1 मंळसा नामी मसीह अन सेवक अदिक परमेश्वर उन मातगोळ्द मुनीम समसुल. 2 बाक ईल भंडारी दा ईद मात जरूरी आद कि भंडारी देखरेख माळावाळा मुनीम विश्वासलायक ईरूल. 3 लेकीन नांद नजर दा ईद हापाळ स्यांळ्द मात आद कि नीव या मंळसागोळ्द यावारा न्यायालय नानी न्याय दिलुसुल, बल्‍की ना खुद तान तान इक न्याय दिलुस सकालीन. 4 यतिकी नांद मन नान न्याय माळाल्द, लेकीन इदुर देल ना निर्दोष ठहरूसालीन, यतिकी नांद जाँच माळावाळा प्रभु आन. 5 इदुरसाटी यागासताका प्रभु बरालुन, समय टु पयला यातोदु मात इन न्याय माळबाळी: आवा अंधकार इन होचकु मातगोळ ज्योति दा तोरस्यान, अदिक मनगोळ अभिप्रायगोळी इक प्रगट माळ्यान, आग परमेश्वर उन दी टु हर ऊंद मंळसा अन्द प्रशंसा आदीत.

6 हे वार्टुरा अदिक आकतींगेरा, ना ई मातगोळ दा नीम साटी तान अदिक अपुल्लोस उन मातगोळ उदाहरण इन रीति मा माळीन, इदुरसाटी कि नीव नाम द्वारा ईद कली कि जो शास्त्र दा लिख्सकु आद अदुर से मुंद आगबाळेतीर, अदिक ऊंद मंळसा अन्द विरोध दा अदिक दुसरा मंळसा अन्द विरोध दा गर्व माळबाळेतीर. 7 नीन दा अदिक दुसरा मंळसा दा याव भेद माळतान? अदिक नीन हात्‍ती येन आद जो नीनी परमेश्वर देल सिक्‍कीदील? अदिक याग कि नीनी परमेश्वर देल सिक्याद, रा हिंग घमण्ड येती माळत्या कि मान्सी नानी सिक्‍कीदील?

8 नीव रा संतुष्ट आगीदीर, नीव धनी आगीदीर, नीव नाम बिना राज्य माळदीर; लेकीन भला आगाईत कि नीव राज्य माळायदीर कि नाव भी नीम सांगुळ राज्य माळायदेव. 9 नान समझ दा परमेश्वर नाव प्रेरितगोळी सब मुंदुर्द बाद्दा आ लॉकुर घाई ठहरूस्यान, यार्द सायोद आग्या आगेग्याद; यतिकी नाव दुनिया अदिक स्वर्गदूतगोळ अदिक मंळसागोळ साटी ऊंद तमाशा ठहरूसकु आयेव. 10 नाव मसीह अन साटी मूर्ख आयेव, लेकीन नीव मसीह दा बुद्धिमान आईर! नाव कमजोर आयेव, लेकीन नीव बलवान आईर! नीमी आदर सिकतद, लेकीन नाम्द अपमान आगतद! 11 नाव ई घळी ताका हस्तकु नीरअळ्क अदिक हरकु कपळा हाकतेव, नाम सांगुळ बुरा तरीका देल व्यवहार माळतार अदिक नाव मारा मारा टेटतेव; 12  ✡ ४:१२ प्रेरितगोळ १८:३अदिक तान अच कयगोळ देल क्याल्सा माळकु मेहनत माळतेव. लॉकुर नामी बुरा अनतार, नाव आशीष कोळतेव; आंदुर सतुस्तार, नाव सहन माळतेव. 13 आंदुर बदनाम माळतार, नाव विनती माळतेव. नाव ईंद ताका दुनिया अन मईल अदिक सप्पा वस्तुगोळ्द खात कचरा अन घाई ठहरूसकु आयेव.

14 ना नीमी शर्मिंदा माळोर साटी ईव मातगोळ लिखसालीन, लेकीन नानव प्रिय चिकोर घाई सम्सकु नीमी चेतावनी कोळतीन. 15 यतिकी अगर मसीह दा नीमी कल्सावाळेर हत्‍त हजार भी ईरायदुर, तरी भी नीमव गुरुगोळ हापाळ सा हैलेच; इदुरसाटी कि मसीह यीशु दा खुशखबरी इन द्वारा ना नीमव आप्प आदीन. 16  ✡ ४:१६ १ कुरिन्थि ११:१; फिलिप्पिगोळ ३:१७इदुरसाटी ना नीम से विनती माळतीन कि नीव नान अनुकरण माळी. 17 ईदा कारण ना तीमुथियुस उक, जो प्रभु दा नानव प्रिय पार अदिक विश्वासयोग्य सेवक आन, नीम हात्‍ती कळुदीन. आव नीमी मसीह दा नान आचरण इन याद माळ्यान, ह्यांग कि ना हर जागा दा, हर ऊंद मंडली अक उपदेश कोळतीन.

18 येनारा लॉकुर घमण्ड देल हिंग बातोग्यार, मान्सी ईग ना नीम हात्‍ती बरातीदील. 19 लेकीन प्रभु चाहास्यान रा ना नीम हात्‍ती राटनेरी इच बराईन, अदिक आ बातकुगोळ्द मातगोळ इक ईला, लेकीन आंदुर सामर्थ्य इक जान्स कोमाईन. 20 यतिकी परमेश्वर उन राज्य मातगोळ दा ईला लेकीन सामर्थ्य दा आद. 21 नीव येन चाहासतीर? येन ना कोल हुळकु नीम हात्‍ती बराईन, या प्यार अदिक नम्रता अन सांगुळ?