1 Wali agali bibahendeme biabe ndelahe ngaru bialu kemigola Adama hamewaneigini bibahendenaga genda tini karulapeore ngago bulene nga. Genda ndelahe uruni ai̱yahanda taba hanayangi howa ngola halu winigo ainde wiaho wiaabo halu ti ai̱yaore dindi ngago ai tini homalu lone dindiha dai birangi waholebira.* Wali agali ti ai̱yaore dindi nga ledago irane Ngode Datagaliwabehanda wali agali pigane wabiyangi dindime agali wabinigo manda bialu leda. 2 Wali agalinaga miniha mo luluya kagola ti mini burugu timbuni lalu ti homolenego giho ka. 3 Mbirago ibu kini howa kininaga dagia ngagoria biragane heaguabi bame wali agali damene dege howa dindini biaga heaguabi 4 wali agali aga baya tara ngaru mo karulo howa kininaga yari ngaru mo karulo heaguabi maru labolabo ko ngaru mo bobu heaguabi bibahendeore genda yaiho haga tene keba holenebi dimagoli holenemebi mo ko holene anda biragolabi genda ibiragolabi miniha tandaga holene abale tungulope haragomebi hongo haga haga bialu irigi irigi bulene ngagomebi homolene gi haga ngagomebi bibahende urunime miniha genda holene mo anda ibi lai hagane nga. 5 Wali agali dagiaha padaria miniha genda uruni ale anda ibiragome tinaga mini ibu ha̱lo helowa u padago mo yangayanga bia haga nga. 6 Ti ha̱lo howa u emeneore palua karia ainde palibe nahaga nga. Ti u pada tiraga tinaga de ibu de ngilaho wiaga nga. Tininaga emagoha ti mo luluya harago nahende agali mende kagome ibu bo wahole dege kabe tobaho haga nga. 7 Anigo ti karulape harimada lo manda biragola ti u palenedago heyuwa handalu karia gi harigo bame dege gi henedalo handa walia haga ka.

8-9 Bibahendeale ema bialu piagane damenego homa dege bulene nga ndobe. Tigua ngola holebirago wai bulenebi ayu tibu nene gadele wai biaga ngagobi horo ko ngarubi hina garimebi genda timbuni ngarumebi warago ko ngarumebi ngola hai holebira. Ema bialu piaga biru ngarubi wali agali bu karubi ti bibahendeore mo ko holene uruni ngola hai holebirago ainde wali agali ko biaga karu ti dege kahalu degedege ngola haga bulebira. 10 Heneneore mbirale ko uruni damenego Anduane Homogo ibunime wali agali mana ko biaga bu karu tandaga nelo mialu pani nelo mule winigo nga. Mana konaga lini koore iba li timbuni mbira bamba ibini nga. 11 Mbirale bibahendeore dindi ogoria andaho hene karu bibahende lone dindiha dai biai holebira. Ani bialu mbirale bibahende ibaha howa ibini ngaru lone ibaha dai biai holebira.

12 Mbiralime wali agali muni ngilonaga bime lo adogoda biaga mana ngago bibahende ereba hai halu wali agali mende kagohondo mana tiga nabi biaga ngago ereba hai holebira. Anigo mini mbiraore wulene ngago ibu wiaabobo holebira. 13 Muni page mini ngaru lu yu haabo nahe abaleore aube tobane bialu gaea bialu ni hongohe darangi iba emene bedago abale hundialu ereba hagadagua bialubi iba dalu ibirangi hari daba abale bialu ereba hagadagua bialu ereba haga. 14 Wali agalime maru dara halu biamogo biaga karu ti turu holene timbuni handa walia holebirago ainde wali agali bi mana lo wini ngago pugualu haga karu ti dege pu ereba hai holebira. 15 Wali agali ko biaga waneigini bu karu tiha lini bayale galone mbira tagira napolebirago irane ira dindi ko ege kelekele ngagoha kaligobi ka. 16 Wali agali uruni iba angeni iba gagua ngaligobi kago iba hundiragola datani maru karu mani gaulalu homelo iba gaguame ibu abale gaulalu homaga ka. 17 Anigo mana bayale wali agali biamogo bulene ngago mabu bayaleha tomo tara tara anda hai holene ngaligobi howa wali agali yagibano bu karu dara halu biamogo bialu haabo holebira.

18 Wali agalime biabe bialu tininaga biyinaya biabe bialu haga karu ti turubi ka. Anigo mbira ibu muni ngolaru dindiha hora karia handa walia howa duguarago ibu turubiore bolangua heneore ka.

19 Agali mbira ibu waneigini honowi howa ibugua tano timbuni mbira mo heya hayagua nde ibu agali timbuni mini lene holebira. Anigo agali mbira ibu wali bayale mbira dabubu hayagua nde ogoni ibugua agali kira ogoni labo bolangua hene ka.

20 Waini ibala ngita baya baragolame agali mo turu haga nga. Anigo manda bayale bulene ngagome ogoni labo bolangua halu daligaore nga.

21 Be tabage baragola ngita baragolanaga bi biamaga haragola baya tara mbira laruane hale haga nga. Anigo wali agalinaga iba gana baya laragome kira ogoni bolangua hene nga.

22 Wali agalinaga deme mbirale bayalebi monehebi ngago hondole turu haga nga. Anigo yari biagane gahange baya dedagome kira ogonilabo bolanguahe deda.

23 Mende kagola nenege ho holenebi mandagi ibagabu holenebi bayale mbira nga. Anigo wali agali dabubuwa onene aglinila mandagi birulenego bayaore bolangua hene nga.

24 Í̠ha genda ngangi í̠ hamenebi í̠ damene kagobi í̠ni heba mandagi holene bayaleore. Anigo í̠nime wali agali maru karu dara halu biamogo biaga keyagua nde bayaleore ogoni biri.

25 Ngolo silibarume wali agali bayale helonaga biamogo biaga nga. Anigo mini giga bulene í̠naga nenege ibugua ngiragome kira ogoni labo kirabali bolangua hene nga.

26 Muni dewa ngagomebi tingini hongohe kagomebi wali agali ti bayale dunini mbira kemabe toba ho haga kago ndo.Wali agali Anduane Homogo gi halu ibunaga mini yaraga halu haga kago ibu dunini bolangua hene bayale ka. Heneneore mbirali Anduane Homogonaga bi hale halu haga kago ibu mbirale mbira burupalia nabiaga ka. 27 Mbirali ibunaga mana Anduane Homogo andaneha haabo haga kago ibu mabuha tomo hengedago damene bayale anda howa lini bayale dai hagagobi howa mbirali mana ogoni talialu haga kago ibu mini lene timbuni mbira holebira.

28 Waneigini-o wali agalime mendeali kagoha mbirale mbira ngilonaga ngi ngi lalu hagadagua lolene nawigo nalalimu. Anidagua lolene manda biriyagua nde wahalu ayu ogoni humbirini andagaha hama polene nga. 29 Wali agalime tomo bayaleru mendenaga dabuni ngaru dimagoli ho hagago ibu nde ibuninaga holene naheoreme biradagua biaga. Tigua tomo wali agali mende kagome mirago dege nalu haabo hayagua nde ti tagabiore ka. Anigo wali agali ti biwai baya hangu hene manda bayale bu heagua nde tigua mana ogonidagua nabulebira. 30 Wali agali taga nahaga bu karu tinaga ne harigoha ngi ngi lalu haga karu ngi lolene dendeore howa ngi laga ka. Anigo mana ogoni tinaga bu habeneha mo kaubia hagane nga.