1 Wali agali bu karu mo turu halu bayale bulene manda biriyagua nde wali agali í̠na ti biamogo bulene manda bu haridaruni tinaga mana agobi biagadabe hondole mo talebu handabe. Ani buwa í̠naga biabe bayale beregonaga turu halu í̠ ka̱i̱ loleberego ani bibe.✡ Md 7.6 2 Wali agali tigabi bu karuhondo biriyagua nde tinime í̠hondo emena bolebira. Ani nabiyagua nde Anduane Homogo Daligaore kago ibugua í̠ emena ngulebira. 3 Wali agali mana koha haabo haga kagoha howabi wali agali burupale yagibano bu karu biamogo nabiaga karuha howabi mbirale bayalego mbira tagira naibaga ndobe. 4 Wali agali tigabi karu biamogo bialu mana ko biaga bu karu biamogo nabibe. 5 Wali agali ko mini nalene karu biamogo bialu, Wali agali ko biaga karu mbiralebi tomobi mulene nawigo namibe. Ani miriyagua í̠ mo ko holene hariga handa walia holigo nami waholeneore nga. Í̠na tihondo mana bayale bini wiaguabi uruni ani bi lowa í̠hondo ko bule manda bu holebira. 6 Anduane Homogo Daligaore kagome wali agali mana ko biaga uruni baba keba taraore ho howa ibugua ti pani nelo miaiore holebira ndobe. 7 Wali agali tigabi bu karuhondo bayale bulene ngadagua bialu wali agali mana ko biaga karu biamogo bulene nawigo nabibe.

8 Horo bayalengi í̠naga nenege bayale abogo ka lalu manda bibehego nabulebere. Anigo horo kongi í̠naga waitigi bu karu ti hado naholebira. 9 Í̠naga mbirale ngeru bayale ngangi waitigi karu tinaga bu miniha genda ho haga. Í̠naga mbirale ngeru mo ko halu ereba hai harangi í̠naga nenege bu hayarubi í̠ wahalu piai holebira. 10 Í̠ waitigi karuhondo mini mbiraore wulene nawigo nabibe. Ibugua í̠ mo ko halu mbirale hagua biagaleme gaba hagua biagadagua í̠ mo ko ibuni helolebira. 11 Nenege ko uruni aleme ke̱ howa tini mo dindiha halu í̠ha bi gedaoreme ladebodebo bialu holebirago ainde wali agali uruniale bulene kagohondo mamage howa oha habe. Mana tinaga ngago baya hangu handa walia hole hongo howa agalime ibawa̱i̱ dodohe ngago baya hangu domalu karia dodohe dege ngane de handagadagua tinaga mana ogonibidane hondolebere. 12 Tigua í̠ bope halu í̠naga henge ti muligo í̠ni bedegoria mandagi haru biruleni na birabe. Í̠naga biabe ti mo yu pu bagi holigo ai í̠naga gi tigaha yagi naberelabe. Ainde bi i̱na larogoni heneneore leneda lalu tagira ibirangi handa walia halu manda bulebere. Ani birangi bi i̱na larugome i̱naga gubaliniha nogoba harane hondolebere. 13 Wali agali mbirago ibu puya hinu karia puya ogonime ibuni hayiyagua nde ibu dara aiwa holebirabe. Mbirali ibunime nogo gabua kagoha piyagua nde ibu dara aiwa holobadabe. 14 Anidagua dege wali agali mbirago ibu wali agali mana ko biaga bu karu baba hayaguabi tigua biabe ko biaga ngaruha handa handayaguabi nde tigua ibu dara naholebiraore.

15 Í̠naga waitigi karu tigua í̠ baba tigi mbira hangu howa handalu karia í̠ hariga mendeha yagi pole keria handayagua nde tigua í̠ wahalu polebira. 16 Waitigi tinaga ne harigaha nde la debodebo bi baya lalu holebirago ai henene ndo tinaga miniha í̠ uliha minu bape hole howa lalu holebira. Waitigi tinaga de pora dugu bialu ha holebiragoyu tigua í̠ wene balu homelo lene hariga taya bialu holebira. 17 Mo ko holene genda timbuni mbira í̠ha anda ibiyagua nde waitigi abaleore kaware íbu howa í̠ biamogo bule hetingi howa hondo holebira. Anigo ibugua í̠naga ge poregoha hana howa pilolene mbira mo ngelalu í̠ mo pila holebira. 18 Ibu agali bu karuale ndo taraore mbira tagira íbu holebira. Ibugua ma tanda lalu wangarere bialu gi habe balu í̠ha gi dola howa mege taraore bialu holebira.* Mbiralime hagua tanda lalu gi habe bolene ogoni mendeali kago hondo mege bialu ani biaga. Te ogoni aria maru Yobo 16.4 handabe. Iba Gana 22.7, 109.25 handalu Esegiele 25.6 handalu Nahumu 3.19 handabe. Ani bialu Madiu 27.39 ngago handaga bulene nga.