1 व्यवस्था रा बरावाळा वळ्लीद मातगोळ्द सिर्फ सावली हुन, लेकीन अद आ वास्तविक मातगोळ्द सप्पा अदिक वास्तविक मातगोळ्द दाखला ईला. इदुरसाटी अवा बलिगोळ द्वारा यवरी लगातार हर साल अनन्त रूप देल येर्सकु आगतद, आराधना अन साटी हात्‍ती बरावाळेर इक हमेशा साटी सम्पुर्ण सिद्ध माळकु आगसकाल. 2 अगर हिंग आग सकाईत रा येन अऊर्द येर्सकु आगोद बंद ईला आगेगाईत? यतिकी बाक रा उपासना माळावाळेर ऊंदा घन दा हमेशा साटी पवित्र आगेगायदुर अदिक तान पापगोळ साटी बाक यागलु तान इक दोषी ईला समसायदुर. 3 लेकीन हर साल येर्सद बलिगोळ मंळसागोळी आंदुर पाप याद तोर्सतद. 4 यतिकी वस्तागोळ अदिक व्हातगोळ्द रक्ता पापगोळी दुर माळुल, ईद संभव हैलेच.

5 इदुरसाटी याग मसीह दुनिया दा बंदीदुन रा आव अंदिदुन, “नीनी याऊ बलिदान अदिक भेंट चाहासीदिल, लेकीन नी नान साटी ऊंद शरीर तयार माळ्द.”

6 अग्नि-बलिगोळ्द अदिक पाप-बलिगोळ देल नी खुश आगीदील.

7 आग बाक ना अंदिदीन, अदिक ह्यांग व्यवस्था अन किताब दा भी लिख्सकु आद, “ना ईल आईन, हे परमेश्वर, नीन इच्छा पुरा माळोर साटी बंदीन.”

8 आव पयले अंदिदुन, “बलिगोळ अदिक भेंट, अग्नि-बलिगोळ्द अदिक पापबलीगोळ नी चाहसाल अदिक ना रा नी अऊर से खुश आगीद.” तरी भी व्यवस्था ईद चाहासतद कि अव येर्सकु आगुल. 9 बाक आव अंदिदुन, ना ईल आईन, नान नीन इच्छा पुरा माळोर साटी बंदीन, रा आव दुसरा व्यवस्था अक स्थापित माळोर साटी पयला रद्द माळ बुळतान. 10 परमेश्वर उन इच्छा देल नाव यीशु मसीह अन शरीर इन पयला अच घन बलिदान येर्सकु आगदुर द्वारा पवित्र माळकु आदेव.

11 हर ऊंद याजक हर रोज नीदुरकु तान न्याय इन कर्तव्यगोळी पुरा माळतान, अदिक ऊंद अच प्रकार इन बलिदान इक जो पापगोळी यागलु दुर माळ सकालव घळी-घळी येर्सतान. 12 लेकीन मसीह रा याजक उन रूप दा पापगोळ साटी, हमेशा साटी ऊंदा बलिदान येर्सकु परमेश्वर उन ऊम्मा कय दी होगकु कुरतुन, 13 अदिक अदा समय टु तान विरोधीगोळी परमेश्वर उन द्वारा कालगोळ्द पांळसी माळकु आगोद हादी कायेत्यान. 14 यतिकी आव ऊंद अच चढ़ावा अन द्वारा आंदरी जो पवित्र माळकु आगतार, हमेशा साटी पुरा सिद्ध माळ कोंडान.

15 अदिक पवित्र आत्मा भी नामी ईदा गवाही कोळतद; यतिकी अद पयले अनतद.

16 “प्रभु अनतान कि जो वाचा ना आ दिनगोळ बाद्दा आंदुर से कटाईन अद ईद हुन कि ना तान नियमगोळी आंदुर दिलगोळ मा मंळसाईन अदिक ना आंदुर मनगोळ मा लिख्साईन.”

17 बाक आव ईद अनतान, “ना आंदुर पापगोळी अदिक आंदुर अन्याय इन क्याल्सागोळी बाक यागलु याद माळतीदील.” 18 अगर ईंदुर्द पापगोळ्द माफ आगेग्याद, रा यातोदु बली इन येनु जरवत अच हैलेच.

19 इदुरसाटी हे वार्टुरा अदिक आकतींगेरा, यतिकी यीशु उन रक्ता अन द्वारा आ परम पवित्र जागा दा प्रवेश माळोद निडर आत्मविश्वास आद, 20 यारी आव परदा अन द्वारा, मतलब आऊन खुद इन शरीर इन द्वारा ऊंद व्हाशोद अदिक जित्‍ता हादी इन माध्यम नाम साटी तेर्द बुटान. 21 अदिक नाम हात्‍ती हिंग महान याजक आन, जो परमेश्वर उन मान्ना अन अधिकारी आन, 22 रा बरी, नाव खरा मन अदिक पुरा विश्वास इन सांगुळ, अदिक नामी मन इन दोष इन भावनागोळी शुद्ध माळोर साटी अदिक दिल मा रक्ता छिळकुसकु, अदिक शरीर इक शुद्ध नीर देल तोळकु परमेश्वर उन हात्‍ती होदेव. 23 बरी नाव तान आशा अन अंगीकार इक मजबूती देल हुडुकु ईत्‍तेव, यतिकी याव प्रतिग्या माळ्यान, आव विश्वासयोग्य आन; 24 अदिक बरी नाव ध्यान ईटाता कि नाव प्यार अदिक वळ्लीद क्याल्सागोळ्द प्रती आबुर दाबुर इक ह्यांग मदत माळ सकतेव, 25 अदिक ऊंद सांगुळ सभागोळ दा बरोद तान ई आदतगोळी बिळबाळी, ह्यांग कि थ्वाळासा लॉकुरी अल ईला बरोद आदत बिदोग्याद, लेकीन आबुर दाबुरी मात्‍त यक्कुल प्रोत्साहित माळतेला ईरी; ह्यांग कि नीव नोळेतीर प्रभु उन दिन हात्‍ती बरेत्याद.

26 यतिकी सत्य अन पयचान हासिल माळदुर बाद्दा अगर नाव जान बुझुस्कु पाप माळतेला ईत्‍तेव, रा पापगोळ साटी बाक यातोदु दुसरा बलिदान मिक्‍कु हैलेच. 27 उलटा बाक रा बरावाळा न्याय अदिक भीषण बेक्‍की इन अंज्क इन सांगुळ हादी कायोद अच सिर्फ मिक्‍कु ईरतद जो परमेश्वर उन विरोधीगोळी भसम माळ कोंडीत. 28 जो यावारा मूसा अन व्यवस्था अन पालन माळालुन, आऊन मा बिना दया माळ्द येढ्ढ या मुर मुंदुर गवाहगोळ्द गवाही मान्सकु कोंदकु आगतद, 29 रा विचार माळकोमी कि आव याट मात्त भारी दण्ड इन लायक ठहरूस्यान, याव परमेश्वर उन पार उक काल देल मेटदुन अदिक वाचा अन रक्ता अक, यदुर द्वारा आव पवित्र ठहरूस्कु आगीदुन, अपवित्र जान्सदुन, अदिक अनुग्रह अन आत्मा अन अपमान माळदुन. 30 यतिकी नाव आऊक अरूतेव, याव अंदिदुन, “बदला ताकोमोद नान क्याल्सा आद, ना अच बदला ताकोमाईन.” अदिक बाक आव ईद भी अनतान, कि “प्रभु तान लॉकुर्द न्याय माळ्यान.” 31 जित्‍ता परमेश्वर उन कय दा बिळोद भयानक मात आद.

32 लेकीन आ हिंदळोव दिनगोळी याद माळी, यदुर दा नीव परमेश्वर उन ऊजुळ हासिल माळकु, अदिक अदुर बाद्दा याग नीव मयनतगोळ्द सामना माळतेला कठोर संघर्ष दा मजबूती इन सांगुळ बन्सकु ईत्‍तीर. 33 आग यागल्यारा रा सप्पा लॉकुर मुंद नीमी अपमानीत अदिक सतुसकु आत अदिक यागल्यारा यार सांगुळ हिंग बर्ताव माळकु आगतोगोद, नीव आंदुर साथ कोट्टीर. 34 यतिकी नीव कैदीगोळ दुख दा भी सहभागी आदीर, अदिक तान संपत्‍ती भी खुशी देल लुटुस गोट्टीर; ईद जान्सकु कि नीम हात्‍ती ऊंद मात्‍त वळ्लीद अदिक हमेशा ठहरूसावाळा संपत्‍ती आद. जो हमेशा साटी बन्सकु ईरतद. 35 इदुरसाटी तान निडर आत्मविश्वास बिळबाळी यतिकी अदुर्द प्रतिफल धोळ्द आद. 36 यतिकी नीमी धीरज ताकोमोद जरूरी आद, ताकी परमेश्वर उन इच्छा अक पुरा माळ सकीर अदिक जो प्रतिग्या माळकु आग्याद अदरी हासिल माळीर. 37 “यतिकी ह्यांग शास्त्र अनतद, हापाळ जल्दी जो बरावाळा आन आव बंदान आव बिलकुल समय हचतिदील. 38 नान सच्चाई देल नळावाळेर लॉकुर विश्वास देल जित्‍ता ईत्‍तार; अदिक अगर आंदुर दा टु यावारा हिंद हटस्यान रा ना आऊन से खुश ईरतीदील.”

39 लेकीन नाव आंदुर दा टु हैलेच जो हिंद हट्सतार अदिक नाश आगेगतार उलटा आंदुर दा टु आयेव जो विश्वास माळतार अदिक ऊळ्सकु आगतार.