1 Oniasa igini Saimono ibu loma binigo mo miaga agali haguane timbuni heangi Anduane Homogonaga anda lone mo tiga buwa arema buwa ibugua anda ogoni lone mo bayale helene. 2 Ibugua Ngode Datagaliwabe anda heagonaga pabe hagira lone arema bialu ege pabe ogoninaga nenani mamagealinaga anda emeneru lone bima irigi halu bini. 3 Ai Saimono ibu heangi ibugua iba berelonaga uli timbuni mbira tombo winigo ogoniha iba timbuni iba kuyama biraradagua berene. 4 Ani bialu ibunaga wali agali bu hearu mo ko holigonaga mini burugu lo hene. Ani howa waitigime ibalu tanoha abale anda ibulino tanonaga pabe baya hangu arama bialu mo hongo howa bialu hene.

5 Ai Saimono ibu Anduane Homogo andaga tamu Hobane Loma Biaheneore laga heagoha howa tagira ibiyagola ibunaga dengui wáleore tagira ibiyago hondowa wali agali dewaore ibu ngola hole ibai hene. 6 Tigua handalu hemiria ibu yakundi egabi laragoha kaligobi ege datimbu haragola wá timbuni hagagobibi hearia hendene. 7 Tigua handalu hearia ibu de daibi ni hongohe dalu Anduane Homogonaga anda dangini daba hagagobi halu ni domo yari tara tara bi hari beraliba pele kagoria wu paga hagagobi hearia hendene. 8 Tigua Saimono de handalu hearia yari biagane baya dedaligobi halu iba angene datani baya taraore bu kaligobi hearia hendene. Ani bialu ira hongone Lebanono hari ngagoha andaho hagagobi hene. 9 Ibu bayaore ira denela ira hagua nga bilo loma bu delaga dabu kagoria ngaligobi halu ngolome wabini gabo be baya ege to̱le̱ yolo dewame miagane tara tara ngarume mo yaribia howa ngaligobi hene. 10 Ibuore ira olibe lini dewa daga kagobi halu ira mende guraya ale anda halu lu holene wiadege bialu anda howa hari mindini ela habehe piagagobi hene.

11 Saimono ibugua ibunaga aga bayale ngago mo karulalu yari tara tara ngaru mo karula bialu Anduane Homogonaga loma biaga dabu kagoria porangi baya taraore mbira haga hene. 12 Loma emene agali loma binigo mo miaga karunaga giha yidaru yamu yuwa agali ibu damene karu baba mandagi nogo egaru loma bu deloledagoria pu haga. Ibuore ira tamia baya taraore Lebanono irabuha hagagobiore hene. 13 Ibu dombeneni helowa loma bu minigo mo miaga Arono aguane bu hearume ibu ho mabu biyagola ibu pibi ayage ale yuniru ha amunanabi haradagua biniya. Tigua Anduane Homogonaga lomaru giha yaga yaga buwa tinaga aga bayaleru karulai damene howa Isaraele wali agali bibahende deni heyu hai haga heneya. 14 Ai Saimoni ibugua bo lomabu miaga dabuni Anduane Homogohondo bi howa ibugua Anduane Homogo Bibahende Hongo Haiheore kagonaga loma mo manda manda biaga. 15 Ibugua iba be mo yamuwa waini iba loma ngago odo loma bu ngelaga. Lomanaga nga baya taraore birago pialu Anduane Homogo Daligaore Bibahende Hongo Haiheore kagoha pelonaga ibugua waini iba loma ogoni loma bu wiagane dabu heago gene dindiha odo baede haga bini. 16 Ani biragola Arono aria bu hearume bi hongo howa ladaga daga bialu tinaga pilipe bigulibi pu lalu biaga hene. Ani biragola wali agalime Anduane Homogo Daligaore kago mitangi bilonaga mo mitangi bia halu bi hongo howa ladagadaga biaga hene. 17 Anidagua biragola wali agali bu karume abaleore dindini bulupalu ibira howa tigua iba gana larago hale hoabi darabi mbira lagane wini. 18 Ani biragola wabuni halu mbira henedagome tinaga ngitaru balu turu holene iba ganaru laragola tinaga iba gana larago hale howabi turubi mbira laga wini. 19 Ani laragola wali agalime Anduane Homogo Daligaore kagohondo olalu Ngode Datagaliwabe dara hagane kagonaga deni howa bi lalu howa lolene winidago lai halu purogo laga wini. 20 Ani bialu Saimono ibugua dalipe howa ibunaga gi Isaraele wali agali bu karu bibahendeha dogola angua halu ibugua Ngode Datagaliwabenaga mini loleore turu howa mini lalu Anduane Homogonaga mo turu holene tiha helo miaga hene.✡ Dag 6.24-27 21 Anidagua biragola wali agali ti dindini halu mende lone bulupalialu Anduane Homogonaga mo turu holene miaga wini.

22 Ai tígua Ngode Datagaliwabe ibu wali agali bibahende aba kagohondo turu holene bi ladaba. Ibugua mbirale timbuni ngaru biaabo haga ka. Ibugua ina ai̱yahanda ina taba hanayangi howa ina dara howa handaya ho hama ibalu henego haabo kagoni. Ani howa ina dara halu inahondo mbirale bayale ngago dege bialu haga ka. 23 Anduane Homogohanda ina mo turu helobi ibugua bamba biaga winidagua ayu Isaraele wali agali bayale holene ibilelobi ina ibuhondo bi laro. 24 Ani bialu ibugua ina dara halu mbirale ko damene inaha ngaru mo wahai helo ina bi laro.

25 Wali agali í̠ hame nalene halu tebira kago ainde tebonego ko ngubiore ka. 26 Halu mbirago ibu hari Sia kagoha ka halu mendego ibu Pilidia hameigini bu kagoha ka. Ani bialu wali agali luluorene luluru Segeme tano ngagoha bu karu ti ka.

27 I̱ Yasu Siraga Eleasa aguane mbira Yarusalemeali kogoni. I̱na wali agalihondo i̱naga mini gigabi manda bayalebi ngago lawai holene hame lo howa mbuga ogo gili biru. 28 Wali agali bi ogo baya hangu manda biyagua tigua manda bayale mo yu holebira. 29 Tigua bi uruni talialu hayagua tinaga biabe bulene ngago biai holenenaga hongo karulape yu holebira. Ti Anduane Homogonaga wáholene ngagoria ibaga bu howa ani holebira.