Dagalene
Mbuga ogoha gilibu ngarunaga nemandi ogo
Bi Dagalenegoha lo ngagoni Isaraele wali agali mali pira maria (40) agima Hari Sainai yu wahalu dindi ni ibiragohayagi Ngode Datagaliwabehanda ngulebero lo wiyagoha pole lowa pialu dindi ogoni tubariani anda pene lo nga.
Mbuga ogoni mini Dagalene lo ngagoni irane Isaraele wali agali bibahende hearu Hari Sainai howa Mosesehanda ti dagalenegonaga lowa mini nga. Ani bialu daba mbira agima peagola halu mende dagala dai bini. Iba Yodana poragoha dindi mbira ni ibiragohayagi mini Moaba wiagoria howa bini. Daga halu kira layadago hengeneha Isaraele tigua dindi Kenananaga unurahayagi mini Kadese Banea lo wiyagoha penego ogoriani howabi Kenana dindi anda pobehe winigo kobene lalu lo nga. Ani buwa mali dewaore dindi ogoniha buyu ibagabu howa iba Yodana poragohanaga ni ibiragohayagi pu hene. Ogoriani howa hameigini maru tigua iba Yodana domalu Kenana pole manda manda bini.
Dagalenegome lo ngaru Ngode Datagaliwabehanda wali agali dindi bayaleni haru pole piyagoyu kobi gibibi dewaore wiago hondowa gi timbuni halu gendabi timbuni halu hene. Tigua Ngode Datagaliwabenaga bi layaru mo wahalu Mosese ibu Ngode Datagaliwabe ti haru helo helayagohondobi gimigomo lalu mo genda henego gilibu nga.
Galone mbira manda bimi̱yago Isaraele wali agalime ho beregedaga bialu Ngode Datagaliwabenaga mini mo ko haabo haya. Tigua ani biyagoyu Ngode Datagaliwabe ibugua ti erembira nami howa wali agali biamogo timbuni dege biaga kagonaga te gilibu nga.
Galone mende manda bimi̱yago Mosese ibu Ngode Datagaliwabehanda dabenedalo manda buwabi wali agali ibugua haru hole haruda lowa manda bolangua howa wali agali gimigomo layarumebi ba hondolene tara tara ibiyarumebi bope nahabehe hongoheore henegonaga te lo nga.
Bu̱lu̱ baga buwa kuni gilibu ngago (1.1–9.23)
Isaraele wali agali tigua Hari Sainai yu wahalu pole manda manda binigo
1.1–4.19
Wali agali mini piganengi dagalenego
5.1–8.26
Mbirale tara taranaga mana ogodagua bilimu lalu laminigo
9.1-23
Bolangua Halu Penego Horonaga Tomo halu mende nenego 10.1–21.35
Hari Sainai teneni howa Moaba dindi penego 22.1–32.42
Moaba dindi howa bigi biniru 33.1-49
Iyibi dindini howa Moaba dindi penegonaga garea lenego 33.50–36.13
Yodana domole howa ogodagua bilimu lalu te laminigo
1
Isaraele agali haguane hearume wali agali bibahende daga lai henego ogo
1 Isaraele wali agali ti Iyibi dindi wahalu tagira penego mali mendegonaga ege mendeni horo mbira hayagola Sainai dindi ko yobi iba dalu naibaga wiagoria Anduane Homogohanda ibunaga Balai Anda heagoha howa Mosesela bi lene. 2 Anduane Homogohanda lalu, Í̠ Aronola libugua Isaraele agali karu dagalalu tinaga mini gilibu wiai halibu. Mini gilibu wialu ti damene mbira mbira hayadagua hameigini hangu hangu dagalalu gilibu wiai halibu.✡ Dag 26.1-51 3 Agali maru ami agali habehe mali pira kira (20) bolangua hene karu dagalai halibu. 4 Ani bialu libuni biamogo bilonaga agali hameigini kadagua agali haguane mbira mbira dabo helalibu, Anduane Homogohanda lene. 5-16 Ani lowa lalu agali haguane maru libu biamogo bilonaga dabo helenedaruni uru.
Lubene aria Sederu igini Elisu helene. Simiono aria Surisadai igini Selumiele helene. Yuda aria Aminadaba igini Nasono helene. Isaga aria Suara igini Nedanele helene. Sebulunu aria Helono igini Eliaba helene. Eberaimi aria Amihudu igini Elisama helene. Manase aria Pedasu igini Gamaliele helene. Beniyamini aria Gidioni igini Abidana helene. Dana aria Amisadai igini Ahiese helene. Ase aria Ogorana igini Pagiele helene. Gada aria Duele igini Eliasaba helene. Nabadali aria Enana igini Ahira helene.
17 Ani lamiyagola hale howa Mosese ibugua Isaraele agali hameigini mbira mbiranaga agali haguane uruni ti ibilo olo ngoai hene. 18 Ibiyagola Mosese Aronobi agali haguane homberiali (12) dabo helayarubi tigua ege mendegonaga horo mbira hayagola Isaraele wali agali bibahende íbu ngoai hadaba layagola ti bibahende íbu ngoai hene. Ani ibiyagola agali haguane biaru tigua bibahendenaga mini tini hameigini hayadagua gilibu wigi wigi bini. Ani bialu agali mali pira kira (20) bolangua hene agira kabe hondole dagalalu tinaga mini gilibu wini. 19 Anduane Homogohanda ala Sainai dindi ko iba dalu naibaga wiagoria Mosesehondo lamiyadagua ani biai hene.
20-46 Ani bialu agali mali pira kira (20) hayarubi maru pira kira bolangua hene hayarubi bibahende ami agali habehe biaru mini gilibu wialu dagalai hene. Tigua ani bule howa hameigini mbira mbira aba igini mbira mbira headagua agali ami habeheru Yagaba igini wahene Lubene hameigini howa ala dagalalu mini gilibu wini. Agali hameigini headagua tinaga mini ogodagua gilibu wini.
Lubene aria daosini dege pira mariani waragaria halu handari duria (46,500) bibahende hene. Simiono aria daosini dege pira duriani dira halu handari tebira (59,300) bibahende hene. Gada aria daosini dege pira mariani duria halu handari waragaria pira duria (45,650) bibahende hene. Yuda aria daosini dege pira kariani maria halu handari waragaria (74,600) bibahende hene.
Isaga aria daosini dege pira duriani maria halu handari maria (54,400) bibahende hene. Sebulunu aria daosini dege pira duriani karia halu handari maria (57,400) hene. Eberaimi aria daosini dege pira mariani handari duria (40,500) bibahende hene. Manase aria daosini dege pira tebirani kira halu handari kira (32,200) bibahende hene. Beniyamini aria daosini dege pira tebirani duria halu handari maria (35,400) bibahende hene. Dana aria daosini dege pira waragariani kira halu handari karia (62,700) bibahende hene. Ase aria daosini dege pira mariani mbira halu handari duria (41,500) bibahende hene. Nabadali aria daosini dege pira duriani tebira halu handari maria (53,400) bibahende hene.
Anidagua haga binigo ai bibahende daga lamaga halu daosini dege handari waragariani huniane tebira halu handari duriani pira duria (603,550) bibahende hene.
47 Tigua agali bibahendenaga mini dagalalu gilibu wiai hayangi hameigini mbiraore Libai ibu aria dege dagalalu nagilibu wini. 48 Anidagua binidagoni irane abale Anduane Homogohanda Mosesehondo lamialu lalu, 49 Í̠na ami agali habehe karu dagalalu mini gilibu wialu howa Libai hameigini ti dege mini gili bialu daga lamaga nahabe. 50 Ani bulene nawiore. Libai hameigini tigua i̱naga Balai Anda kagoha biabe bialu howa anda ogoni handayaho haga helo helabe. Ani helowa tininaga balai andabi i̱naga bu heledagoria dege mandagi helo lenelene bu mabu bidaba labe. 51 Tígua dindi mbirani balai anda bu harimigo gialo yalu dindi mendeha poramingi i̱naga Balai Anda kagobi mbirale i̱ anda ogoniha wini ngarubi bibahende Libai agali karume mo yalu pugu bilo. Agali maru Libai hameigini aria ndo kamiru tígua i̱naga Balai Anda kagoria haparaho harimiyagua nde tíni homolene nga. 52 Isaraeleali hameigini maru kamiru tí nde tíninaga hameigini emene hagahaga birimidagua balai anda bu hagahaga buwa tíni hameigininaga pelagi helagalaga bilimu. 53 Anigo Libai hameigini tigua dege tinaga balai anda i̱naga Balai Anda kagoria buyu mabu buwa anda ogoni handayaho helo. Ai bi larugo mo wahalu mbirali i̱naga Balai Anda ogoni kagoha pialu karia i̱naga keba holene timbu halu Isaraele wali agali bo wahai holigo Libai aria tigua i̱naga Balai Anda mamage helo helolene nga, lene. 54 Ani layagola hale howa Mosese ibugua bi uruni Isaraele wali agaliruhondo lamiyagola tigua Anduane Homogohanda layadagua talialu biai hene.