3
Yesu bana Nikodimo buye hilukahihi.
1 Tu kaliva saꞋeyana gimiyami, bana tonagona tafatafalolodiyao adi egana Falisi ana yoꞋo kalivana, ana egana Nikodimo, ada bana miYuda yama tovehimeya saꞋeyana. 2 Ada bogi saꞋeyana againe hida kalivai-nadi Yesu againe giꞋela gigahena gigayo, “Tovehawala lakahi, ime ahalamane Yaubada giꞋiveninise be bonana unavehawalema, faꞋina tova moyaꞋaina nima ana iyaꞋiyaya ufifaisewana. KaꞋi Yaubada keke O buye wadamiyami o, iyaꞋiyaya-nadi keke afaiweya.”
3 Au Yesu gigahena gigayo, “Yaubada gihalamaneku tu gagahegahe. KaꞋi kaliva keke ginatubuga-havagi, kadu keke anafaiweya Yaubada yana yoꞋogaga agaidiya ana luku ginahalamaneni.”
4 Bana Nikodimo gigayo, “GavaiyaꞋamine kaliva lakahina kwamana amine ginatubuvagu? Bana keke anafaiweya hinana kamodiya ginaluku-yo kadu ginatubuga-havagi, keke.”
5 Bana Yesu gigayo, “Yaubada gihalamaneku tu gagahegahe. KaꞋi kaliva yawaina ivaguna gufa againe kadu AluꞋaluwa Mahalina againe keke ginavaini, kadu keke anafaiweya Yaubada yana yoꞋogaga agaidiya ginaluku. 6 BanaꞋe amanadi kaliva dayagine ginatubuga, au kaliva wowona luluna ginavaina tu banaꞋe ma AluꞋaluwa Mahalina yawaine ginatubuga, au AluꞋaluwa yawaina ginavaina. 7 Iya gagahe gagayo, Omi wanatubuga-havagi. Hida yaku gahe againe keke nuwami ginavegafoꞋuyaꞋuya. 8 Kaliva yana tubuga AluꞋaluwa Mahalina yawaina againe medema vaita bolimana amine. Bolimana ginauna tauna givehimeyena amine. Butuna wanogalina higa ana aituha, tu inubana kadu ana lauyabu keke wadahalamaneni. Meda anafaiweya AluꞋaluwa Mahalina yawaina inubana kadu ana lauyabu keke wadahalamaneni, tu hai kaliva AluꞋaluwa Mahalina yawaina againe ginatubuga, medema yawaina ivaguna ana aituha yana huluva againe waꞋitana.” Hidemi Yesu gigahe.
9 Tu Nikodimo gigahena gigayo, “Kaliva yana tubuga-havagi gavaiyaꞋamine? Iya keke gadahalamaneni.”
10 Bana Yesu gigayo, “Gavadi-yo o tovehawala lakahi miIsileli agaideya tu hida gaitoma galukahihiyena-ma ufaniyeni. 11 Yaubada gihalamaneku tu gagahegahe. Ime bona ahalamane-moꞋena ma alukahihiyena ada gavadi aꞋita-moꞋena ma ahawavemogatalena tu omi tovehawala ma bonama keke wadavenogaleni. 12 Babi ana miya faꞋina omi agaimiya galukahihiyena tu keke wadavetumaganeku. KaꞋi lobama ana miya faꞋina ganalukahihi, keke-moꞋa wanavetumaganeku. 13 Ada keke tamo hakwadi lobameya gidalaka-yo gidahobuꞋela tu Iya TohobuꞋela akukaibe. Au lobameya gamiyami be gahobuꞋela.
14 Boi tuwai-moꞋena walaꞋa againe Mosese oloto kainumuleya gibubuna be ai againe gikivemididina. Kadu meda anafaiweya Iya TohobuꞋela ai againe makewa hinakivemididiku. 15 Gavana faꞋina-yo hinakivemididiku? Hinakivemididiku be higa gava kaliva Iya ginavetumaganeku, medema yawai-vagahina ginanuhagana.” Hidedemi Yesu gigahe. Yo 7:50-51, 19:39 1Fi 1:23 Ta 3:5 Yo 1:13 Ail 21:9, Yo 12:32
Kibababala o kaꞋi matahiwadi, gavaimi kananuhagani?
16 Au higa Yaubada nuwanuwana lakahi-moꞋena tomiyababi, faꞋina Natuna anakaibeꞋu-moꞋa gihawahegena be gava kaliva Bana againe ginavetumagana, medema keke ginaꞋalika-vagata tu yawai-vagahina ginanuhagana. 17 Yaubada Natuna babiya giꞋiveninisena keke vaita tomiyababi matahiwadi ginaveledi, keke-moꞋa. Au giꞋiveninisena be kaliva ginakibababaledi faꞋina. 18 Gava kaliva Yaubada Natuna againe ginavetumagana au medema Yaubada keke matahiwadi ginaveleni, tu gava kaliva gidibutoyoga be keke ginavetumaganeni au aheꞋi, ana wamatahiwadi Yaubada matane ahe gimimiyami, faꞋina Natuna anakaibeꞋu-moꞋa ana egana keke gidavetumaganeni. 19 Yaubada yana matahiwadi gavana ana inuba? Tomahala babiya gihobuꞋela nonogana, kaliva nuwanuwadi uyuꞋuyuyune hinamiyami be dewa koyona hinafaisewana faꞋina. Yadi dewa koyona faꞋina keke nuwanuwadi mahalina againe hinamiyami. Hidema faꞋina Yaubada matahiwadi ginaveledi. 20 Tokoyona keke nuwanuwadi mahalina. Au hivenikohiyena, faꞋina mahalina yadi dewa koyona giꞋiveyemaunina, ada au keke nuwanuwadi mahalina againe hinayemu. 21 Tu badi kaliva dewa tunutunugina hififaisewana-ma nuwanuwadi mahalina againe hinamiyami be moyaꞋaidi hinahalamanena Yaubada yana faiwala againe yadi dewa tunutunugina hififaisewana. Lo 5:8, 1Yn 4:9-10 Lu 19:10, Yo 12:47 Yo 3:36 Yo 1:5
Yoni Tobafitaiso Yesu yana kikaiwabu faꞋina gilukahihi.
22 Tu Yesu gilukahihi gihavaina, Yelusalema gihegena ana tomuliya buye hina Yudiya awaꞋawanine buye himiyami ada kaliva Yesu yana vehimeya againe hibafibafitaiso. 23 Ada kadu Yoni melala ana egana Ainoni againe, medema Salimu liline, kaliva gikikivebafitaisoyedi melalai-nadi againe gufa lakahina gidauda faꞋina. Ada kaliva vevine bana againe hinauna hibafibafitaiso. 24 Medema tovai-nadi Yoni deliya aimo keke hidaseni.
25 Tu Yoni ana tomuliya tufoidi kwanamiYuda saꞋeyana buye hivekwageya. Bwanene ana abaꞋikolakola tafatafalolona faꞋina hivekwageya. 26 Au Yoni ana tomuliya bana againe hiꞋela hiꞋawatalatalaina higayo, “Tovehawala, Bana boi yuwa Yolidani buye wamiyami ada Bana faꞋine ulumamala-ma, Bana kalivai-nadi againe adamoya kaliva moyaꞋaidi hinauna hibafibafitaiso. Vaita o againiya hidaꞋela tu Bana againe hinauna.”
27 Higahe-yo Yoni gigahedi gigayo, “Yaubada anakaibe vehimeya givetavetala. Hakwadi yana kikaiwabu lakahina kadu hakwadi yana kikaiwabu kabiꞋona ma Yaubada anakaibe givehimeyena. 28 Omi taumiyao boi iya gagahe yaku gahe wanogalina gagayo, Iya keke Keliso, BanaꞋe Yaubada givegidena be yada yoꞋo ginanagoyeda amanadi, tu Yaubada giꞋiveniniseku be wai ganagona yana eda ganakidewedewena faꞋina. Hidemi gagahemi. 29 WaꞋita, kaꞋi kaliva ginanagi, kwamayoku bana againe ginaꞋela buye hinalukahihi ada kaliva tobohiyana badi lilidiya ginamiyami-ma, tonagi agona yana wavemwamwala ginanogalina. Ginanogalini-yo bana kadu ginavemwamwala. Ada iya vaita kaliva toubohiyana amine. Meda anafaiweya moyaꞋaidi Yesu againe hiꞋelaꞋela faꞋina, iya Yesu tobohiyana gavemwamwala-moꞋa. 30 Ada aku vehimeya gavaina higa Bana yana kikaiwabu ginalakata tu iya yaku kikaiwabu ginakabiꞋo be ganamiya-kawowo.” Yoni au hidemi gigahe. Md 14:3-4 Yo 1:26-34 Yo 19:11
Vetumagana Yaubada Natuna againe faꞋina.
31 Tu Bana higa wese lobameya gihobuꞋela-ma moyaꞋaidi kikaiwabu againe gitubuhegedi. Kaliva babiya gilakayemu-ma bana babi ana kaliva kadu babi ana nuwanuwa gilukahihiyena, tu kaliva lobameya gihobuꞋela-ma Bana anakaibe Tokaiwabu. 32 Ada gavadi lobameya giꞋitana be ginogalina, medema faꞋina gilukahihiyena tu keke tamo hakwadi Bana bonana gidavenogaleni. 33 Tu gava kaliva Bana bonana ginavenogalena, medema ginaꞋalakakila ginagayo, Yaubada Bana velemona. 34 BanaꞋe Yaubada giꞋiveninisena-ma Yaubada bonana gilukahihiyena, faꞋina Yaubada Bana againe AluꞋaluwana keke maꞋita gidanuwaloloneni, au gidodobodabodana. 35 Tamada nuwanuwana Natuna ada abavehimeya gaitoma moyaꞋaidi agaidiya Bana nimane gisedi. 36 Gava kaliva Yaubada Natuna givetumaganena medema yawai-vagahina ginuhagana, tu gava kaliva Yaubada Natuna ginadibutoyogena be keke ginavetumaganeni medema yawai-vagahina keke-moꞋa ginanuhagani, au Yaubada yana ilaꞋa bana kalivai-nadi againe ginaduva-vagata. Au hidede amine. Yo 8:23 Yo 1:32-34 Md 11:27, Yo 5:20 Yo 3:16-18, 1Yn 5:12