44
Mamali ala henerunaga turu howia halu bi lenego ogo
1 Ayu iname agali haguanebi inanaga mamali heneruhondobi ka̱i̱ lo wia holene nga.
2 Anduane Homogohanda tinaga mini mo timbuni howa mini lene helalu bambaore howa ibunaga hongo tihondo mo walia halu heneya.
3 Maru ti hongohe heagome ti agali mini lene timbuniru haga bialu maru kiniru heneya. Maru ti manda bayalebi howa baya hanguore lawai haga hene. Ani bialu Anduane Homogonaga bi mana latagi halu mbiwia hagaru hene.
4 Maru ti nde wali agali íbu ngoai ho kago baya hangu mo tiga bialu haru howa wali agali ti hale helo bi bayaleru latagi halu haga hene. Tigua mana lo wini ngagobi tinaga mamali manabi baya hanguore manda biaihe howa ani latagi haga hene
5 Maru tigua iba gana gahangeru wabu wiyagola marume bi teru baya hangu gilibu wigi biniya.
6 Maru ti muni mbiraleru dewaorewi howa tini daluni agali haguane howa bayaleore haga biniya.
7 Wali agali uruni tini daluha heangi mini lene timbuni halu ti homa nabi heangi tini damene bu hearume tinaga mini yaraga haga bialu haga hene.
8 Maru henedarunaga mini timbuni ayu wiaho wiaabo ho ngagola wali agalime tinaga mini yaraga halu haabo ka.
9 Anigo maru henedarunaga mini nawi erebaore heneya. Ti homayagola nde ti mitangi holene mbirali naheneya. Ainde tinibi tinaga waneiginibi mbira naheore mbauleya.
10 Ai ayu iname wali agali abale mana bayale bialu haga homeneru wali agalime embeda nahe manda biaho haabo heneru mitangi budai bialu turu hama.
11 Mana bayale tigua bialu hene ngago heba tinaga mini heba ti waneiginime yu henego mani yu yobialu waneigini aguanerume yu hama ibinigo nga.
12 Waneigini tigua Anduane Homogonaga habo nalolene bi lo wini ngago hongo ho yu kagola waneigini aguane maha ho aribia hararume ti abanaga bi lo ngago talialu holebira.
13 Hameigini ti ariago biba nahe haabo halu tinaga mini ereba nahe wiaabo holebira.
14 Ti homalu tinaga ha̱lo holene baya wiago handa walia halu tinaga mini ereba nahe wiaho wiaabobo bu wulebira.
15 Wali agali bibahendeme mamalinaga manda bayale abale bamba wu henedaru latagi halu kagola wali agali ngoaiho bedarume ti mo turu halu bi lolebira.
Inogo Noala henego ogo
16 Inogo ibu Anduane Homogo heba mandagi ibagabu haga henego ainde Anduane Homogohanda dahuliya andaga haru halu pene. Ibugua wali agali mani holebiraru bu mini beregedo halimu lalu mini beregedolene mana biawai hene.✡ Pig 5.24, Hi 11.5, Yu 14
17 Anduane Homogohanda handalu hearia Noa ibu hangu agali tigabi hearia de hendene. Ai wali agali maru hearu mo ko hai hayagola ibu hangu bayale hene. Ani bialu iba li timbuni ogoni hundiyagola wali agali emene dege maru dindini hene.✡ Pig 6.9–9.17 18 Ani heagola Anduane Homogohanda wali agali iba lime halu mendengi bo wahai nahole lalu Noala habo nalolene bi lo wini.
Abarahama henego ogo
19 Abarahama ibu wali agali bibahendenaga mamali timbuni mini lene mbira henego ibu ale mende naheore.✡ Pig 15.1–17.27, 22.1-18 20 Ibugua Anduane Homogo Daligaore kagonaga bi mana hale howa talialu heagola Anduane Homogohanda ibula habo nalolene bi lo wini. Anduane Homogonaga habo nalolene bi lo winidagoninaga Abarama ibuni tinginini mo wialu ibuha bahondolene ibu wiangi ibugua Anduane Homogonaga bi hale howa talialu haga hene. 21 Ani bialu heagola Anduane Homogohanda heneneore bulego Abarahamahondo lamialu ibu damene mani hama polebirarunaga minini howa wali agali bibahendeore dindi bibahendeha karu ti mo turu holene wulebira. Ani bialu ibu waneigini aguaneru dewaore iba angeni iba mu ngaligobi holebira. Ani bialu ti ibugua mo yaraga halu hari daligani yakundi kadagua helolebero. Ani bialu dindi timbuni mbira ti mulebero lalu bini. Dindi ogoni iba solowara kira bedago dombeneha ngago ai tubari uyuraha yagi iba Yuberedisi porago tubari wialu pialu dindi wimaro bidagoria tagira polebira, lalu lamini.
Aisaga Yagabalanaga te ogo
22 Anduane Homogohanda Aisaga ibu Abarahama iginiyagola habo nalolene bi ibula lo wia dege bini.✡ Pig 17.19, 26.3-5, 27.28, 28.14 23 Ani bialu mani wali agali mo turu halu mo gumbila holenebi habo nalolene bi lo winigo ogoni Yagabaha lone mo ba unu hene. Anduane Homogo ibugua Yagaba mo turu holeore ngo lalu ibugua dindi tuwu merogola hameigini homberia (12) howa dindi ogoni tuwu ta holebere lalu lamini.