1 Horo mbirangi igiri karia hamenema heba ti ai̱ya minu garabaya helene. Kini ibugua ti nogo nolene nga lowa nogo nelonaga tibumebi gewa tibumebi mo ko howa bo dambini.✡ Hi 11.35-36 2 Hamene kariama uruni mbirago ibugua tinaga bi lahaga howa lalu, Kini í̠na inahondo bi hale harego damene bibahende mbiraore hangubi mbira gi nahe ladai biai holeberema. Í̠ ina bo wahai holene manda bu heaguabi iname gi nahe elaheore howa ina mamalinaga mana lo wini ngago napuguleberema ndobe, lene.

3 Kini ibu bi ogoni hale howa ibu keba timbuni howa ibunaga biabe biaga hearuhondo parabane timbuni wiago do kundi yakundi bilo ira timbuni delalu todobene be timbuni wiagobi dalu do kundiore bilo ira bo deladaba lalu lamini Kini ibugua bidaba layago hale halu agali biabe biaga hearume abale ira delai hene. 4 Tigua ira delo manda manda biai heagola kini ibugua agali biabe biaga hearuhondo lalu, Igiri kane bi laga biagonaga hége gandulalu embonenaga dongone bibahende lagalo wahai halu gi gebi minu gandulo wahai halu bidaba, lalu bini. Anidagua biyagola ibu hamene hearubi ibu ai̱yabi handaya ho hene. 5 Anidagua bialu ibunaga tingini podabaga biyago bilowa ibu buhe emene wiaabo hene. Ani wiagola kini ibugua agali biabe biaga hearuhondo lamialu, Igini ogoninaga tingini parabane timbuni do kundibu wiagoria mo deladaba, lene. Ani mo delayagola tingini biaga dalu do hagua bialu heagola ibu ai̱ya hamene biaru tigua tininaga miniha gi nahe elahe howa homolenaga mini mo hongo haga bialu hene. 6 Tigua lalu, Inanaga Anduane Homogo Ngode Datagaliwabe ibunime ina ayu ogoni de handaya ho kago. Ani howa ibugua ina dara holebira, lene. Bi ogoni bamba Mosesehanda lo wini ngago heneneore tagira pelonaga bi layago ogo, Ngode Datagaliwabehanda wali agali ibunaga biabe bialu haga karu dara holebira, lalu lo winigo ngola haya.✡ Man 32.36

7 Hamene karia biaru hamene wahene biago homayagola ai mendegobi o biadagua dege bialu homelo bene. Tigua ibunaga haguane dongone poda lagalo wahalu nogo mbirini podo wiagoria lowa nanayagua tigua ibunaga tingini balu bo podahole buleberema lene.

8 Ani layagola ibugua ibuninaga bi laga wiago lowa hongo howa ladaga halu lalu, I̱ nogo mbirini ogoni nolene nawigo nanoleore laro, lene. Ani lalu ibubi nde tandaga timbuniore ibu hamene wahene biagome nayago dege nalu homene. 9 Ai ibu homoleore howa ibugua bi hongo howa lalu, Í̠ore dama Heyolabe igini kegome inanaga dindini emene holene ngago í̠na bameore mo tubagi haregonida. Anigo dindi ogonaga Kini Ngode Datagaliwabe ibunime inanaga haabobo holene wia kago lone mo ngulebira. Ina homaramago irane iname ibunaga bi mana lo wini ngago pugua nabulenaga homarama, lene.

10 Ani bialu ti hamene tebonego bene. Bole howa tigua igiri ogoni nogo mbirini wiago nelo mini. Ani miyagola ibugua nogo ogoni mo wahalu ibunaga hége dolatagi halu gi geru gandulo wahelo dogo ba amu hene. Ibugua gi nahe elahe howa ani bini. 11 Ani howa ibugua tihondo lalu, I̱naga tingini ogoni Ngode Datagaliwabeha howa minigo ainde ibunaga bi mana i̱naga tingini ale ndo daligaore nga. Ani bialu Ngode Datagaliwabe ibunime i̱naga tingini ogoni lone ngiadai bulebira lo manda bido, lene. 12 Ani layagola kini halu ibunaga agali bu hearume handalu hearia igiri daliahe biagome homolene gi naheore howa ibunaga tingini embeda ho heago hondowa ti mogolo hene.

13 Hamene tebone biago homayagola manego ibubi nde tandaga mbiraoregobi dege nene. 14 Ai ibu homole howa ibugua kini lamialu lalu, Wahalu i̱bi homoliya badaba. Anigo mani Ngode Datagaliwabehanda i̱ lone mo heya howa i̱naga holene lone ngiadai bulebira. Anigo kini í̠hondo larogo. Í̠ore lone mo heya naholebiraore ndobe, lene.

15 Ai tigua igiri daunigo haru ibuwa ibu mo tandaga halu hene. 16 Ani bialu heagola ibugua kini de handaya howa lalu, Ayu wali agalihondo mbirale í̠nime bua biragoale bialu kego mani í̠nibi homa dege bulebere ndobe. Ngode Datagaliwabehanda ibunaga wali agali ina bu kemaru yu wahayada lo manda buleni nabibe. 17 Ai Ngode Datagaliwabe ibunime í̠ pani nabelo mo ngialu í̠ni waneigini aguane holebirarubi pani nalu haabo holebira, lene.

18 Tigua igiri daunigo beagola igiri waraganego haru halu ibini. Ibuwa homole howa ibugua lalu, Í̠na minime í̠ni mo hondo helo holeni nahabe. Inanenaga ko bini ngagome ina pani nalu kemago. Iname Ngode Datagaliwabehondo mana ko birimagome mo ko halu tandaga nolene tara tara inaha anda ibira. 19 Anigo í̠na Ngode Datagaliwabenaga tandaga holene ngagoria howa yo pialu pubagi holobada lo manda buleni nabibe. Yo pialu napolebereore ndobe, lene.

20 Ainde iname wali bayale igiri uruni ai̱ya bedago embeda nahami̱yago irane ibunaga mana baya taraore ibu igini uruni bolanguahe berene. Ibu heyu howa deme hondo heaore dege ibu igini karia biaruni horo mbira ogoningi dege homai hayago hendene. Ibunaga bu miniha hongoho howa ibugua tandaga uruni yai henego irane ibugua Ngode Datagaliwabehondo mini mbiraore hongohe wu heagome hongo ho hene. 21 Ibuninaga bi lalu ibu igini biarunaga bu miniha mo hongo halu hene. Wali ogoni ibugua hongo agalime ho hagagobi howa ibu igini biarunaga bi lowa lalu, 22 I̱naga tombeha howa igiri uruni agua taba hanarube tobara. I̱na tínaga holene buhe mo wia hene ndo. Tínaga tinginibi i̱na wabinibi ndo dege. 23 Anduane Homogo ibunime dindi harila wabialu ibugua ina wali agalibi wabini. Dindini karubi ngarubi bibahendenaga tene ibuniore ka. Ainde ibunaga dara holene irane nawini dara haga kagome tínaga buhe lolenebi holenebi lone ngiadai bulebira laro. Ani bulebirago irane tí ayu homaramigoni irane tíni hangu bame homa ndo ibunaga bi mana ngago napugule lowa hongo ho kemigome homaramigonaga ngulebira, lene.

24 Ani lalu heagola Kini Andiogusu ibu mitangi bialu wali ogoni ibugua kini ibu mege bialu ibu igini heyogone kago bime la debodebo birabe toba hene. Ani manda buwa ibugua igiri heyogone biagohondo lamialu heneneore laro lowa lalu, Igiri heyogone ogoni ibugua ibunaga mamali mana lo wini ngago wahayagua nde kini ibugua igiri ogonihondo muni dewa mialu ibu mo turu holebero. Ani bialu ibu mini Kininaga Nenege lagago ogoniale helalu ibu gabumane biabe timbuni mo mulebero, lalu bini. 25 Ani layago hale howa igiri heyogone biago ibu mogo nale hene. Ani heago hondowa ibugua igiri ai̱ya biagohondo ibu igininaga mini mo iriari bule bi lamia, lene. 26 Ani lowa kini ibugua wali biagohondo bi laabo halu ibu igini mini mo beregeda layagola ainde wali biagome ibu igini mana lene. 27 Wali biago ibugua kini mo ohowa bi kinihanda ibu igini lamia layago letingi howa ibu igini geha duli hanga ho biruwa lalu, I̱ igini-o i̱nihondo dara habe. Í̠ore ege dira i̱naga tombeha berelo biralu mali tebirani i̱na í̠ andu ngialu toba yu biralu buwa baya hangu handaya ho birama ibinigo ayu kebagoni. 28 Ai mbirale deme handa edene buwa handalu keria uruniha karubi ngarubi handa. Ainde mbirale uruni Ngode Datagaliwabe ibunime wabiai howa wali agali dindi bibahendeha bu karubi ibugua wabiai hene ka. 29 Agali í̠ bole kagohondo gi nahabe. Í̠ hamene maru biaru tigua í̠ biawai hayago manda bialu tigua biyadagua bule kegoni. Homolenenaga gi nahabe. Mani tí bibahende dengui lone hondole manda bido. Anigo ainde í̠ ti heba mandagi keria dengui lone nahandaruyagua nde i̱ dara timbuniore howa turu ho ndo birulubada, lene.

30 Ai̱yahanda bi ogoni lairi heagola igiri biagome abaleore ladai bialu lalu, Ai tí agile malia ho kemibe. I̱ kininaga bi layago hale naholebero ndobe. Bamba Ngode Datagaliwabenaga bi mana Mosesenaga ne harigaha howa hayago hangu talialu holebero. 31 Anigo Kini Andiogusu í̠na ina Hiburu wali agalihondo mana ko dewaore bialu kegoni. Ai í̠ore Ngode Datagaliwabenaga keba holene ngagoria howa í̠ pora bialu yo pialu napolebere ndobe. Ai ogoni tagira ibilo hondo ha harene. 32 Heneneore iname ko bialu harimagonaga genda dewa yarimago. 33 Ai Ngode Datagaliwabehanda inahondo keba tigimbira hangu haragoni. Ani howa mani ina baba lone miniha dungu lo holebira. 34 Í̠na mitangi bialu í̠ gibiore kobe toba ho ke. Anigo agali ko timbuniorego í̠ kegoni ndobe. Ani howa í̠ninaga mine hagane mana ko ngegome í̠ni mo hondo heagola í̠na wali agali Ngode Datagaliwabenaga biabe biaga bu hearu homelo bameore bo wahalu kegoni ndobe. 35 Ani bialu howa nde Ngode Datagaliwabe Bibahende Hongo Haiheore howa mbirale bibahende karubi ngarubi de handai haga kago ibu kagoha hogorale bialu ibida pobe naheore í̠ kegoni. 36 I̱ hamene biaru tigua Ngode Datagaliwabenaga mana baya hangu taluwa bialu halu tinaga holene pelaya. Ti tandaga tigi mbira hanguni nayago ayu ti haabobo bu holene gahenge karulo ka. Ani kago ainde í̠na Ngode Datagaliwabehondo mine timbuni harigonaga ibugua í̠na mana ko biri lalu godini helolebira. 37 Ayu i̱bi nde Ngode Datagaliwabenaga bi mana i̱ mamaliruha howa lo wini ngago gubalini timbuniore ho hagaore kogome i̱bi hariga mbiraore i̱ hameneru ti piyagoha pole kogoni ndobe. Ainde inanaga wali agali bu karu dara habe lalu Ngode Datagaliwabehondo bi laro. Ani lalu ibugua pani nolene timbuniore í̠ mo ngirago hondowa í̠nabi nde Ngode Datagaliwabe ibu hangu Ngode Datagaliwabe heneneore ka labelo ibugua í̠ pani ngulebira. 38 Ayu i̱na Ngode Datagaliwabehondo bi lalu kogome i̱ hamenerubi i̱nibi homaramagome Ngode Datagaliwabenaga keba holene ngago biba habe lalu bi larogoni, lene.

39 Igiri heyogone ogoninaga bi layagome kini mo tandaga hayagola ibugua igiri daliahe biago mo ko timbuni hayagola ibunaga tandaga daliga timbuniore ibu hamene maru biaru ti tandaga nayarubi ndo nene. 40 Igiri daliahe ogoni ibu homenedagoni irane ibu nogo mbirini maname nolene nawi lo wiago nanoleore layagonaga homene. Ibugua Ngode Datagaliwabe ibuni kawareore haga kago mini mbiraore hongohe wu haga hene.

41 Ani bialu maniore wali biago ibu igini kariali biaru homai heagola ibuni mani homa maro bini.

42 Ai Yuda wali agali tigua nogo dama mitangi bialu bi pupu wiago gime wabini ngaru loma bo mini ngagonaga tini garini nanaga hearu tandaga nelo mialu bo wahai haga binigo te ogoni hangu.