1-4 Tiuri, te táequenepa eta juca, viyanapa víti te Galilea, vicucha­pa­yarehi ema Jesús. Ánaqui matiarihihi ema Pedro, ema Tomás, ema Natanael, ema nuparape Jacobo, nútipa nuti Juan. Natiari­hivare ena apinanahi vichamuriana. Tacahe, ema Pedro máichahavipa:

—Nuyanayare nénipa­nayare te cáquiure —macahepa.

Tásiha, víti vijicapapa éma:

—Véhica­viyare víti apanava —víchapa.

Tacahe, te vítecapapa, viávacuhapa tayehe eta pacure. Vénicaipahi te jena yátiquenehi. Tájinasera vítuca­vahini. Te tijára­ra­hi­chi­cha­yaréipa, vímahapa ema Jesús. Titupi­haipahi te tachausi. Váhisera vímati­va­nehini. 5 Tásiha, téchaji­ca­havipa:

—¿Ícharacava, nuchicha­naveana? ¿Tájina ítucava eta jima? —macahepa.

Vijicapapa víti:

—Tájina vítucava —víchapa.

6 Tásiha, éma tivane­ca­havipa viáquijieca eta viyehe tarrafa te apachacaya eta pacure tinapaicahi te vaure.

—Eta ítusia­vayare eta jima —máichahavipa.

Visuapa­hisera víti. Tásiha, te vichuruecapa eta viyehe tarrafa, vaipa víchinahini taicha táetaviuchahi eta camurirahi eta jima. Tijita­ca­renecha. 7 Tásiha, núti níchapa ema Pedro:

—¡Émara ema Viáquenu! —níchapa.

Masami­ne­nu­richuhi ema Pedro eta níchirahi, ticamui­ri­ha­vanepa taicha tiveja­mu­hia­cavahi éma eta mamuiriha. Tépuhe­cavapa, mavarairahi macapa­ya­ca­va­ne­yarehi ema Viáquenu. 8 Víti apamuriana vipauchapa eta tachausi. Vichurue­ca­paipahi eta viyehe tarrafa; tínica­paipahi eta camuriquene jima. Cien métrori­chu­hi­se­rapuca eta viyere­hirahi eta tachausi. 9 Te viúcupaicapa te tachausi, vímaha­rinehi tatiarihihi eta yucu, étapa eta jima jitaruca, étapa eta pan. 10 Tásiha, ema Jesús máichahavipa:

—Iáma eta íturevahi jima —máichahavipa.

11 Ema Pedro machuru­paicapa eta tarrafa. Vímaha­rinehi eta ichape­mu­riquene jima. Ciento cincuenta y tres eta tasimu­rivahi. Váhisera táetsayu­cahini eta viyehe tarrafa. 12 Tásiha, tíchuha­havipa ema Jesús:

—Yare, enica —macahepa.

Tásiha, viyanapa víti, vinica­yarehi. Váhisera vipatsi­ca­vahini viyase­re­cahini te nájaha­hipuca éma taicha tétavi­cavahi eta viárame­sirahi. Vímatia­ca­hisera eta émairahi ema Viáquenu. 13 Tásiha, ema Jesús témeña­havapa. Mavehapa eta pan. Tíjara­ca­havipa. Étapa eta jima táimaqui­quenepa, tíjara­ca­ha­vi­varepa.

14 Eta juca eta mapahe­quenepa eta máimere­si­ravahi ema Jesús eta viyehe eta máechepu­sirahi te máecari.

15 Te vítanesipa eta vinisirahi, ema Jesús mayase­recapa ema Pedro. Ánipa máicha:

—Piti Pedro, nuvaraha nuyase­recavi: ¿Picachu­ri­capuca píti ena nani apamuriana eta pémuna­si­ranuhi? —máichapa.

Éma majicapapa:

—Némunacavi, Tata. Pécharichuhi píti jácani némuna­si­ravihi —macahepa.

Ema ­ Jesús máichavarepa:

—Tiuri, te yátupi­hipuca pémunacanu, nuvaraha pijanea­si­na­nuvaca ena téhica­nua­nayare, taicha vahi náitucahini nacatiu­cha­vahini. Téñama­ca­reanahi —macahepa.

16 Te táequenepa, mápechavare mayasereca:

—Pedro, nuvaraha nuyase­recavi: ¿Yátupi eta pémuna­si­ranuhi? —máichapa.

—Némunacavi, Tata. Pécharichuhi píti eta némuna­si­ravihi —máichapa ema Pedro.

Ema Jesús máichavarepa:

—Tiuri, te yátupipuca pémunacanu, pijanea­si­na­nuvaca ena téhica­nuanahi —macahepa.

17 Te táequene­varepa, mapahequene mayasereca:

—Pedro, ¿yátupi eta pémuna­siranu? —máichapa.

Émasera ema Pedro titsirihapa taicha mapaheripa eta mayase­re­sirahi. Majica­pa­varepa:

—Pécharichuhi, Tata, eta némuna­si­ravihi —macahepa.

Tásiha, máichavarepa ema Jesús:

—Tiuri, te yátupi­hipuca pémunacanu, pijanea­si­na­nu­va­cayare ena téhica­nuanahi. 18 Nutupiruva numetacavi: Eta piámape­ruvahi, píti péchinavahi eta pítare­sirahi. Picamui­rihahi, piyana­hivare te jácani pivara­ha­que­neanahi picaijuhe. Jácanisera áñoanayare eta pichávi­cavaipa, apanainapa eta pítare­si­rayare. Apana­nainapa ena timuria­cha­via­nayare, taicha títiji­vau­cha­via­nayare, tásiha tiámavia­nainapa te jácani pimava­ra­ha­que­nénihi picaijuhe —máichapa.

19 Eta juca máichirahi ema Jesús, mavarairahi máimine­ca­pae­que­ne­ha­yarehi eta máichara­ra­ca­va­yarehi eta máepeni­rayare ema Pedro. Tétavi­ca­vainapa eta macuna­cha­careva ema Viya maicha ema Pedro, taicha vahi téqueca­vaimahi eta máimairahi eta macata­ji­vairaya. Tásiha, máichavare ema Jesús:

—Piti Pedro, tacuija tahapa­pi­ri­cahini eta pítauchira tamutu eta nutupa­ra­si­ra­vianahi —máichapa.

20 Tásiha, tésenie­que­ne­havapa ema Pedro, tímahanupa eta néhieque­ne­hai­rapahi nuti máemuna­runuhi ema Jesús. (Nútirichu núti nuyase­recahi te mesa te nájaha­hipuca ema tíjara­re­ca­yarehi.) 21 Eta máimairanuhi ema Pedro, mayase­recapa ema Jesús tájahapuca eta níchara­ra­ca­va­yarehi núti apana. Ánipa macahe ema Pedro:

—Tata, ¿tájahapuca máichara­ca­vayare ema apanava ema maca?

22 Ema Jesús majicapapa:

—Núti nécha. Te nuvara­hapuca máitareca máimahayare eta nápechi­ra­vayare nuchavi­rayare, vahi tacuimi­pa­ne­recavi. Pítisa­misera, pítaucha tamutu eta nutupa­ra­si­raviana. Tacuija tahapa­pi­ri­cahini eta péhisi­ranuhi.

23 Tacahe, ena nuchamuriana, ichape­rinehi eta napane­re­que­ne­hairahi eta numaepe­ni­ra­yarehi. Váhisera mameta­cahini eta numaepe­ni­ra­yarehi. Tacarichu macahehi: “Te nuvara­hapuca núti máitareca máimahayare eta nápechi­ra­vayare nuchavi­rayare, vahi tacuimi­pa­ne­re­recavi” macahepa.

24 Nupara­pe­naveana, núti yátupi­que­nenuhi eta máimitu­re­nuirahi ema Jesús. Nutupi­ruvahi néchajisiha te juca nájurehi eta yátupi­queneana nímaha­que­neanahi.

25 Jucari­hichaha eta apamuriana máichaque­neanahi ema Jesús. Váipasera támutuhini nájueque­né­hahini, taicha tétavi­cavahi eta táichape­mu­rivahi. Te vítame­ta­ca­pucaini tamutu eta máichaque­neanahi, váipapuca vicura­ta­hahini vítuca, namutu­hinéni ena achaneana te juca apaquehe tiájueque­ne­rahiana.

Tamutupa eta juca ­ nájurehi.