18
Jesús achikmau
(Mt 26.47-56; Mr 14.43-52; Lc 22.47-53)
1 Jesús nuna tusa ashimak, nina unuinatairi ainajaimak jiinki entsa shikapchich Cedrón tutai amain katig númi olivo tutai arakmaunam jeawaiti. 2 Nunaka Judascha yaunchuk Jesúsjaimak iruuntrar weká jaku asa, nu nugkanka shir nekau. 3 Tumau asa sacerdote apuri ainan, tura fariseo apuri ainajaimak aujuk: Suntarum tsagkattrukta atutkarti tusa seawaiti. Tusa takai suntaran untsurin nagkin tinamak, tura Yuus ememattasa iruuntai jean kuitamin ainancha aitkasag lámparan tinamkar tura shiripkincha tinamak ishiakaruiti. Turamu asar nuna ekeemarar Jesúsan jeariaruiti. 4 Imaninaig Jesúska ni turam atintrinka nekau asa, jiintuki chichaak:
“¿Ya earme?” tusa tinaiti.
5 Tusa takai nita aimainak:
“Jesús Nazaretnumiaya nu eaji”, tusa tuina.
Tuinakai Jesús chichaak:
“Wiyaitjai nunaka”, tusa tinaiti.
Nui Judas Jesúsan suruktasa nitajai irutkau weká. 6 Jesús chichaak: “Wiyaitjai”, tusa takai kuntuts enentaimrar wakettsarag nugka tepesaruiti. 7 Tumawarmatai ataksha awentsag chichaak:
“¿Ya earme?”
Tama nita aimainak:
“Jesús Nazaretnumiaya nu eaji”, tusa tuina.
8 Tuinakai Jesús nitan ayak:
“Wiyaitjai Tuke pujunka timajrume, wina nekas achirkattsa eatkurmeka chikich aina juka inaisatarma wearti”, tusa tinaiti.
9 Nuna tina nunaka Jesús yaunchuk chichaak: “Apar wina surusmaunka chikichkinkisha emegkaakchajai”, tusa tina nuna umiktasa, Jesúska tinaiti.
10 Nuna tusa tai Simón Pedro, kuchiin takaku asa, kuchiirin juakug sacerdote apuri inatairin untsur kuishin awatti asankauwaiti. Nu shuara naarigka Malco tutai ajakuiti. 11 Turakai Pedron Jesús chicharuk:
“Kuchiirum jukim egketairmin egkeata. ¿Ameka, wina apar waittsati tusa turutmauwa nunaka umimainchauk enentaimturam?” tusa tinaiti.
Jesús Anása jeen ejému
12 Nuna tusa takai Romanmaya suntar aina, nita apuri, Yuus ememattasa iruuntai jean kuitamin ainajai, iruunturar Jesúsan achikar jigkararuiti. 13 Turawar Anás Caifásan weari, nu uwítinka ni sacerdote apuri asamtai, Anása jeen ejéniaruiti. 14 Nu Caifás judío ainan chicharuk: “Ashi shuaran ayamruk uwemtikratnuka chikichik mantamnatnaiti”, tusa tina nuwaiti.
Pedro ju shuarnaka wainchauwajai tusa timau
(Mt 26.69-75; Mr 14.66-72; Lc 22.54-57)
15 Jesúsan jukiar umainakai, Simón Pedro tura nina unuinatairi chikishcha ukunam pataas wuwaiti. Tuma jeanam Jesúsan awayainakai, nigka sacerdote apuri waintai asa, apu aarin pegkramunam Jesúsan awayawarmataisha nisha wayawaiti. 16 Turasha Pedroka aag juakuiti. Tumamtai aa jiintuki waiti kuitamnun aujas awayawaiti. 17 Turamtai waitin kuitamin Pedron iniak:
“¿Amesha achikara juna unuinatairinchukaitam?” tusa tuina.
Tama Pedro chichaak:
“Atsaa, wika aunka wainchauwajai”, tusa tinaiti.
18 Nuna tusa ikuak sacerdote apuri inatairi aina, Yuus ememattasa iruuntai jean kuitamin ainajai jina ikaparar anamainamunam Pedrosha tsetsek asamtai, nui jeaan anamuk wajau.
Sacerdote apuri Jesúsan iniasmau
(Mt 26.59-66; Mr 14.55-64; Lc 22.66-71)
19 Nuna tumainai sacerdote apuri Jesúsan jeari chicharuk: ¿Amina unuinatairmesha ya ainawa? ¿Tura nitasha wari jintinname? tusa iniasuiti. 20 Tama Jesús ayak:
“Wika ashi shuar antuinamunam chichauwajai, iruuntai jeanam, tura Yuus ememattasa iruuntai jeanam wayaancha jintinkartinajai. Tura ashi shuar aina iruunainamunmasha uuknaka chichatsuk paan iwainakan chichauwajai. 21 ¿Urukamtai winasha ininme? Winaka inintsuk wii chichaamun antuku aina nu, warina pachisa jintinkartina tusam iniasarta, nita wii timaunka shir nekainawai”, tusa tinaiti.
22 Jesús nuna takai Yuus ememattasa iruuntain jean kuitamin chikichik shuar yapinam awatuk:
“¿Ameka sacerdote apurig tu ainam?” tusa tinaiti.
23 Turam Jesús chicharuk:
“Tuna pegkerchauncha chichaj nu ujatkata. Wii pegkerchaun chichatsaisha, ¿urukamtai awattame?” tusa tinaiti.
24 Nuna takai Anás, sacerdote shir apurin Caifás pujamunam akupeaksha jigkarmautak akupkauwaiti.
Pedro ataksha waitruamu
(Mt 26.71-75; Mr 14.69-72; Lc 22.58-62)
25 Nuna turuinai Pedroncha jina anamuk wajattamaun chicharainak:
“¿Amesha shuaran achikara juna unuinatairinchukaitam?” tusa tuina.
Nu tama Pedro chichaak: “Atsaa, wika aunka wainchauwajai”, tusa tinaiti.
26 Tusa titatmaun sacerdote shir apuri inatairi, kuishin Pedro asankauwa nuna patai iniak:
“¿Wii amina, númi arakmaunam nijai wajamin wainkachmakjam?” tusa tinaiti.
27 Nu tamasha Pedro ataksha waitrak: “Atsaa, wichauwaitjai” tai atash shinukuiti.
Jesús Pilato jeen ejému
(Mt 27.1-2, 11-14; Mr 15.1-15; Lc 23.1-5)
28 Turawarmatai Jesúsan Caifása jeen pujaun jukiar, apu Pilato pujamunam yama tsawai ejéniaruiti. Tura ejéniar awayaawarmataigka, pegkerchau utsumakar jiisat Pascuatin yurumak yuachaij tuina asar, shuar ainaka wayacharuiti. 29 Tumaina asarmatai Pilato jiinki wajas chichaak:
“¿Jusha wari pegkerchauna takasu asamtai jutikarme?” tusa tinaiti.
30 Nuna takai nita chichainak:
“Pegkerchaun takachkaigka juki itarmaitsujme”, tusar tuina.
31 Tuinakai Pilato chichaak:
“Atumek juka jukirum atum uruk shuar waitat suwa ainarme turusrumek waitkastarma”, tusa tinaiti.
Takai judío apuri chichainak:
“Ii judío ainatika Romanmaya apu ainatiram nu turatarma tichamu asar, shuarka maamain ainatsji. 32 Jesús yaunchuk chichaak: Tu mantuatin ainawai timau uminu asamtai nunaka”, tiaru ainawai.
33 Tuinakai Pilato nina jeen untsuk Jesúsan awayawaiti. Tura chicharuk:
“¿Judío ainan apurim amekaitam?” tusa inia.
34 Tusa tama Jesús ayak:
“¿Nusha amek enentaimsamkek inintam, atsaa chikich aina wina pachitas turamiarmataig turutam?” tusa tinaiti.
35 Takai Pilato ayak:
“¿Wii judíokaitaj? Amina pataim, sacerdote apuri ainajai, aminka juramkiar wini itarmarai. ¿Wari pegkerchauwa takasmam?” tusa tinaiti.
36 Tusa tamasha Jesús ayak:
“Wina inamtairua nuka ju nugka juinchuiti. Wii juiya akaigka wina unuinatair aina judío achikarai tusasha maanimain ainawai. Tumamain ainayat juiyanchu asamtai inaitusarai”, tusa tinaiti.
37 Nuna takai Pilato iniak:
“¿Nuiyagka ameka apukaitam?” tusa tinaiti.
Tusa tama Jesús ayak:
“Ame turutam nuka nekasaiti. Wiyaitjai apunka. Wika chicham nekasa nuna etserkattsan, jui tana akinawaitjai. Ashi shuar chicham nekasa nuna uminaka wina aparu inamtairin pujusartinaiti”, tusa tinaiti.
38 Nuna tu chichaakai Pilato iniak:
“¿Nekasa nu tame nusha warimpaita?” tusa tinaiti.
Nuna tusa ikuak Pilato aa jiinki Jesúsan itaawaru ainan apurin aujeak: “Wika ju shuar makumaku mantamnamaintrinka nekarachjai”, tusa tinaiti.
Jesúska akupnakchati timau
(Mt 27.15-30; Mr 15.6-17; Lc 23.17-25)
39 Atum jiisat Pascua jeakaigka shuar achikmau tuke jiin ainarme. ¿Atumsha uruk enentaimrum, atumin apurinak akupkattaj? tusa tinaiti. 40 Tusa takai ataksha senchi ashi chichainak:
“¡Nu shuarka akupkaipa. Antsu Barrabás jiikta!” Barrabáska magkartin ajakuiti.