1 Mani howa nde kini ibu keba hayago wa hene. Anigo ainde ibugua Basdi kuini naberelo bo duguayago mitangi biaabo ho haga hene. 2 Ani heagola agali manda timbunibi hearume ibuhondo lamialu lalu, Ai wandari bayaore mbira taya bulene karulapeda. 3 Agali haguane dindi hobane mbira mbira ngaruha karu bibahendehondo wandari baya bedaru gabumanenaga tano dunini Susa tano haru ibalimu lolene karulapeda. Ani haru halu ibiragola í̠naga wali anda kagoha bere lowa í̠naga wali bedaru handaya hagane agali Hegai kago ibugua handaya ho helo. Ani handaya ho kagola wali bayale helonaga tinaga tingini yari bia weliru ha̱i̱ ha bilo. 4 Anidagua biragola wali mbira í̠nimeore hame ledego dabaregola ogoni ibugua Basidi berenegoria bira aribia howa kuini wali berelo, lene.

Kini ibugua bi uruni karulapeda lowa bi layago talialu bini.

5 Ai tano timbuni Susa tano wiagoria Yudali mbira mini Modegai hene. Ai Modegai ibu Yairi igini howa Simai aguane halu Simai ibu Beniyamini hameigini aria Kisi igini heago aguane hene. 6 Bamba Babilono kini Nebugadenesahanda Yuda wali agali garabaya yalu piai hene. Ani piyadangi Modegai heba garabaya yalu pene.✡ 2 Kin 24.10-16, 2 Bit 36.10 7 Modegai ibu wane emene mbira mini Eseda berenego ti haru dege pene Eseda ogoni ibu Aminadaba Modegai aba hamene heyogone henego wane berene. Ainde Eseda aba ai̱yala homayagola Modegai ibu waneore biraradagua berene. Eseda wandari baya taraore mbira bereagola Modegaihanda ibuni dabu bulene manda bu hene.

8 Ai kini ibugua bi lo yu porogo lelayagola tigua wandari baya berearu haru halu Susa tano ibai hene. Ai Esedabi nde ti haru mandagi ibini. Haru ibuwa kini daluha yagi anda wali anda heagoha bere lene. Ani bereagola agali mbira mini Hegai henegome handaya ho hene. 9 Hegaihanda Eseda wali baya bereago hondowa ibu hame lo hene. Ani howa ibugua aga bayalerubi weli baya tara tara wiarubi Eseda yari bilo mo mini. Ani bialu tomo bayaleru nalu berelo mialu bini. Ani bialu howa ibugua wandari kira kininaga wali andaha berearume Eseda handaya ho berelo dabo bere lene. Ani bialu Hegaihanda wandari uruni hondo bayale dege bialu haabo hene.

10 Abale howa Modegaihanda Esedahondo bi ogodagua lene. Ibu Yuda wali bedo lalu nalabe, lalu lamini. Ani layagola Eseda ibugua ibu aba hamene biagome bi layago baya hangu manda bu berene. 11 Ainde horo bibahendengi Modegaihanda kininaga wali anda heagonaga haneni bolangua halu pugu biaga hene. Ibugua Eseda agua biraruabe hondolebi tigua Esedahondo agi bulubadabe hondolebi ani puíbu biaga hene.

12 Mali mbirani wandari haru ibiyaru bibahende bayale berelonaga mo yari bia ha tomo bayaleru nelo mia bialu haabo hene. Ani bialu ege waragariani tigua weli baya tara ira mue ibaneme wabini baya ngabi wiarume wandari uruni tingini bayale helo ha̱i̱ halu hene. 13 Ani bialu howa mani tigua wali uruni horo mbiru wali mbira haru pugu bialu kini Segesisi berearia haru pugu bini. 14 Wali ti kini andaga alendo ne̱ ledegola pialu egerebagi gao laragola dai bigi biaga wini. Ani dai biragola tigua wali uruni kininaga anda mende wali ibu one wabuni halu mende laga biraga anda kagoha bere lowa Hegaihanda handaya ho helo haru puwa bere laga hene. Ani bialu wali uruni lone kini andaga dai bulene nawi. Ai kini ibuni hameme wali mbirago mini olalu kini ibu andaga ibabe layiyagua nde pugu biaga wini. Tigua tini hameme kini andaga polene hariga nawi.

15 Eseda ibugua kinihondo polene horo tagira ibiyagola Eseda ogoni ibu Modegai aba hamene heyogone mini Aminadaba mbira henego wane berene. Ibugua Hegaihanda bi mana lalu lawai harago bibahende baya hangu hale howa talialu bereagola wali agali bibahendeme ibu gubalini timbuni halu turu hai haga berene. 16 Horo ogoni kini Segesisi ibu kini heane mali karia hene. Ai mali ogoninaga ege hombene (12) mini Ada layagola tigua Eseda kini berearia haru anda pene. 17 Ani haru anda piyagola kini ibu hondowa ibugua Eseda gubalini timbuni hene. Wali mende kininaga gubalini podene Eseda ale mende nabere ibu hangu berene. Ani biyagola ai kinihanda Eseda haguaneni kuini walinaga tangi mo karula hene. 18 Ani bialu horo kariani kini ibugua tomo dawa nalu biraabo hene. Ani bialu howa ibugua agali haguane hearubi agali manda timbunibi bu hearubi bibahende Eseda libu dabu bialu howa tomo dawalu turu haga bu birami̱ya ibidaba laga bini. Ai horo ogoningi ibu dindiha wali agalime dagisi muni wiaga wiadagua nami gadiape howa dagisi milimu lalu kinihanda latagi hene.

19 Horo ogoningi dege kinihanda Modegai kini ibu andaga handaya ho helo dabo helalu bini. 20 Bamba howa Modegai ibugua Esedahondo lamialu ibu Yuda wali bedo lalu mbirali nalamibe lalu lamini. Eseda ibunaga mana Modegaihanda bi larago baya hangu hale halu biai haga biruwa ibugua layago hale halu nale berene. Ibugua Ngode Datagaliwabehondo bi laabo halu biraga biruwa ibugua Ngode Datagaliwabenaga bi mana baya hangu talialu biraga berene. Ani bialu ibugua mana Yuda wali agalime biaga wiaru mbira wanahe berene.

21 Ai Modegai ibugua kini Segesisinaga biabe bialu heagola agali haguane kininaga biabe bialu kini hadaya ho haga heagolabome kinila keba ho howa libugua kini bo wahole bi lalu lo manda bini. 22 Ani lalu hebigo Modegai hale howa ibugua kuini Eseda lamini. Mani howa Eseda ibugua bi Modegaihanda hale howa lamiyaru kini hale helo lamini. 23 Ani lamiyagola kini ibugua dabo handalu hearia bi uruni henene leneyane handa walia hene. Ani hale howa tigua agali kira ogoni labo irani bo derela hayagola homene. Ai mani kini ibugua Modegainaga mini mo yaraga holenaga lalu, Ai wali agalime biabe baya gibiore Modegaihanda biyago embeda nahelonaga te gabumane mbuga ngagoha gilibu widaba, layagola tigua te ogoni gilibu wini.