2 Agra anage hu'ne,

Nagra tusi'a hazenkefi mani'ne'na Ra Anumzamofontega hazenke zanimofona asamugeno, Agra ke'ni'a antahinami'ne.

Fri vahe'mofo kumapi mani'nena fri'za nehu'na nazama huogu'ma kezatugenka, kagra zavi krafa ke'ni'a antahinami'nane. 3 Kagra nasga hunka ame fenkame hagerimofo agu'afinka natre'nane.

Anampina timofo hanavemo nazeri kagigagi hu'ne.

Kagra hanave'ane zaho huntankeno haferina eri kranto kranto huno e'nea timo, nagrira nazeri nakrino refite'ne. 4 Ana hige'na Kagripintira ko nagrira nahe anati atre'nane hu'na nagra antahi'noe.

Kagri ruotge ra mono nonka'a mago'ene onkegahue, hu'na nagesa antahi'noe. 5 Kagigagi huno avune ante'nea timo, nazeri nakrino nanankempi marerige'na ti nakrika ate'noe.

Ame fenkame tami'nea timo nazeri kagigeno,

Hagerimpi inozamo nanuna eri ano vazi'ne. 6 Agonamofo agafafi nagra urami'noe.

Ana mopamofo agu'afinka rentrako hunantesige'na kina hu'na manivava hugahue hu'na nagesa antahi'noe.

Hu'neanagi Kagra Ra Anumzamoka, ana kerifintira naza hunka navare atre'nane. 7 Navu evuevu hige'na frinaku nehu'na,

nagra Ra Anumzamoka nagesa antahi kamugeno, nunamuni'amo ruotge ra mono nonka'afine, Kagrite'ene e'ne.

8 Knare osuno havi anumzante mono hunentaza vahe'mo'za, Anumzamofo asunku'zana zamagra erigaragi, zamagena hunemize.

9 Hianagi Ra Anumzamoka kezati'na kagia erisga nehu'na, nagra zagamepinti Kagritega ofa hugantegahue Ra Anumzanimoka

nagrama huvempama hua kea, amage antegahue, na'ankure nazahu hanavea Ra Anumzamoka Kagrake mani'nane.