1 Wali agali mende kago dara haga bu karume wali agali tini dindi mandagi haga karu biamogo bialu dano helo mialu biaga. Tigua ogoni Anduane Homogonaga mana ngago talialu anidagua biaga.✡ Har 22.25, LBM 25.35-38 2 Wali agali mende kago tubagi ho kangi mbirale bame tale bu mulene nga. Ani bialu dano ho hariyagua abale miadai bulene nga. 3 Í̠naga nenegela ogoale bibiya lalu bi lo wirigo mo aribia nahe bule larigo abale bibe. Anidagua beregola í̠ha tubagi ho kego ibugua biamogo biaabo halu holebira. 4 Wali agali dewaoreme dano hole mirago bame ti mo turu halu bame mini mo yaradagua bialu tigua mbirale anduane ti biamogo biaga kago genda mo miaga ka. 5 Wali agali marume dano holenaga bi bayale hadalu bime mo adogoda bialu mbirale dano howa mo yu piaga. Anigo ai dano hongolenenaga abale miadai nabi howa tigua lalu, Nguliya degego emene hondo habe, laga. Ani buwa bi la tara haga bialu howa lalu, Ai horo hapara hayadago dano nahongolebero, laga. 6 Ainde dano anduane kagome lo hongo halu ibunaga dano ngi laragome muni emene dege mbira miragola mo yarago ibu karulape holebira. Anigo dano hayadagome dano hongolene mbirale mbira nayi hayagua nde daraba ibunaga muni dano hayago homa anda haragola hako holene ona ibira holebira. Tigua bi ko larago ladai bulene dege ndo wulebira.

7 Anidagua biragome wali agali bayale karume dano helo lone mulene turu nahaga ka. Ogoni irane wali agalime tihondo lone ke̱ holigonaga namiaga.

8 Anigo ai wali agalibi mbirago ibu mbirale nawi tubagiho kane handariyagua í̠na ibu biamogo bulene nga. Ibu í̠ malia howa bame ho waholigo abale biamogo bibe. 9 Anduane Homogonaga mana lo ngagome bibe ledago talialu yagibano karu biamogo bialu mbirale ibuha tubagi ho kago mibe leda. Bameore halu pe nalabe leda. 10 Í̠ dameneru í̠naga nenegeru biamogo bialu í̠naga muni pelolene karulape. Í̠naga muni bame wialu ege to̱le̱ andaneha wu hagua dalu ereba holigo abale galone bulene nga. 11 Í̠naga muni ngeru Anduane Homogohanda pelabe ledagoha pelaregola í̠naga yolo mani mo yu holeberego ngolo ngago bolangua howa mo yulebere. 12 Í̠na wali agali yagibano bu karu dara haabo haga hariyagua nde í̠ha mo ko hene keangi tigua í̠ heba holeberemi. 13 Wali agali biabe bia haga bu karu tinaga hongo gibiore yandare alebi wai humbi hongohe waingi yagane ngagobibi ka.

14 Wali agali bayale kagome ibu damene mbirame mbiralinaga dano howa ya dai bibe nahe kagola nde ibugua biamogo bialu dano hanga haga. Anigo wali agali ti damene karu mitangi nahaga kagome dano hayadago ibugua hanga naholebira. 15 Í̠naga nenege mbira kagome í̠naga dano ho henedago ibugua hanga hayagua nde í̠naga nenege bayale ogoni ibu howa ibunaga mbirale bayale winiru yuwahai halu í̠naga dano hanga hayago mitangi bialu í̠naga nenege ogoni wanahabe. 16 Ai wali agali mana ko biaga karume ti dameneme dano hangabe lalu muni mirago ti biamogo biyada lo manda nabi howa tigua muni uruni galone nawiha bame baainai bialu wahalu piaga. Ani biragola ibu damene biagome nde ibu helalu wahalu piaga. 17 Wali agali bayale bu hearu nde iba sibi solowara bedagoha pialu karia mo ko hagadagua bialu mo ko hai haya. Ani biyadagoni ti damene bu hearunaga dano hangalu hearia tini mo ko holene ngola haya. 18 Mana ogonialeme dege agali haguane bu hearubi mo ko dege henego tini dalu wahalu dindi taraha pu wahaga biya. 19 Wali agali ko biaga karume ibu damenenaga dano hongoliya lowa ti muni bolangua hene ngago hangu mule manda biyagua nde ti darabiore bialu ka. Ti godi larangi pani emene ndo nolebira. 20 Í̠na mo ko holene wuligo de handa ala hondowa karulape hariyagua nde í̠naga damene kago biamogo bibe.

21 Wali agalime dunini mariago tininaga ngelowaore holene nga. Iba mbira tomo nolene mende aga karulolene tebone tini paluene andabi helowa holene karulape. 22 Yagibano kago ibu anda ibuni andagaha paliaga heagua ibu turubiore ka. Ibu wali agali maru ti damene andaga puwa tomo bayale tara tara ngaru nalu u paulene anda nahe bu hearubi ndo ka. 23 Í̠ mbirale dewawi hariyaguabi nawi hariyaguabi í̠ ta nabi howa turu ho holene nga. Wali agali dindi mandagi haga karume í̠ha bi maru ke halu laede hayagua í̠ genda nayi habe. 24 Í̠ wali agali mende andaga paliaabo holeyagua í̠ turu naholebere. Ani bialu í̠naga mini ngego hale helo latagi naholebere. 25 Ti andagaha bame biabe bialu haga kadagua holebere. Í̠na wali agali ibiraru tomo ibabi nelo meregola tigua í̠hondo kai ladai nabulebira. Ani bialu tigua í̠ handaya ho howa í̠ ti andaneha helowa lalu, 26 Igiri-o tomo nalu birulene tebolo dagia ogo mo tiga bu ngelabe. Ani bialu tomo dedagola abale dugu yalu ogoria ibabe lolebira. 27 Ani bialu biragola tigua lalu, Í̠ tagira pialu pobe lolebira. Agali haguane mbira ibiyada. Ayu dege i̱ hamene mbira ibalu anda hobane mbira Í̠ padego mulebira.

28 Heneneore wali agali manda dewawi karu irane kirame ti mo ko holebira.

Wali agali í̠ ti andagaha palibelo turu nahe bu karume í̠ mege biragomebi

Í̠na dano haridago hanabe, lalu bi hongo howa keba ho howabi olalu kagome tinaga miniha mo ko hai hene holebira.