4
Gote-to Ninipe Tane Ondo Yakola, Jona Yataka Yane Oko
1 Gote-to balana nembo tene lawa puato, Ninipe tano okone mino koya napea-kola, Jona bala mini koo paluto, yataka wete yae-pia. 2 Balato Gote ando pote wua leae-pia. Gote nimbato ini kapoyale embo aa-napilini. Jia. Ole dindi lo nimbato wandakali tupa wayumane wete ondowato epelewa yamapane yoo atalene. Nimbato wamba ini wandakali tupa minu koyoyale mandeke pitawa atoto teke, matili mino koya napilini. Wamba namba andaka atoto, wua lo nembo tewa: Namba yame towa yandapene Ninipe tano okona poto, nimbana pii oko wandakali utupane lamae-wando, nimbato Ninipe tane wandakali tupa peyo ome nalolo-pele-yalo nembo toto, nambato nimba tepa alu, palaka Tasisa tano okona poyale pewako.
3 Namba yame towa yanda pene Ninipe tane tupa Gote nimbato peyo ome lanapene kondele okonena, namba omewando, katu lolo peyako nimbato namba ini mino ome laa leae-pia.
4 Jona-to wuane lea-kola, Gote-to balana pii okone yano peyoto, Jona nimbato katu-lo yataka elepe leae-pia. 5 Tano okonena aki mindi peyape-lo andoyale, Jona bala tano okone tepa alu poto, nai-epalanesia anda mindi pitawato okonena peteae-pia. 6 Gote-to Jona nai toto olane loto, eyaka yokone pata atalane okone taka mindi, ayiakame okone yame peyo ombo yakale leae-pia. Jona bala eyaka okonena tambo pangosa pitoto bala epele wete yae-pia. 7 Anate-lene upanda wete Gote-to eyaka yokone nalane sau-nana mindimane eyaka okone noo kapu teakale lea-kola, kapu teae-pia.
8 Matili nai tea angi, Gote-to nai epalanesia ato popo toto pene wetete mindi epekale lea-kola, nai toto peane okone mane Jonana kawane tandaka piya wato, moo malawai laya yae-pia. Malawai lea-kola yuunga lombape-pene yoto, namba omokale okone mane katu-lo namba moyolopeya. Namba omanape-wando katu-lo namba moya napulu-peya leae-pia. 9 Wuane lea-kola, Gote-to Jona lamawuato, eyaka kapu tala oko towa nimbato yataka eleko. Nimbato tika pua yataka elepe lea-kola, Jona-to pii okone yano peyoto, namba yataka wete eyoko, namba omewando okone kuai leae-pia. 10 Jona-to wuane lea-kola, Gote-to Jona lamawuato, utulu mindiki okona ato eyaka oko ikalo anda-yoo atala, utulu lapone okona eyaka oko omala. Nimbato piape aŋako mindikipi mindi eyaka okona pinapili, dee andane guleakale-lopi mindi lanapili tekeko, aŋako okona nimbato wayumane wete ondo elepe. 11 Nambatopi Ninipe tano oko ondo wete eyo. Tano oko andane wete mindi eyakola, wandakali andita tuaindi tausene (120,000) wata aipeke-lo ateyai. Wandakali utupane pitaka mane mana epene mindi anda napeyaini. Bulumakaopi, kambua wete tano okonena ateya leae-pia.
Yakamato pii temane okone ale wato, pii ukupini pepa pelene eya tupa dii loto ale-alapape. Gote-to lapone Jona lamawuato, nimbato nambana pii oko Ninipe tane wandakali tupa lamalu puu leae-pia. Jona-to Gotena pii wato minuto, Ninipe tane bala towa yanda pene wandakali tupa Gotena pii lamaiyae-pia. Utupane mane yamapane moo peke leai-kola, Gote-to utupane ondo wato, minu koya napeae-pia. Wuane pua teke, nanimatopi yanda pene tupa ondo wato, moyape-pene leya.