1 Mat sip sip sɨla vɨli wan njaambiya vɨtɨtndɨ maa nyinangwut kɨndɨgɨn kai. Kwo lɨndɨ. Samat kwo lɨndɨ hap aua. 2-3 Kɨndɨngɨn tapman tɨnja njɨmbla ngɨlɨndɨ maa Godna mɨndama sambɨmba ensel sɨla vɨli laataa lɨndi maa vɨwun. Vɨlɨtɨnja kwuk kwutaa lɨndi. Kɨta kɨta ensel kwutaa lɨndi. Laataa lɨndi maa nat ensel yalaa nɨma njambɨna mɨndama sambɨmba laataa lɨndɨ. Ndɨ golmba kwutnja aw kwutaa lɨndɨ. Wan awmba ya vɨtɨndɨ, apma njangu veilɨga yagɨmbi woke lɨndɨ. Ndɨ kat nɨma sakwat apma njangu veila mbaw kwindi maa kwutaa yamba taagandɨ. Godna apma nɨmba ndɨ kat wagalanja apma nyaangɨt wungi nɨma njambɨmba lɨga yagɨmbi vla wokendɨ, God wutndɨ. 4 Ensel kwuta la yagumbio nyaangɨtno kɨta vat wokendɨ, God wutndɨ. 5 Wan ensel njambɨmba vɨta ya kwuta awmba tuga taagalaa yisendandɨ maa ndaiga kɨpmamba ndandɨ. Ndandɨ maa nɨma vlap vlap kwutndɨ kak wutaa kembanda vak vɨwun. Vlap vlap kwutaa nɨma yinaw kwutndɨ kɨpmamba.

6 Kwuk kwuta la ndi ensel sɨla vɨli mɨna van kwup vɨlɨk mɨna lɨndi. 7 Nat kɨta ensel kwuk vɨlɨtndɨ maa yipma yiliga ngu vla lɨga kambakno ya vɨta kambakno yelogweno kɨpmamba ndandɨ. Kɨpma mi aywaa nagilaa mbaapma kuvut taagandɨ. Nat kɨta mbaapma ya vɨtndɨ, kavle yindɨ. Mbaapma vlɨlɨlɨk kwo lɨndɨ. Kɨpmamba lɨga yuwi aywaa ya vɨtndɨ, ngɨlɨndɨ.

8 Nat vlɨlɨlɨk wan ensel kwuk vɨlɨtndɨ maa nduwi vla la nɨma ya vɨta nda aywaa luwiga ndaiga nyingi ngumba ndandɨ. 9 Nyingi ngu la ngu mbaapma kuvuk taagandi maa nat kɨta mbaapma yelogwenat valindɨ. Vɨlɨlɨk mbaapma kwo lɨndɨ. Nyingi ngumba yetɨ la nda mbaapma kuvuk taagandi maanat mbaapma mɨna kavle yiga kiyandi aywaa. Nyingi ngumba yilɨga njaambɨt ndino wupma lɨgandi.

10-11 Nat kuvuk wan enselkwuk vɨlɨtndɨ maa nyinangwupmba la sɨngwuk pɨta tuwaymba sagalanja ya vla vɨka ndaiga kɨpmamba ndandɨ. Kɨgɨn ngumba ndandɨ. Wan sɨngwutna sɨ Kavle Njangu Veilɨga Ngu. Kɨgɨn ngu mbaapma kuvuk taagandi maa nat kɨta mbaapma kavle yiga kavle njangu veindɨ. Kan kavle ngu kɨ la nɨmba nɨma sakwat kiya lɨndi.

12 Nat aynak wan ensel kwuk vɨlɨtndɨ maa nya mbap sɨngwut mbaapma kuvuk taagandi maa nat kɨta mbaapma kavle yindɨ. Nya samat kulun walaa nandinya tambɨ kalɨlɨ. Mbap samat kuvun walaa sɨlɨla njɨmbla ya tambɨ kaalandɨ. Sɨngwut samat kulun walaa lɨndɨ nɨmamba ana sɨlɨndi. 13 Nɨma ngawi nyinangwupmba wiyaka yilɨndɨ, vɨwun. Ndɨ nɨma kwundimba walɨndɨ, wutwun. Kɨpmamba lɨga nɨmba ngwuk kat nɨma vat miwa yiga lɨgowun. Nat ensel kuvuk kwuk vɨlɨtndi maa nɨma kavle vat ngwuk kat yaigandɨ waa walɨndɨ, wutwun.