1 Uruni bialu henedangi Iyibinaga Kini Tolemi waragane ibugua ami agali dewaore mo mogo bialu hene. Ibunaga ami agali daga labe nahe iba angeni iba mu ngadagua hene. Ani bialu ibunaga iba sibi dewabi wini. Ibugua Alegesanda mohondo howa Alegesandanaga dindi wiaru ibu bo yamialu ibunaga dindi dege wiagimbu bu ngelo ani. 2 Ani howa ibugua Siria dindi pialu agali ogoniha hearu baya hanguore bime ladebodebo bini. Ani biyagola wali agali tanoha hearume wai pabe panga payago dugua halu tini tagira puwa Kini Tolemi ngola hole pene. Abale howa Kini Alegesanda ibugua ibunaga wali agalihondo lamialu Kini Tolemi ogoni ibu imane kago ibiragola ibiribe lalu mo bila halimu, lalu lamini. 3 Anigo ainde tano mbira mbira pugu pugu bialu ibunaga ami agali maru helaga bini. 4 Ani bialu tigua Asadodo tano wiagoria tagira puwa tigua dama mitangi bialu bi pupu wiaga mini Dagononaga anda timbuni henego bo heda hene wiago Tolemi mo walia hene. Asadodobi tano emene emene wiarubi bo heda hai hene labu wiago de hendene. Wai bialu agali bo wahai henedaru dewaore wiago dengui hendene. Ani bialu agali maru Yonadanahanda anda heba heda anda hene biarunaga tingini Tolemi ibu polene harigani daga labe nahe wiaria hendene. 5 Wali agali bu hearu tigua mbirale uruni Yonadanahanda bini lalu lamini. Ani layago hale howa kini ibugua bi mbira ladai nabi dege hene. 6 Yonadana ibugua kini ibiyagola Yoba tano wiagoria ngola hole puwa turu halu ibiridago bayuwa birida lama pene. Libu gi tigani bialu turu haga bu howa libu haru tano ogoniha palene. 7 Ani bialu Kini ibu Yonadana libu haru pialu iba Eluderusu peagoria tagira pene. Ogoriani ngua halu Yonadana ibu Yarusaleme dai bini. 8 Anidagua bialu Kini Tolemihanda iba solowara angeange tano timbuni dunini wuyu pearu ibugua handame hai halu Selusia tano wiagoria handa tagi hene. Ibugua Alegesanda mohondo howa anidagua bini.

9 Ani buwa Kini Tolemi ogoni ibugua Kini Demidiriasa hearia bi lo pelalu howa lalu, Habo nalolene bi mbira lo wibiya. I̱ wane Alegesanda ibu dabu biyago wahalu haru dai berogola í̠ dabu bibelo. Ani bialu dindi í̠ abanaga winigo í̠nime handaya ho hai habelo. 10 Ainde Alegesanda ibugua í̠ bo wahole manda bialu hearia nde i̱ wane hono mirugo daraba. 11 Ibugua bi gendabi ogoni lenedago inane Alegesandanaga dindi baya wiago dimagoli ho howa anidagua lene. 12 Kini Tolemihanda ibu wane Alegesanda miyago lone haru dai bialu Kini Demidiriasa daubilo mini. Ibugua ogonidagua bialu habo nalolene bi lo wiribidago puguini. Ani bialu wali agali bibahende deni libu harume waitigi haga haga bini. 13 Mani howa Kini Tolemi ibu Andiogo tano ngagoria pialu ibu Sirianaga kini hene. Anidagua bialu ibu dindi kira Iyibi kini halu Siria kini halu bini.

14 Ogoningi Kini Alegesanda ibu Silisia wali agalime gabumanenaga bi mo wahayaya handala ibu ogoniha hama pene. 15 Ani howa Alegesanda ibugua mbirale Tolemihanda ogoni biya layago hale halu ibu Tolemila wai bule pene. Ani pialu hearia Tolemi ibu ami agali dewaore daga lamibe nahe haru halu harigani ibalu Kini Alegesanda ngola hayagola Kini Alegesanda halu ibunaga ami agali ibida piai hene. 16 Ani piai hayagola Kini Alegesanda ibida pialu Arebia dindi ha do heagola ayu Kini Toleminaga mini daliga mini lene timbuni hene. 17 Ani pu hado hearia agali mbira Arebiaali mini Sabadiele henegome Kini Alegesanda balu ibu haguane Kini Tolemi hearia pugu yalu pu lalu mini. 18 Anigo horo tebiru hangu howa nde Kini Tolemi ibunibi homa dege bini. Ani homayagola wali agali dindi anduane tano bibahendeha bu hearume Toleminaga ami agali wai pabeanda hongohe haru bibahende bo wahai hene. 19 Anidagua biyagola mani mali handari mbira pira waragariani karia (167) hayagola nde Demidiriasa mende ibu kini pigane hene.

20 Ogoningi Yonadanahanda Yudia dindiha agali bu hearu mo ngoai hai howa wai biaga masini hongoheru Yarusaleme tanoha wai pabe hongohe hearu bo gialanda holenaga wabialu hene. 21 Ani bialu heagola Yuda agali ko maru Yuda tini aria turu nahaga hearume kini hearia puwa lalu, Yonadanahanda Yarusaleme wai pabeanda hongohe biago ho hagira bida, lene. 22 Kini Demidiriasa ibu bi ogoni layago hale howa keba timbuni halu abale heyalu Tolemese tano pole pene. Puwa ibugua beba mbira gili buwa Yonadana hearia pelalu howa lalu, Wai bialu harugoni wahalu bi midini mbira lami̱ya abale ibabe, lalu gilibu wia hene.

23 Yonadana ibugua beba ogoni dagalo handa hondowa dege wai wanahe bialu haabo hene. Ani bialu howa dege ai agali haguane marubi Anduane Homogonaga loma binigo mo miaga marubi ti haru kini hondo pole dabene. Ibuha ko mbira anda ibulubadago gi naheore hene. 24 Ibugua ngolobi silibabi agabi dewaore bame talebu migi bulenaga yalu Tolemese tano pene. Anda piyago hondowa kini ibu turuore timbuni ho hene. 25 Yonadana ibuni aria hearu marume ibuhondo keba howa Yonadanahanda ko biya lowa bi laga laga bialu hemiria 26 kini ibugua Yonadanahondo mana bayale kini ale henerume biagadagua dege bini. Ani bialu ibuni damene bu hearu deni howa kini ibugua Yonadana mini yaraga hene. 27 Kini ibugua Yonadana ibu Anduane Homogonaga loma binigo mo miaga agali haguane timbuni helo mo hongo halu mini lene timbuni helo mo yaraga halu ibu mini Kininaga Nenege ho bamba hene ka, lalu bini.

28 Ani bialu Yonadana ibugua kinihondo hale halu, Ibugua muni siliba daosini dege genda magi kilogarama pira (10,000) nguliya í̠na dagisi muni Yudia dindihabi dindi tebira Samariaha howa bo yu anda ibini biaruhabi nami wahabelo hameledo, lalu kini hale hene.

29 Ai kini ibugua bi Yonadanahanda ibuhondo hale hayago e̱ lalu ibugua Yonadananaga beba gilibu wia halu ladai bini. Ibugua bi lenedago ogo,

30 Kini Demidiriasahanda ibu hameneore Yonadana halu Yuda wali agaliru bayale kemida lara.

31 Iname beba mbira gili bialu í̠naga te gili buwa ina hanini Lasenesenaga wia harima. Beba ogoniha bi ogodagua gili birima.* Yonadana ibu kini hamene henene ndo halu Lasenese ibubi kini hanini ndo hene. Anigo Kini ibugua agali kira ogoni labonaga mini mo yaraga halu bi ogonidagua gili bini.

32 Kini Demidiriasahanda ibu hanini Lasenesehondo lalu, Bayale kebe. 33 Iname Yudia wali agalihondo mana bayale bimi̱ya lalu bi lo wirimagoni tiore inanaga nenege howa tigua ina baba habo nalolene bi pongo winigo hongo howa yu ka. 34 Tigua Yudiaha dindi dewa bu ngarubi dindi tebira Eberaimibi Lidabi Arimadia ngagobi tigua handaya ho helo karulape larima. Dindi uruni iname Samaria dindiha howa mo bagi halu Yudiaha wiatago helarima. Wali agali Yarusalemeha lotu lole poragobi biamogo bimi̱ya larima. Ani bialu mabuha tomo hengedagonaga dagisibi ira lini dedarunaga dagisibi kinihondo mani lone namule larima. Muni uruni wahalu tini yu howa Anduane Homogonaga anda kagoha biabe bulene ngago bule ti yu helo larima.✡ 1 Mag 10.30 35 Ani bialu dagisi maru tigua ngiaga wini mbirale bibahendenaga pinibi ibinaga dagisibi kini ibuninaga dagisibi uruni bibahende waharima. 36 Bi beba uruniha gilibu ngaruni mbirago maniorebi mbiralime mo iriari nabulebiraore.

37 Iname ani ledemagoha bi mbiraore helo í̠nabi beba mbira tigua dagalalu hari nene loma bia hene ngagoria handalu mo ngelelo gili bialu pelabe, lalu lo pelene.

38 Dindi Kini Demidiriasa ibugua handaya ho howa haru hene wiago bibahendeha wali agali tini mabuha ira lini daga hearu andaneha mbirale mbira gi nahe hadapaya bu hearia hendene. Ani bialu ibula waitigi mbira naheore hene. Ani howa ibunaga ami agali bialu biabe wahalu tini andaga dai biai helene. Anigo ami agali iba dege dombeneha howa ibini hearu dege ibuni heba hole helene. Anigo ami agali maru ala ibu aba heba biabe bialu lu hene bu hearu tigua dege tinaga biabe nawiyagola tinaga miniha Kini Demidiriasa baba genda yu hai hene. 39 Ogonigo agali mbira mini Tiribo hene. Bamba ibu Alegesanda baba mandagi hagaore mbira henego ibu hondo hearia Demidiriasanaga ami agali bu hearume keba hai ho heago hendene. Ani handalu Tiribo ibu Arebia dindiha agali mbira mini Imalague ibu Alegesanda igini Andiogusu henego ogoni handaya ho haga henego ogoni hearia pene. 40 Tiribo ibugua Imalaguehondo hongo howa hale halu lalu, Andiogusu ibu haru dai buwa ibu aba Alegesandanaga henge mialu kini haaribia helo haru poliya i̱naga giha yaha, lene. Ani bialu Tiribo ibugua te maru Demidiriasanaga mana ogobi nga lalubi ibunaga ami agali hearume ibuhondo turu naheore hearubi lamiai hene.

41 Ai Yonadanahanda Demidiriasa hearia bi lo pelalu, Kininaga ami agali Yarusaleme wai pabeanda hongohe ngagoha karu haru tagira pialu Yudiaha wai pabeanda hongohe maru ngaru ami agali bu karu bibahende hai tagira piai habe. Agali uruni tigua Isaraele wali agali bu kagoha wai bule duru bialu haabo kago ani bibe, lalu lo pelene. 42 Ani layayago hale howa Kini Demidiriasa ibugua Yonadanahondo ladai bialu lalu, Mbirale í̠na hale haridaruni i̱na karulape laro. Ani bialu i̱na í̠naga mini yaraga holebi í̠naga dindininaga mini yaraga holebi harigabi taya bialu ko. 43 Anidagua buliya ainde i̱naga ami agali hearume i̱naga bi mo wahalu piai hayago ainde í̠naga ami agali i̱ biamogo bule ibulene karulapeda, lalu lo pelene.

44 Ani layayago hale halu Yonadana ibugua ami agali pari wayali wai hongohe biaga hearu daosini tebira (3,000) bibahende Andiogo tano pelene. Yudia howa ami agali biaru Andiogo tano anda piyagola Kini Andiogusu ibu turu timbuni hene. 45 Ayu dege wali agali dindi ogoniha howa daosini dege handari mbirani pira kira (120,000) íbu ngoai howa kini bo wahole bialu hearia ibiyagola kini ibu turu hene. 46 Ai kini ibu ibida ibuni andaga piyagola wali agali tano ogoni bi hearume hariga wiadagua tini gungu bima pugu pugu bini. 47 Ani bialu hearia Yudia ami agali biaru olayagola tigua ibalu kini biamogo bini. Ani bialu tigua tanoha hariga pearu bibahendeha piai halu wali agali bai halu horo ogoningi daosini handari mbira (100,000) bibahende bo wahai hene. 48 Tigua kini baya hangu handaya ho ha howa tano ba heda hai halu dindi anda bibahende bo heda hai halu mo labu hai halu dabudabu bayale wiaru ti mo yai hene. 49 Ai Yudia ami agali biarume tano timbuni wiago ti handaya ho heagola ti mogolo hendene. Ani hondowa tigua kinihondo wai wahalu ti daraha lalu hale hene. Tigua ibuhondo lalu, 50 Í̠naga miniha keba ho kegoni wahalu Yudia ami agali bu karume ina baba wai nabi mo palia halu gi tigani ladaba, labe, lene. 51 Ani lalu agali wai biaga tanoha hayadaru tinaga mbirale wai biaga wiyadaru wahai halu wai palene. Ani bialu kininaga denibi ibunaga wali agalinaga denibi Yudia ami agali biaru ti mini yaraga hene timbuni mbira hene. Ani bialu Yudia ami ti waiha howa dabudabu bayale tara tara mo yayaru yalu tini dalu dai bini. 52 Ai Kini Demidiriasa ibugua ibunaga dindi baya hangu handaya ho heagola ibunaga wali agali emene tigi mbirani hangu bayale hene. 53 Anigo mani howa kini ibugua habo nalolene bi lo wiyago mo habo lene. Ani bialu ibugua Yonadanala mandagi nahe wahalu Yonadanahanda ibuhondo bayale bialu hayarunaga yolo mbirale mbira nami wahalu ibugua Yonadana mo genda halu hene.

54 Mani mbirungi Tiribohanda igiri emene Andiogusu haru dai buwa ibugua kininaga manda mo karula hene. 55 Ami agali maru Demidiriasa ibugua biabe wahalu tini andaga pudaba layaru ayu ti pialu Andiogusunaga ami anda piai hene. Ani puwa tigua Demidiriasa baba wai biyagola Kini Demidiriasa ibu ibida pora bialu pene. 56 Ani piyagola Tiribo ibugua nogo elebana dewaore haru howa Andiogo tanoha agali haguane howa handaya ho hene. 57 Ai igiri emene Kini Andiogusuhanda beba mbira gili bialu Yonadana hearia pelene. Ibugua lalu, Í̠ Anduane Homogonaga loma binigo mo miaga agali haguane timbuni habelo karulape lalu i̱naga dindi hobane maria ngago í̠na handaya ho habelo yupe halu i̱na í̠ mini Kininaga Nenege lalu laro, lene. 58 Ani lowa ibugua beledi be ngolome wabini wiaru mo wia halu ibugua lalu, Yonadana í̠na kininaga aga daramabi ngago karulalu ngolome wabini mandibu kini ibuni aria darama mbiraoreme karulaga ngago mo karulalu bibe, lene. 59 Ani bialu Yonadana hamene Saimono ibu gabumane agali haguane dabo helalu ibugua tano maru iba solowara bedago angeange wuyu pedaru Ponisia howa pialu Iyibi dindila tubari ngagoria handatagi helo dabo helene.

60 Ai Yonadana ibu dindi maru iba Yuberedisi doma ederahayagi wiaruha pole ibunaga ami agali hearu haru halu puwa dindi uruniha tano wiaruha anda pu haga bima pene. Ani piyagola Siria ami agali hearume ibu heba mini mbiraore halu ti heba mandagi haga bini. Ani bialu ibu Asagelono tano wiagoria anda piyagola wali agali tanoha hearume ibu ibiyagola turu howa ngola hole tagira ibai hene. 61 Anigo ai ibu Gasa tanoha anda piyagola wali agali tanoha hearume tano pabe panga payatagi hene. Ani biyagola ibugua ti baba wai bialu bo poda hana howa bope howa dindi emene emene wiaru bo heda heda hai halu mbirale dabudabu bayale wiaru mo pagebu yaiore hene. 62 Ani biyagola wali agali Gasa tanoha haga hearume Yonadanahondo hale halu, Keba hadalu wahabe, lene. Ani layagola ibugua ti baba gi tigani lalu wahene. Anigo agali haguane hearu igini dege minalu Yarusaleme garabaya helo haru piaga hene. Ani bialu ibu pialu Damasagasa tano puabo hene.

63 Ani pu howa Yonadana ibu hale halu hearia Demidiriasanaga ami agali dewaore haru halu ami agali haguane mbira hariga Yonadana dai bulebiyago hapai hole Galiliha Kadese tano wiagoria íbu ka layago hale hene. 64 Ani halu howa ibu hamene Saimono Yudia dindiha helalu Yonadana ibugua ngola halu wai bule pene. 65 Saimono ibugua Bedesua tano kawareni wai bialu luore biaho wini. 66 Ani bialu howa tigua Saimonohondo wai wahalu gi tigani lama layagola Saimonohanda karulape lalu anidagua bini. Ani bialu ibugua wali agali tano ogoniha haga hearu taliatagi hai howa ami agali marume tano ogoni handaya ho helo helene.

67 Ai Yonadana halu ibunaga ami agaliru puwa iba kuyama Genesarete bereago angeni balai anda bialu hene. Ani bialu gao layagola heyalu dindi tigabi Haso tano wiagoria tagira pene. 68 Ani pialu hearia waitigi maru dindi tigabi bayale wiagoria ibu ngola hene. Anigo ti aria maru hari bare wiagoha hado heago Yonadana ibu manda nabi hene. 69 Ai ami agali maru hari bareha hado hayaru tagira ibalu waiha hatago hayagola 70 Yonadananaga ami agali hearu ibida piai hene. Ani biyagola ami agali haru haga haguane kirali hangu Abasalomo igini Madadiasala Kalabisi igini Yudasala hangu Yonadana heba ona hene. 71 Ani biyagola Yonadanahanda taga timbuni halu be abalu ibunaga haguaneni dugu wialu ibugua Anduane Homogohondo bi lene. 72 Ani lalu íbu dai buwa waitigi baba wai bialu waitigi bope hayagola ibida piai hene. 73 Ai Yonadananaga ami agali abale ibida piyaru tigua handalu hearia Yonadana handalu ibida piyago hondowa tibi nde lone íbu dai bialu ami agali hatago hene. Waitigi talima pialu Kadese tano tinaga balai anda bu hene biagoria tagira pialu dindi ogoni Yuda ti karulene. 74 Ai waitigi daosini tebira (3,000) bibahende horo ogoningi dege homai hene. Ani biai halu Yonadana ibu Yarusaleme dai bini.