1 पतरस अदिक यूहन्ना मदणी अन्द मुर मुरा प्रार्थना अन्द होती आंदुर म्याकुच मंदिर दी होगोर. 2 अदिक लॉकुर ऊंद पैयदायसी लंगळा अक तरोर, यारी आंदुर रोज मंदिर इन आ दरवाजा मा यदरी सुंदर अंदकु आगतद, कुर्स बुळतोगोर कि आव मंदिर दा होगावाळेर से भीख बेळ सकुल. 3 याग आव पतरस अदिक यूहन्ना अक मंदिर दा होग्त नोळदुन, रा आंदुर से भीखा बेळदुन. 4 पतरस यूहन्ना अन्द सांगुळ आऊन दी ध्यान देल नोळकु अंदुन, “नाम दी नोळ!” 5 इदुरसाटी आव आंदुर से येनारा ताकोमोद लालसा ईटतेला आंदुर दी तार हचकु नोळली कुरतुन. 6 लेकीन पतरस अंदुन, “व्हान्ना बेळ्ली रा नान हाती हैलेच, लेकीन जो नान हाती आद अद नीनी कोळतीन; यीशु मसीह नासरी इन हेसुर देल नळु अदिक ओयाळ.” 7 अदिक पतरस आऊन ऊमा कय हुडुकु आऊक नेगदुन; अदिक तुरन्त आऊन कालगोळ अदिक ट्वांगरागोळ दा जोर होट बत्‍त. 8 आव यदकु निदरेदुन अदिक नळुली कुरतुन; अदिक नळुतेला, हारतेला अदिक परमेश्वर उन स्तुति माळतेला आंदुर सांगुळ मंदिर दा होदुन. 9 सप्पा लॉकुर आऊक नळुत टेटाळ्त अदिक परमेश्वर उन स्तुति माळ्त नोळकु, 10 आऊक अर्त कोंडुर कि ईव आवा हुन जो मंदिर इन सुंदर फाटक मा कुर्तकु भीखा बेळतोगोन; अदिक आ घटना देल जो आऊन सांगुळ आगीत आंदुर हापाळ अचम्भित अदिक चकित आदुर.

11 याग आव पतरस अदिक यूहन्ना अक हुडुकु ईरोन, रा सप्पा लॉकुर हापाळ आश्चर्य माळतेला आ छपर्या दा यदरी सुलैमान उन छपर्या अंदकु आगतद, आंदुर हाती ओळतेला बंदुर. 12 ईद नोळकु पतरस लॉकुर से अंदुन, “हे इस्त्राएलगोळा, नीव ई मंळसा मा येती आश्चर्य माळेतीर, अदिक नाम दी हिंग येती नोळेतीर जसा नाव अच तान सामर्थ्य या भक्ति देल ईऊक नळोद अदिक टेटाळोद लायक माळ बुटेव. 13 अब्राहम अदिक इसहाक अदिक याकूब उन परमेश्वर, नाम आप्प दादागोळ परमेश्वर तान सेवक यीशु उन महिमा माळदुर, यारी नीव हुळसुस बुट्टीर, अदिक याग पिलातुस आऊक बिळोद विचार माळदुन, आग नीव आऊन मुंद आऊन इनकार माळदीर. 14  ✡ ३:१४ मत्ती २७:१५-२३; मरकुस १५:६-१४; लूका २३:१३-२३; यूहन्ना १९:१२-१५नीव आ पवित्र अदिक न्यायी मंळसा अन्द इनकार माळदीर, अदिक विनती माळदीर कि ऊंद हत्यारा अक नीम साटी बिटकु आगेगुल; 15 अदिक नीव जीवन इन कर्ता धर्ता अक कोंद बुट्टीर, यारी परमेश्वर सोत्‍तुर दा टु जित्‍ता माळदुन; अदिक ई मात इन गवाह नाव आयेव. 16 अदिक आऊंदा हेसुर, आ विश्वास इन द्वारा जो आऊन हेसुर मा आद, ई मंळसा अक यारी नीव नोळतीर अदिक अरूतीर सामर्थ्य कोटान. अदा विश्वास जो आऊन द्वारा आद, ईऊक नीम सप्पा मुंदुर मुंद बिलकुल भला चंगा माळ बुटान.

17 “ईग हे वार्टुरा, नानी मालूम आद कि ईद क्याल्सा नीव अग्यानता दा माळदीर, अदिक हांगा नीम अधिकारीगोळ भी माळदुर. 18 लेकीन याता मातगोळी परमेश्वर सप्पा भविष्यवक्तागोळ बाय देल पयले अच हेळ बुटीदुन, कि आऊन मसीह दुख नेगदान, अवरी आव ई रीति देल पुरा माळदुन. 19 इदुरसाटी, मन तिर्गुसी अदिक वापस बरी कि नीम पाप माफ माळकु आदव, 20 ताकी आत्मिकता शांती इन समय प्रभु उन देल बरूल अदिक आव यीशु अक कळुल जो नीम साटी पयले टु ना मसीह ठहरूस्कु आग्यान, 21 जरूरी आद कि आव स्वर्ग दा आ समय ताका ईरूल यागासताका कि आव सप्पा मातगोळ्द सुधार माळ कोमालुन यदुर्द चर्चा स्याणा लॉकुर काल टु परमेश्वर तान पवित्र भविष्यवक्तागोळ बाय देल माळ्यान. 22  * ३:२२ व्यवस्थाविवरण १८:१५,१८ ह्यांग कि मूसा अंदुन, ‘प्रभु परमेश्वर नीम वार्टुर दा टु नीम साटी नान घाई ऊंद भविष्यवक्ता पैदा माळ्यान, जो येनारा आव नीम से अंदान, नीव आऊन केळी. 23 लेकीन हर ऊंद मंळसा जो आ भविष्यवक्ता अन्द केळतीदिल, परमेश्वर उन लॉकुर दा टु ब्यार्र माळकु नाश माळकु आदान.’ 24 अदिक शमूएल इन हात्‍ती टु हुडुकु रा आऊन बादवाळेर ताका यास भविष्यवक्ता माताळदुर आ सप्पा ई दिनगोळ बारा दा बातणी कोटार. 25 नीव भविष्यवक्तागोळ औलाद अदिक आ वादा अन भागी हुईर, जो परमेश्वर नीम आप्प दादागोळ से कटदुन, याग आव अब्राहम से अंदुन, ‘नीन घराना अन्द द्वारा पृथ्वी इन सप्पा लॉकुरी आर्शिवाद सिक्‍कीत.’ 26 परमेश्वर तान सेवक उक नेगुकु पयले नीम हात्‍ती कळुदुन, कि नीम दा टु हर ऊंद मंळसा अक आऊन बुराईगोळ देल तिर्गुसकु आर्शिवाद कोळुल.”