1 Ai Saimono ibu hale halu hearia Tiribohanda ami agali dewaore haru halu Yudiaha wali agali bu karu bo hilo wahai hole ibira layane hale hene. 2 Ani hale ho hearia wali agali bu hearume gi howa mogolalu duru timbuni lalu heago hendene. Ani hondowa ibu Yarusaleme pialu ti haru mandagi hene. 3 Ani howa ibugua tinaga miniha mo hongo halu lalu, Ai i̱ hamenerubi i̱ aba ibu damene bu hearumebi Anduane Homogonaga anda bayale ngelonaga baya hangu handaya ho halu Mosesenaga bi mana lo wini ngagobi bayale ngelonaga handaya ho halu buwa timbuni bialu harimago tínime handalu manda bu kemi. Ani bialu howa iname wai timbuni bialu harimagobi genda tara tara dewaore yu harimagabi tí manda biai kemi. 4 I̱ hamene bibahende Isaraele wali agali biamogo bialu homai hayagoni ndobe. Ai i̱ hangu wahenego o kogonida. 5 Ai wai birimagoha i̱ni hangu homolino wai bialu henebe toba holemini nahalimu. Ainde i̱ hameneru ti dindiha lowa i̱ daliga ndo ko. 6 Ayu agali dindi tara taraha bu hearume ina bo hilo wahaiore holenaga ti mo mogo biai halu wai mo miyadagola i̱na nde inanaga dindibi Anduane Homogonaga anda kagobi tinaga wali waneigini biru karunagabi wai bulene hamelo kogoni, lene.

7 Wali agali tigua Saimononaga bi ogoni hale howa tinaga bu mini ha lone hongo hadai bini. 8 Ani howa tigua hongo howa ladai bialu lalu, Saimono í̠ inanaga agali haguane kegoni. Í̠ hamene Yudasala Yonadanala libunaga henge mialu libu henedagua í̠ni ha aribia ha. 9 Ani bialu inanaga wai bia ha. Ina bibahende í̠ hangu talima ibule kema, lalu bibahendeme lai hene. 10 Ai Saimonohanda ami agali hearu bibahende mo mogo biai howa Yarusaleme tanoha wai pabe hongo howa biai halu tano maru wiaruhabi lone mo hongo halu abale biai helo mo daila hene. 11 Ani bialu ibugua, Abasalomo igini Yonadana halu ami agali dewaore Yoba tano pole pudaba, lene. Ani laya handala puwa Yonadana ogoni ibugua wali agali tano ogoniha hagane hearu bo taliatagi hai halu tano ibu karulo hene.

12 Ai Tiribo halu ibunaga ami agali dewaore Tolemese tano wahalu Yudiahayagi anda pene. Ogoningi Saimono hamene Yonadana garabaya helowa Tiribo heba mandagi Yudiaha pole pene. 13 Horo ogoningi Saimono halu ibunaga ami agali biarume puwa dindi tigabi mbira wiago gibuniha Adida tano wiagoria balai anda bialu hene. 14 Ai Saimono ibugua ibu hamene Yonadananaga henge mialu agali haguane ha aribia howa wai bule manda manda bu ka layago Tiribo hale hene. Ani hale howa Tiribo ibugua Saimonohondo lawia halu lalu, 15 Í̠ hamene Yonadana ibugua Yarusalemeha agali haguane hayago howa kininaga dagisi muni namiyagonaga ibuni garabaya helowa ina haru mandagi kema. 16 Ainde tigua siliba muni dewaore genda magi kilogarama daosini tebira (3,000) ibilarimiyagua nde ibu garabaya kago golope halu pu loleberema. Anigo ai garabaya golalu pu laramagola mani lone mine holigo ibu igini kirali kago labo ina baba howa libu aba henegoria ha aribia helo ibilalimu, lalu bi lo pelene.

17 Ani lo wia hayayago hale howa Saimonohanda ami agali lo manda bialu, Yonadana igini kira ogoni labo haru ibidaba, lene. Saimono ibu Tiribohanda bi layadago henene ndo layada lo manda bu howa dege Yuda wali agali tigua ibuhondo keba howa lalu, 18 Saimonohanda siliba muni biarubi igiri kirali ogoni labobi napelayagome nde Yonadana homaragonida, lalu ibuha bi podene ngelolobada lo manda bini. 19 Ani manda buwa ibugua munibi igiri kiralibi pelene. Ani pelayagola Tiribo ibugua henene bule lalu gi dolalu bi lo wiyago mo habo lalu ibugua Yonadana garabaya golope nahene.

20 Ani bialu mani howa Tiribo ibugua Yudia dindiha dewaore mo ko hole emene hama anda ibugu bini. Ibugua hariga paulalu Adora tano pole piaga luore wiadagua pialu pene. Ani pialu hearia Saimono halu ibunaga ami agalirume hariga ogonidagua dege pialu Tiribo pole piyago hariga hapai hene. 21 Ani bialu heagola ami agali maru Yarusalemeha wai pabeanda hongohe wiagoha haga hearume Tiribo hearia bi lo pelalu, Ina tomo nawiore kemago tomo maru yalu hariga dindi ko wali agali nahaga ngagoha ibalu tomo yalu ibabe, lalu hongo howa bi lawia hene. 22 Anidagua layayago hale halu ibunaga ami agali nogo hosini biruwa wai biaga bu hearu tigua pole manda manda bu hadaba lalu lamini. Pole manda manda bu palearia mbiraga ogoningi dindi guni timbuni ibira howa hariga polebiyago wiapai hene. Anidagua biya handala ti emene hadai bialu Gileada polene hariga wiadagua pialu pene. 23 Pialu ibugua Basagama tano wiagoria tagira puwa Yonadana ogoriani howa homelo bo wahene. Ani biyagola ibunaga tingini dindi ogoniha mo hora hene. 24 Ani bialu Tiribo ibu ibuni dalu dai bini.

25 Ani biyagola Saimonohanda agali maru ibu hamene Yonadananaga tingini mo pudaba lene. Mo yu dai biyagola ibu mamalirunaga tano Modeini tano wiagoria hora hene. 26 Ani bialu Isaraele wali agali ti Yonadana dara howa dugu bialu duguanda luore horo dewa berene. 27 Ani bialu Saimonohanda ibu aba hameneru mitangi bu haabo holenaga tinaga homalini anda mbira daliga bu gimbu bima irigi howa bu helene. Anda bu gimbu bima irigi hene ogoni dindi kaundiaha howa panaga handai habehe daliga dege hene. Anda ogoni erembirahabi tombehabi ege to̱le̱ ngiringarale muni yolo dewaoreme miaga wiarume mo yaribia helene. 28 Ani bialu nde Saimono ibu aba ai̱yalabi ibu hamene marialirubi mitangi bialu ege to̱le̱ timbuni karia mo dabadaba howa ogoriani dege ngelene. 29 Ege to̱le̱ ogoni wiyadagoria ira timbuniru gombedo yu ibuwa ira ogoriani aminaga wai yari biaga wiaru gili buwa bigiya wabu ngelalu iba sibinaga bigiyabi wabu ngelalu buwa hengene. Ira timbuni dibu hangaga binidaruni agali wai pialu tigua bo poda hana haga bini mitangi bialu daga lowa helene. Saimono ibugua mitangi bialu. Wali agali dindi tara tarani bu karume ibalu de handai helo mitangi buwa ani wabu helene. 30 Ai mbirale uruni ayu Modeini tanoni homali kagoria haabo ka.

31 Ai Tiribohanda Kini Andiogusu waragane igiri emene dege hayago mohondo howa homelo bo wahene. 32 Ani bialu Tiribo ibuni Sirianaga kini ho aribia howa ibugua dindi ogoniha mana ko dewa bialu hene.

33 Saimonohanda Yudiaha tano wiaru dewaore mo arema bialu hongohe ngelaga bialu hene. Wai pabe neneni mamageali de handa pugubu hagane anda daliga bu helaga bialu wai pabe ege pabe hongoheore bu helaga bialu wai pabe panga bengena aeane hongoheme helaga bini. Ani biai howa tano wai pabeanda hongohe uruniha tomo dewaore bu ngelaga bini. 34 Ai Saimonohanda Kini Demidiriasahondo bi agali kiralime lo yu pudaba lowa lalu, Tiribohanda ibu daluha mo ko halu mbirale mo page bialu haabo kago ainde ibu daluha howa dagisi muni miaga wirigo emene yupe harebe, lama pene. 35 Ani layago hale howa Kini Demidiriasa waragane heago ibugua beba gili bialu bi ladai binigo ogo,

36 Kini Demidiriasahanda agali Anduane Homogonaga loma binigo mo miaga haguane timbuni Saimonobi Yudia wali agali bibahendebi tinaga agali haguanerubi turu haro laro. 37 Tígua manda ngolome wabinibi ayage alenaga yunibi wia harimiyago mirimago ai iname tí baba gi tigani bule manda manda bu kema. Ani bialu inanaga agali haguane bu karuhondo tíha dagisi mulene nawi lalu abale lamirima. 38 Habo nalolene bi ala lo wirimago iname bi ogoni karulape lalu haabo kema. Tígua wai pabeanda hongohe bu helaga bidemigo tíniha ha helo laro. 39 Ai mana ko tígua abale howa bialu henego ayu bialu haabo kemigoni bibahende wahai harama. Ani bialu kininaga dagisi muni yolo bulene winingi nabi ngelo kemigobi waharama. Ani bialu dagisi muni Yarusalemeha miaga winigo nami harimagobi mo waharama. Ani bialu dagisi muni maru tara tara Yarusalemeha miaga wirimagobi waharama. 40 Ai Yuda agali wai biaga pari wayali kemiru tí maru kininaga ami agali hatago hoa biyagua nde ani bulene karulape ka. Ina kemagoha mo ko holene nawi bayale dege hami̱ya hamelo kema, lene.

41 Ai mali handari mbira pira karia (170) hayangi howa Isaraele tiha wali agali Anduane Homogo mitangi nahaga hearume Isaraeleali abale haru henego ogoriani howa haru nahe wahalu pene. Isaraele wali agalirume tini hangu halu bayale hene. 42 Ai Saimono ibu Anduane Homogonaga loma binigo mo miaga haguane timbunibi ibu ami agalinaga agali haguanebi Yuda wali agalinaga agali haguanebi ibu pigane hayangi howa tigua habo nalolene bi lo wiaganerubi uruniale lo wiaganerubi horo ogoningi howaore tini hangu lalu gilibu wiaga hene.

43 Ogoningi Saimono halu ibunaga ami agali heba pialu Gese tano wiagoria pialu balai anda buwa ami agalime tano ho mabubu hene. Ani howa tigua wai biagane masini mbira wabuwa tanoha wai pabe heagoha wiapara howa ngelowa pabe neneni mamageali handa amu nana bu holene anda pabe neneni heago tigatiga masini biagome pabe bo gialayagola anda daliga wai pabe neneni heago podope hene.✡ 2 Mag 10.32-38 44 Ani biyagola Saimononaga ami agali bu hearume miyagola ami agali masini biagoria hearu abale tanoha porabu anda hayagola wali agali tanoha bu hearu bibahende ibida pora bialu piai hene. 45 Ai wali agali tanoha bu hearume tinaga aga minu budalu tanonaga wai pabe egeme bini heago neneni irigi hai halu tigua Saimonohondo wai wahalu gi tigani lama lowa hongo howa bi ladagadaga bialu hale halu hene. 46 Tigua lalu, Ainde ko iname birimago damene bibahende mitangi bialu pani nangi wahalu ina dara ha, lalu hene.

47 Ani layagola nde Saimono ibugua wai wahalu tinaga bi layago hale hene. Anigo ibugua wali agali tanoha hearu bo taliatagi hai halu mbirale dama mitangi bialu bi pupu wiaga gime wabini wiarunaga anda hearuha mbirale ko uruniale wiaru mo wahai halu anda hearu lone mo bayale haga bialu hene. Ibu tano ogoniha anda pialu howa ibugua Ngode Datagaliwabehondo turu halu iba gana lama anda pene. 48 Ani bialu tano ogoniha mbirale Ngode Datagaliwabenaga deni dodohe wiaru bibahende mo wahai halu agali maru Mosesenaga bi mana hale howa talialu haga bu hearu haru halu ibuwa tano ogoniha helaga bini. Ani buwa wai pabe baya hangu mo hongo howa biatiga bialu ibunaga mbira tano ogoniha bu helalu bini.

49 Ogoningi Yarusaleme tanonaga wai pabe timbuni heagonaga pabe panga ndibulo waheagola agali wai pabe andaha haga bu hearu tomo taya magedi tagira pobe naheore wini. Ani wiagola ti tomo nalu holene mbira nawiore howa dewa hina garime homai hene. 50 Anidagua biyagola tigua Saimonohondo lalu, Waitigi wahalu gi tigani bima, lene. Ani layagola ibugua ti baba gi tigani lalu dege agali wai pabeanda hongohe ogoniha haga hearu bo talia tagi halu anda Anduane Homogonaga deni dodo nahe helo lone mo bayale hene. 51 Ai mali handari mbira pira kariani mbira (171) heagola mali ogoninaga ege mendenaga horo pira kirani tebira (23) hayagola Yuda tigua wai pabeanda hondole Yarusalemeni hayagoha pigane anda pene. Puwa Saimono halu ibunaga agali bu hearume Ngode Datagaliwabehondo turu timbuniore halu tigua ira maganeru podo yalu tigua ngidaru tabagerubi balu iba ganaru lama anda pene. Tinaga waitigi timbuni henego mo ko hayagola tigua Yarusaleme turu timbuni halu hene. 52 Ani howa Saimonohanda mana mbira ogobi wabu wini. Mali bibahendenaga horo ayu kemago dege tagira ibiragola turu ho holene horo ngelo dabaro, lene. Ani lowa ibugua Anduane Homogo andanaga wai pabe abene pabeanda hongohe heagohayagi heago baya hangu mo hongo howa hongoheore bialu agali marume obisianda dunini ogoniha bu helene. 53 Ani buwa ainde Saimono ibuni igini Yone anda halu agali hongohe dege heagola ibugua Yone ogoni ibu ami agali haru hagane agali haguane helo dabo helene. Ani helaya handala Yone ibu puwa Gese tanoha hene.