1 Anigo í̠ inanaga Ngode Datagaliwabeore kegoni howa í̠naga miniha mo palia holene karulo halu mana tigabiore ngago talialu haga ke. Í̠naga miniha keba abale tungulope nahaga ke. Í̠na dara holeneme mbirale bibahende karubi ngarubi haru howa handaya ho hai haga ke. 2 Í̠naga hongo holene ina manda bidamagome ina mana ko birimayaguabi ina í̠naga wali agaliore kema. Anigo ina nde í̠ninaga dabeneore holoma̱ya daba bagiho heledego ainde iname mana ko bulene hame naledema. 3 Mbirali baya hangu í̠niore manda biai ho kago ibu bayale tigabiore ka. Mbirali í̠naga hongo timbuniore gibiorebi ngego hondowa manda bu kago ibuha haabobo holene yu ka. 4 Ainde mbirale agali tinaga manda wiadagua gime wabu wini bu ngaruni aria mbiragome ina wali agali kemaru haru pubagi naholebira Agali ira dibu bogo wahaga bialu gime wabini ngarumebi deme hondolene yári tara tara hiru wini ngarumebi uruni aria mbiragome Ngode Datagaliwabe helalu ina haru halu kaundiaha pubagi naholebiraore. 5 Wali agali lulu mini nawi karume mbirale irame wabinibi baya urunibi de hondowa tinaga bu miniha mo kiaula haragola tigua mbirali ema nabiaga holene nahe uruniale ngagohondo bi pupu wialu haga ka. 6 Wali agalime mbirale uruniale wabiyaguabi deme hondolene urunialego hame layaguabi urunihondo bi pupu wiyaguabi wali agali urunidagua biaga kago ti mana ko ngago turu haga ka. Anidagua biaga karu ti mani howa tininaga mana ko ngubi uruni yu tiga bu hayagonaga pani tandaga koore ngago nalu holebira.

7 Agali be dindime wabiaga kago ibugua dindi waru gedaore ngago dugu mbera bigi buwa baya hanguore mo beregeda beregeda bialu ibuninaga gime beledi tara tarabi be tara tarabi wabu wiaga. Maru biabe bayale ngago bulenaga wabu wialu maru biabe damene bulene ngaru bule wabu wiaga. Ibu be uruni wabialu howa dindi mbiraore ogoni degeme wabialu wabiagane manabi mbiraore biagadagua dege bialu wabiaga. Agali be wabiaga kago ibunime be mbirago ogoale bule lalu mo daba bagi haga biaga. 8 Ani bialu agali ogoni ibugua dindi mbiraore ogoni aria dege duguwa mbirale dama mitangi bialu bi pupu wiaga wabiaga. Agali ogoni ibuninaga horo bame mohole biaga. Ainde agali ogoni ibuni dindi agali howa ibuni áyu dege dindiha howa ibinigo ibunaga horo mohole biaga ka. Ani bialu dindini lu nahe abale homalu ibunaga tingini lone dindi ho dai bulebira. Ibunaga holene bame dano howa mo yu hayago lone miaga kagohondo mia dai bulebira. 9 Agali ogoni ibunaga dindini holene emene tigi mbira hangu halu abale homolene ngago ainde ibugua uruni mitangi nabiaga ka. Ibu agali mini lene holenaga ibugua agali maru ngolo silibarume mbirale wabiaga karu baba bolangua haga haga bulene manda biaga. Ibugua agali maru boronosime mbirale tara tara wabiaga karubi dege holene manda biaga ka. Ai mbirale ibugua wabiniru handalu keria ngolo siliba boronosirume wabini handalehe wabu ngagoyu ai henene ani wabini ndo ke̱ howa dindi hangume wabu wiaga. 10 Agali ogoninaga gubalini be abalu ale howa ibunaga yu tiga mini mbiraore wulene dindi himu bame ngago ale howa ibunaga holene kagonaga yolobi nagalone daga nawini halu bida. Ibu yolo bulenego dindime be wabule yolo biagagobi nakarulape dege ibu nagalone ka. 11 Ainde ibuni wabiaga Ngode Datagaliwabe kago emeneorebi manda mbira nabiore ka. Ani bialu ibunaga holene Ngode Datagaliwabehanda ibunaga buhe̱ pulaanda hayagola ibuha holene mo karula hayagobi Datagliwabehanda agali ema bialu piaga helo wabu helayagobi manda nabiore ka. 12 Tigua manda bialu karia inanaga holene yu kemago mo gini bia holene alebi mbirale mbira yolo mulene alebi mbirago kemabe tobaho ka. Tigua mitangi bialu hariga tara tara ngaru ko bayaleyaguabi tanabi taya bialu yolo mulene dege manda biaga ka. 13 Ani howa ibugua dindi duguwa mbirale dama mitangi bialu bi pupu wiagaru wabialu be abale pambu lagane ngaruale wabiaga ka. Agali mana uruniale biaga karu tigua mbirale uruni mana ko berema lo manda bu howa dege bialu haga.

14 Wali agali dewalime mana lehe luluale mana ngaru bialu hagago ainde waitigime ibalu í̠naga wali agali bu hearu bibahende bope hai hayago ti luluore haya. Ti mini nawi howa biya. Ainde waneigininaga mini ngagome tinaga mini wu bolangua howa ngabada. 15 Anigo irane tigua deme hondolene wabu ngaru bibahende Ngode Datagaliwabe dege ka lo manda bidagome nakarulape. Ainde gime wabini uruninaga de kagome mbirale karu ngaru handa nabiaga ka. Tinaga ngui kago ai nguiha buhe̱ namiaga ka. Tinaga hale heledago ai bi larago hale habe nahe ka. Tinaga gi hondone kagome ema bialu mbirale ela halu ogoaleda labe nahe ka. Wabini uruni tinaga ge kagome ge ogoni howa ibaga bialu pobe nahe ka. 16 Agali mbirale wabiaga kago ibunaga holene bame dano ho kago howa dege ibugua wali agali Ngode Datagaliwabe yutiga nabiaga karunaga bi pupu wiagane nabiagaru wabiaga ka. Anigo mbiralime bi pupu wulene mbira ibunialeore wabibe nahe ka. 17 Wali agali bibahendeore tinaga homolene horo mbira ngelowa dege ka. Ai mbirale mana ko bialu wabini ngaru bibahende tinaga ema bialu holene naheore nga. Agali tiniha buhe̱ lalu holenehe howa tini mbirale bi pupu wiaga ngaru bolanguahe daliga ka. 18 Ngode Datagaliwabe-o í̠naga wali agalinaga waitigi karume, ema bialu piaga ko tara tara bu karuhondo bi pupu wialu haga ka. Ema bialu piaga maru tiha mini mbira nawioregome ti emene bayale lowa ema bialu piaga tigua bi pupu wiaga uruni koorehondo bi pupu wiaga ka. 19 Ani bialu ema bialu piaga wali agalinaga bi pupu wiaga uruni wali agalime de handalu bayaledago hondowa bi pupu wibehe ndo. Ai Ngode Datagaliwabehanda mbirale ibuni wabiniruni bibahendehondo bi bayale lamialu howa ani buwa ema bialu piaga ko uruni tihondo mo turu halu bi lamia nabi berelo wahene.