotho hoy hana neryatxow ha, oryefera waka, tànenamàthàyam waka. Àro hoye ro tohkurye rye nay hamà. Toto wya axwentokono wyaro, Xuknewyana kukuru komo xanomkahnohye, Khoryenkomo. Àhryetayo menye Xuknewyanahnà kom haxa yeryeye, tàmryenon me harha, àwyaronye rma rha ewakryenàr kom horà.
18 Onà wyaro kahra nay hamà, anaro hoyenotho, oryefera yakmatatho wya. Oyoho rma haxa ohxe wehxaha, uro, kahra nay hamà. Àro wyaro rma rha, oyohonye rma haxa ohxe amna naha kahra ehtxoko, omnyamo, Xuknewyana komo wya. Onà ryhe hutwahkahpàra ehtxoko. Àmxarà yohkuryehra nay hamà, akmatarà, anaro hoye txexahotho. Àmxar hoye ro haxa ryhe tohkurye nay hamà. Àro wyaro rma rha, Xuknewyana kom hoye ro towakryexem me manatxhe, omnyamo. Àro ke, oyohonye rma haxa ohxe amna naha, kahra ehtxoko.
19 Anatoko onà wyaro màketxow hana. Axwexaho wyaro àxanomkahnohsah me natxow hamà, Xuknewyana komo, màketxow hana. Àro hoye ro, anaro hoye txexaho wyaro towakryexem me amna naha, màketxow hana. 20 Àro wyaro owyanye tatoko rma, yaworo màketxow hamà. Onà wyaro kahra mak ehtxoko. Nyamoro yoho rma haxa ohxe amna nay hamà, kahra ehtxoko. Àsok tehtxoho kom hoye ro hana àxanomkahnohsah me natxow ha, nyamoro ha. Kryestu hona xenyhera tehtxoho kom hoye ro ryhe, àxanomkahnohsah me natxow hamà. Omnyam haxa ryhe, towakryexem me manatxhe, Kryestu hona owyanye xenyàr ke mak ha. Àro ke, ukurunkahnà me Khoryenkomo xenytxoko. 21 Àsok tawro hana. Àxanomkahnohxemo komo kurunhohra nehxakon hamà, noro ha. Tàmryenonàthàyamo rma kurunhohra nehxakon hamà. Nyamoro rma kurunhohra tehtoko, okurunhohrany xarha naha hampànà, Kryestu hona xenyhera harha oyehtokonye. Àro ke, noro hona mpàn xenytxoko.
22 Àsok hana nay ha, Khoryenkom ha. Towahke xaxa nay hamà. Ewakhàra xarha nay hamà. Nyamoro hoko ewakhàra rma haxa naha, tanhàn komo wya atarymahonàr kom ke. Ohokony haxa ryhe towahke xaxa naha. Oyowakryeny kom hona xenye ro me oyehtokonye, towahke roro rma haxa naha, ohokonye. Noro hona xenyhera harha oyehtokonye, axanomkahnohyatxhe hampànà.
23-24 Nyamoro xarha, noro hona xeny me harha ehtokonye, tàmryenon me harha neryatxhe, Khoryenkomo. Ehnyahnà ro xaxa kax mak naha ha, noro ha. Krawame oryefera waka texem me nay hamà, anaro hoye towsahotho. Thoko rma ahtaxahotho hoye towsahotho rma, krawame rma haxa texem me nay hamà, toto nenamàtho waka, anaro ro kaxe. Krawamehra mak texem me harha nay hamà, axwexahotho, ehàthàr waka harha, àro rma rha kax mak ha. Àro wyaro rma rha, krawamehra towakryexem me harha natxhe hampànà, Xuknewyana komo. Àsok hana manatxow ha, omnyam ha, Xuknewyanahnà komo. Tàmryenon me Khoryenkomo nyeryetxho me manatxow hamà. Àro ke, tàmryenon me noro nenyàr me rma rha natxhe hampànà, Xuknewyana komo xarha, noro hona tàwyanye xenyetok mak ha.
Omeroron komo hnàn yawo rma haxa Khoryenkom yehtxoho yokarymatxhàrà on ha.
25 Rowtà komo y, onà wyaro tawro xehra wehxaha, owyanye. Xuknewyana kom yoho rma haxa ohxe amna nay hamà, tawro xehra wehxaha, owyanye. Àro ke, ohxe harha Xuknewyana komo yehtxoho wekarymehe, owyanye. Uhutwamohsohra rma hak nehxakonà, Khoryenkomo, amnyehra. Amnye rma haxa hutwamohsehe. Àro ke, onà wyaro wekarymehe, owyanye.
Àsok hana natxow ha, Xuknewyana kom ha. Ukukuru komo rma, atxke natxow hamà. Tàhnawonye akàhpàra netxownà, Khoryenkomo, toyukhura esnàr kom ke. Atxke rma hak nyamoro yehtoko, Xuknewyanahnà kom haxa yonyhoryenàr hok naha, Khoryenkomo. Xuknewyanahnà kom hoye tànwahanonkatxhàyamo yonyhoryetxehkehe, omeroro mak ha. 26 Tàwya nyamoro yonyhoryetxehkatxhe rma, Xuknewyana komo xarha yonyhoryetxehkehe. Àro hoko rma, onà wyaro nkehe, àmenhosahonhàrà.
Nomokyaha hampànà, konyhoryeny komo. Seyaw honotho rma noro ha. Anhànàthàyamo yowyaha hampànà, tàmryenon komo hyaye, Xako heno yohamàthàyamo hyaye. Khoryenkom hokon me harha neryatxhe hampànà.
Àro wyaro rma nkehe, àmenhosahonhàrà. 27 Onà wyaro nkehe xarha, àmenhosahonhàr xarha.
Rowya anhànàthàyamo yownàtoko rma, onà wyaro àkehe hampànà, àwyanye. Romryenon komo yonyhoryetxehkany me harha wehxaha, àkehe hampànà, àwyanye.
Àro wyaro rma nkehe, àmenhosahonhàrà.
28 Àrwo yonyhorunu yoyukhura rma hak natxhe, Xuknewyana komo. Àro ke, nyamoro xanhànà wyaro naha, Khoryenkomo, oyonyhoryenàr komo xe tesnàr ke mak ha, Xuknewyanahnà komo rma yonyhoryenàr xe tesnàr ke mak ha. Noro nwahanonkatxhàrànhàr me mak natxhe, Xuknewyana komo. Àro ke, àxenye rma naha, noro ha, àhoryen heno komo wahanonkanyenhàr me tesnàr ke. 29 Àsok tawro hana. Anar me harha ehutwahra ro mak naha ha, àhokonye, tànewakryenàr kom hoko, tànwahanonkatxhàyamonhàr hoko.
30 Amnyehra Khoryenkomo yoyukhura mehxatxkonà, omnyamo, Xuknewyanahnà komo. Ohnàn kom yaw harha naha, Khoryenkomo, toyukhura Xuknewyana komo yesnàr ke mak ha. 31 Amnye rma, noro yoyukhura rma natxhe, nyamoro ha. Amnye, àhnàn kom yaw harha mpànà naha ha, Khoryenkomo. Ohnàn kom yawo tehtxoho wyaro, àhnàn kom yawo rma rha mpànà naha ha.
32 Toto kom hoko àme rye rma haxa naha, Khoryenkomo. Royuknyehnà me rma hak nahtxoko, toto komo, omeroro, kanyenhàr me naha. Royuknyehnà me rma hak nahtxoko, àhnàn kom yaw harha ryehtxoho me, omeroron komo hnàn yaw harha ryehtxoho me, kanyenhàr me naha, Khoryenkomo.
Ehonomnà me xaxa Khoryenkom yehtxoho on ha.
33 Àsok hana nay ha, Khoryenkom ha. Tàywero rma haxa nay hamà. Omeroro uhutwatxehkanye ro me rma haxa nay hamà. Àsok hana khutwetxow ha. Àsok hana keryatxow ha. Uhutwahra ro mak tehxatxow hamà, kohonye rma haxa esnàr ke mak ha. 34 Àro hoko rma, onà wyaro nkehe, àmenhosahonàrà.
Kohkomo yehutwatxho hutwahra ro mak tehxatxow hamà. Onà wyaro kahra tehxatxow hamà, àwya. Apa y, uro enytxako, yaworo owya uhutwatxho me, kahra ro mak tehxatxow hamà, àwya. 35 Apa y, akatxho wàmyako, àro ke mehemen hamà, rowya, kahra ro mak tehxatxow hamà, àwya. Ehetàhkahra ro mak naha ha, noro ha, kàwyanye.
Àro wyaro rma nkehe, àmenhosahonhàrà.
36 Omeroro nakàhtotàhkaye. Tànakàhtothàr yohà rye me rma haxa naha. Omeroro rma nakàhtotàhkaye, tàwyano ro me ehtxoho me. Onà wyaro katxho roro me hak nahko, noro ha. Ehonomnà me xaxa naha, katxho roro me hak nahko. Àro wyaro hamà tkatxe.