1 Lagipem koma, O Yahweh, ti napasamak kadakami. Kitaem ti pannakaibabainmi. 2 Naiteden kadagiti ganggannaet dagiti tawidmi; naiteden kadagiti sangsangaili dagiti balbalaymi. 3 Nagbalinkamin a bastardo, ta awanen dagiti ammami, ken kasla nabalon dagiti innami. 4 Pirak ti katukad dagiti danum nga inumenmi, ken mailakon kadakami dagiti kayomi. 5 Kamkamatendakami dagiti kabusormi; asidegdan ket uraymi la marikna ti angesda kadagiti teltelmi. Nabannogkamin; awan inanami. 6 Inggaw-atmi dagiti imami kadagiti taga-Egipto ken kadagiti taga-Asiria tapno ikkandakami iti taraonmi. 7 Nagbasol dagiti ammami, ngem awandan, ket dakami ti aglaklak-am kadagiti basolda. 8 Iturturayandakami dagiti tagabu, ket awan mangispal kadakami manipud kadagiti imada. 9 Ipuspustami ti biagmi tapno maalami ti tinapaymi iti sangoanan ti kampilan ti let-ang. 10 Ti kudilmi ket maiyarig iti maysa a pogon, a nakabarbara gapu iti bisin. 11 Indaddadanesda dagiti babbai iti Sion, dagiti birhen kadagiti siudad ti Juda. 12 Imbitinda dagiti prinsipe babaen kadagiti mismo nga imada, ken saanda a rinaraem dagiti panglakayen. 13 Impanda dagiti babbaro iti balay a paggilingan, ken dagiti agtutubo a lallaki ket marigrigatan nga agbakbaklay kadagiti troso. 14 Pinapanawda dagiti panglakayen iti ruangan ti siudad, ken pinapanawda dagiti babbaro manipud iti musikada. 15 Naggibusen ti rag-o iti pusomi; nagbalin a dung-aw ti panagsalsalami. 16 Natinnagen ti korona manipud iti ulomi! Asikami pay! Nagbasolkami gamin! 17 Kimmapsuten dagiti puspusomi, ken nagkudrepen dagiti matami, 18 gapu ta agdakdakiwas dagiti atap nga aso idiay Bantay Sion, a nabaybay-an. 19 Ngem sika ni Yahweh; agturayka iti agnanayon, ken adda iti amin a henerasion ti tronom. 20 Apay a lipatennakami iti agnanayon? Agpaut kadi pay ti pananglipatmo kadakami? 21 Pagsubliennakami kenka, O Yahweh, ket agbabawikami. Isublim dagiti al-aldawmi a kas iti kallabes, 22 malaksid a no talaga a binaybay-annakamin ken kasta unay ti pungtotmo kadakami!