1 Epedeme Yesutapo epo atlaiyo, “Wua꞉ ase sikemte dupa momalamale mate ha꞉ha꞉miyo. Amasiyama wua꞉ God dla mikadepe demama na꞉ dla ma mikadepe diya. 2 Adipalati, na꞉ A aya dla alupoli sikemte pasatale me-hutiyepo. Epapedeme koko itapo ikadepe pe-ellalo wekematiye, na꞉ koko iye wua꞉ watle po-atlamalalo wekelemla. Epedeme na꞉ edla wua꞉ta tame ha꞉ha꞉lowe moye dinapela tlowepo. 3 Epedeme na꞉ta tame koko hapulomaye mo-dinapopo gudepame ma ilame puame wua꞉ye elemolowepo. Epame wua꞉ ma mo edla yimkata na꞉ mate ha꞉ha꞉lowepo. 4 Epapedeme wua꞉ na꞉ta ta mo apiye mo-wua꞉malamana.”

5 Amasiyama Tomastapo Yesu watle epo atlaiyo, “Lod, di wa꞉ta ta moye di yeitamana. Di adipammama wa꞉ta ta apiye malapa꞉?” diyo.

6 Epalati Yesutapo epo atlaiyo, “Na꞉ye apipo. Epame na꞉ye ikadepe kokopo. Epame na꞉ye pasakalopo. Epedeme oplami haletapo isikimi api hale tle A hala dla potlowa. Amasiyama ya꞉ hatlo na꞉ tle A hala dla telepe. 7 Wua꞉ na꞉ kokoye malamelepiye, eta wua꞉ na꞉ A koko ma malamelepe. Amasiyama wata oloma itle wua꞉tapo ya꞉ye mo-malamapo. Epame wua꞉ ma ya꞉ye ma-natipo.”

8 Epalati Pilipitapo epo atlaiyo, “Lod, wa꞉ di watle Aye nati-ilipiye, di eta selledlepe,” diyo.

9 Amasiyama Yesutapo asiyama Pilipi watle epo atlaiyo, “Na꞉ alila pasatale dulu dla wua꞉ mate ma-haluwapo. Epapele dulu dla wa꞉ ala na꞉ kokoye pomalamalalo halapa? Epedeme oplami antapo na꞉ye ma-natiwa, ya꞉ye A ma ma-natiwapo. Epapedeme wa꞉ adipalati na꞉ watle atlemama, ‘Aye di watle nati-ine,’ dema꞉? 10 Epapele dulu dla wa꞉ na꞉ta A dulu dla hala koko mate epo Ata na꞉ dulu dla hala koko mate dla ala pomikadepe dlalo halapa? Epedeme na꞉ta wua꞉ watle yu atlamsela꞉ iye monolo malamale tle hame po-atlamsela꞉sema. Amasiyama Atapo na꞉ mate halemama na꞉ tle ya꞉ okoye hamhalapo. 11 Epedeme na꞉ta atlemama, Aye na꞉ dulu dla halapo, epame na꞉ mape A dulu dla halapo, dle koko dla dalepame mikadepe diya. Amasiyama wua꞉ na꞉ta atlamale yu hema pomikadepe dlalo wekelepiye, na꞉ta ulugiyemale koko halomsela꞉uwa dla natipame mikadepe diya.

12 Epapedeme na꞉ ikadepe koko wua꞉ watle atlema. Oplami antapo na꞉ dla mikadepe dlepiye, ya꞉ na꞉ta ulugiyemale koko halomsela꞉ ipapeleye ya꞉ ma me-halomelepe. Yao, ikadepe, ya꞉tapo ulugiyemale koko opi sikemte patoto ma me-halomelepe. Adipalati, na꞉ye A hala dla tama. 13 Epapele dulu dla wua꞉ apa kokoye na꞉ hi tle dalla natilipiye, na꞉ koko eye halepe, Ata hela꞉dleye Maseyemala tle botomastlepo depame. 14 Epapedeme wua꞉ apa kokoye na꞉ hi tle dalla natilipiye, na꞉ koko eye halowepo.”

15 “Wua꞉ na꞉ye malaha꞉ha꞉lepiye, eta wua꞉ ma na꞉ta molo atlale yu dla salladepo siyamelepe. 16 Epalati na꞉tapo A watle dalla natilowepo, ya꞉tapo wua꞉ watle gadlalo hale hamilipo depame. Gadlalo etapo wua꞉ mate kokó halepo hallepe. 17 Gadlalo eye Hela꞉dle Sokopo. Ya꞉tapo wua꞉ watle ikadepe kokoye nati-imhallepe. Epapele dulu dla ta꞉lamo sotapo ya꞉ hamoloweye po-ala꞉lowa. Adipalati, yia꞉tapo ya꞉ye ponatilowa, epame ya꞉ koko mape pomalamolowa. Amasiyama wua꞉ tlo ya꞉ koko mo-wua꞉malamana. Adipalati, ya꞉ye wua꞉ mate halapo. Epame wua꞉ dulu dla kokó mepo hallepe.

18 Epedeme na꞉tapo wua꞉ye atali yimlala some isikimi duka dla popomelepo hallowa. Amasiyama na꞉ matle ilame wua꞉ hala dla puluwepo. 19 Epapele dulu dla alila kiyele dla ta꞉lamo sotapo na꞉ mila꞉pi ma ponatilowa. Amasiyama wua꞉ alotle na꞉ mila꞉piye ma me-natilipe. Epapele dulu dla na꞉ta pasakalo depo halademe wua꞉ mape pasakalo ha꞉ha꞉lepe. 20 Epapele dulu dla na꞉tapo powale tle ma pasakalo dlepiye, eta wua꞉tapo na꞉ta A dulu dla hala kokoye malamelepe. Epame wua꞉tapo na꞉ dulu dla ha꞉ha꞉lati na꞉tapo wua꞉ dulu dla halapo. 21 Epedeme oplami antapo na꞉ta molo atlale yu dla dalepame salladepo sela꞉lepiye, oplami etapo na꞉ye sikemte malahalapo. Epame na꞉ dla sikemte malahalalo oplami dla asiyama na꞉ Atapo ya꞉ye sikemte bokotiyapo malamhalapo. Epame na꞉ mape ya꞉ye sikemte bokotiyapo malamhalapo. Epame na꞉tapo ya꞉ dla na꞉ kokoye nati-iliwepo.”

22 Epalati Yudas Iskaliyot ya꞉ daiyotapo epo atlaiyo, “Lod, wa꞉ adipalati wa꞉skamu wa꞉ye ta꞉lamo so dla ponati-ilalo wekemama ma di watle nati-iliwepo dema꞉?” diyo.

23 Amasiyama Yesutapo asiyama epo atlaiyo, “Oplami antapo na꞉ye sikemte malahallepiye, ya꞉ na꞉ta imale koko dla ma salladepo sela꞉lepe. Epalati na꞉ Atapo ya꞉ye sikemte bokotiyapo malamhallepe. Epame na꞉ mate epo na꞉ A mate ya꞉ hala dla puame yimkata ya꞉ mate ha꞉ha꞉lepe. 24 Amasiyama oplami antapo na꞉ye pomalamalalo halema꞉, ya꞉ na꞉ta imale dla posalladepo sela꞉sema. Epapele dulu dla na꞉ta imale iye monolo malamale tle wua꞉ dla po-imhalasema. Amasiyama imale iye na꞉ A, na꞉ye tane duwa tle puapo.

25 Epapedeme na꞉ ala wua꞉ mate me-halemama koko hapuloma iye wua꞉ dla ma-atlamhaluwapo. 26 Amasiyama na꞉ Atapo Hela꞉dle Sokoye na꞉ hi tle wua꞉ hala tulune dlepe, ya꞉tapo wua꞉ye gadlalo halemama koko hapulomaye imelepo depame. Epame ma ya꞉tapo koko hapuloma na꞉ta wua꞉ watle me-imuwaye, ma wua꞉ watle malamale hapimhallepe.

27 Epedeme na꞉ta sadleye wua꞉ dla hamima. Sadle na꞉ta hami iye ta꞉lamo sota wua꞉ watle hamilalo pe-epapena. Epapedeme wua꞉ ase dupa sikemte momalamale mate epo wowota꞉le mate ha꞉ha꞉miya.

28 Epedeme wua꞉ na꞉ta atlemama, ‘na꞉ye na꞉ A hala dla tame halepo ma ilame puluwepo,’ duwa kokoye, wua꞉ me-daluwapo. Epapedeme wua꞉ ikadepe na꞉ye sikemte malamha꞉ha꞉leta ammatiye, wua꞉ eta na꞉ta na꞉ A hala dla heta koko dla sisiyelemla. Adipalati, ya꞉tapo na꞉ye tla꞉mtamhalapo. 29 Epapele dulu dla na꞉tapo koko hapuloma ala powowoyamalalo hallati wua꞉ watle koko hapuloma iye ma-atlamalepo, wua꞉tapo koko eta alotle woyamalati natipame mikadepe dlepo depame. 30 Epedeme watapo na꞉ta wua꞉ imolowe alilata mogudlowe mo-mateka꞉pi halapo. Adipalati, ta꞉lamo dokopala oplami Saitenye mo-puapo. Amasiyama ya꞉ dla itiyamale hawa ikadepe, na꞉ye tla꞉mtloweye. 31 Epapedeme ta꞉lamo sotapo na꞉ta A sikemte malahala kokoye malastlepo depame na꞉tapo na꞉ Ata solotamale koko halowepo.

Epedeme sillipame mo-tlowa.”