16
Yudidihanda Ngode Datagaliwabehondo bi lenego ogo
1 Yudidi ibugua Isaraele wali agali bibahende mandagi howa turu halu ka̱i̱ lolenenaga iba gana ogo layagola wali agali tigua talialu layadagua lene.
2 Iname i̱naga Ngode Datagaliwabe- hondo iba gana lalu kaboga wialu
tabaga balu Anduane Homogo mini yaraga hama.
Iba gana gahenge lalu ibunaga mini yaraga hama.
Ibunaga mini timbuniore mini lene ka lalu
iname ibunaga mini olalu, Ina biamogo bibe, lalu lama.
3 Uruni irane Anduane Homogo ibu wai mo palia haga Ngode Datagaliwabeore kago manda buwa
ibugua waitiginaga giha howa i̱ mo wialu haru dai bialu
i̱ ibunaga wali agali heagohayagi haru dai bu helaya
4 Asirialiru uyurayagi howa daliape halu abaleore ibiya.
Tinaga ami agali dewaore howa dindi tigabi wiagoha ho namulai haya.
Ami agali nogo hosini biruwa wai biaga bu hearume
hari nene wialu ho karulai haya.
5 Tigua ina mo gi holenaga bi ogodagua laya
Inanaga dindi andaru bo heda holeberema, laya.
Tigua, Igiri daliahe karu ayu tiburume dibai holeberema, laya.
Tínaga waneigini gali bibahende dindini mo paraho waholeberema, laya.
Waneigini garabaya yalu poleberema, laya.
Tínanaga wandari mabuage bedaru bibahende mo ko holeberema, laya.
6 Anidagua bule layagola
Anduane Homogo Bibahendenaga Hongo Haihe kago
ibugua wali mbiranaga giha howa ti bope hayagoni ndobe.
7 Tinaga agali haguane ogoni igiri daliaheme ndo bayiya.
Agali hongohe mbirame ndo baya.
Merari wane Yudidi ibugua hangu
ibunaga dengui baya heagome agali mo luluya hayaya.
8 Ibugua ibunaga dara howa aga karulayago golo wahalu puwa
Isaraele wali agali darabi hearu bibahende mo yaraga hayiya.
Ibunaga dengui mbagua sandame hai howa
ibunaga mandari aga baya mbirame kabu bialu
aga bayaleru karulalu agalime hondowa dimagoli helo piyiya.
9 Agali haguane timbuni heagome Yudidinaga ge hondowa
dimagoli halu ibu wali baya taraoreyago handaya.
Ani bialu hearia Yudidi ibugua
wai biagane ayu tibume ibunaga ma puguayiya.
10 Pesia wali agali hearume wali biagonaga hongo wiago hondowa
ti mogo lowa durulalu haya.
Midiali hearu tigua handalu hearia
wali ogoni ibu gi nahaga heago de hondowa ti mogolo hendene.
11 Inanaga damene ala mo ko hene hearume
ti turu howa hoaro layagola
waitigi hayaru mogo lai haya.
Tigua hongo howa hoaro laga laga biyagola
waitigi agaliru mogolalu ibida piai haya.
12 Ina wali galone nahe biabe biaga waneiginirume
ti homelo bo wahai harima.
Iname garabaya agalime ibida poragola bagadagua bialu
ti homelo bo wahaiore harima.
Anduane Homogonaga ami agali giha howa ti ereba hai haya.
13 I̱naga Ngode Datagaliwabe kagohondo
i̱na iba gana gahengeru lolebero.
Anduane Homogo-o í̠ gibiore kegoni.
Í̠ bolangua heneore kegoni.
Í̠ bibahendenaga hongo haihe howa
mendealime í̠ bope halu ti wayali habe nahe ka.✡ Iba 144.9
14 I̱na wabini ngaru bibahendeme
í̠ni andaneha haiore holene nga.
Í̠na bi dege larigola mbirale uruni bame hai hene.
Í̠naga buhe pulanda harigola
abaleore aube tobane buwa
mbirale uruni baya gibi haya.
Mbiralime í̠naga bi mo wahabe nahe.
15 Hari timbuni wedarubi iba solowara bedarubi tigua durulaga ndobe.
Í̠ kaware eberegola ege to̱le̱ timbuni ngarume mo iba bu hinaga.
Í̠naga wali agalime í̠naga bi hale haga karuhondo
dara haga kegoni.
16 Loma ngabi dendebiore wiaguabi ogoni bame dege holebira.
Nogo bulumaga habane lomabu delaga dabuni delayagua
ogoni bame dalu biba haga.✡ Iba 51.16-17, 1 Sml 15.22, Hos 6.6
Mbiralime Anduane Homogonaga bi hale hayagua ibu galoneore holebira.
17 Dindi mbiraha padarume wali agali i̱ damene baba wai bule ibiyagua nde
ti de hondowa ibulene nga.
Anduane Homogo Bibahendenaga Hongo Haihe kagome
godi hale holene horo timbuni tagira ibirangi
tihondo bi hale holebira.
Ibugua ti kagoha ira hedape halu
tinaga tingini ngoeme hai helolebira.
Ani biragola tigua tandaga handaabo halu howa
dugu bialu haabo holebira,
lalu iba gana ogoni lai haya.
Yudidi mini lene berenego ogo
18 Ani bialu wali agali Yarusaleme dai buwa tigua Ngode Datagaliwabehondo bi lalu hene. Wali agali tini Ngode Datagaliwabe deni dodo nahe hole mana biaga wiago biai howa tigua loma irani dai helonaga lomabu delalu wali agali tinime Ngode Datagaliwabe loma turu halu mule lalu bi lo winirubi tini hameme hangu hangu yalu ibiyaru bibahende loma uruni bu migi bialu hene. 19 Mbirale Holoberenesenaga dabudabu mo yayaruni wali agali tigua Yudidi mo miai henego ainde Yudidi ibugua Ngode Datagaliwabe mo mini. Ani bialu labolabo hinabibi hagira biaga Yudidi ibuni Holoberenesenaga mo yini biagobi Anduane Homogo dege mini. 20 Ege tebiraru bibahende howa wali agali ti turu halu Ngode Datagaliwabenaga anda Yarusalemeni heago kawareni haabo henego ai Yudidi ibubi nde ti haru hene.
21 Turu ho holene horo uruni hai halu wali agali bibahende tini dalu dai biai hene. Yudidi ibu nde Bedulia tano dai buwa ibunaga dindi wiyadagoria berene. Horo ogoningi howa ibu Isaraele dindiha mini lene mbira biraabo halu homalu wahene. 22 Yudidi ibu agalini Manase homayagola tigua ibu mamaliru homali heagoria mandagi hora halu Yudidi dalo bereagola agali marume dabu dabulene manda bialu hemiria ibu agali nape biraabo halu homene. 23 Ibunaga mini loyogo lai hene. Ibu agalini andaga heagoha biraabo halu ibunaga mali handari mbirani duria (105) berene. Ani biruwa wali ibunaga garabaya biabe ale bia haga biago yupe halu pu lene. Ani bialu ibu homayagola Bedulia tanoha ibu agalini Manase hora heagoha dege hora hene. 24 Yudidi ibu homayagola Isaraele wali agalime dara howa horo karu dugu bialu duguanda ho hene. Ibu homa nabi dege biruwa ibunaga paluni wiaru bibahende tale buwa maru ibu agalini Manase damene hearu talebu mialu maru ibuni damene mini. 25 Yudidi ibuni bereangibi mani Yudidi ibu homeagolabi waitigime Isaraele wali agali mo gi holene henge mbira nawiore bayale haabo hene.